ޔަހޫދީ އިސްރާއީލުން ފަލަސްތީނުގެ ޣައްޒާގައި ހިންގަމުންދާ ލާއިންސާނީ ހަމަލާތަކުގެ ސަބަބުން ޣައްޒާގައި މިވަގުތު ރައްކާކޮށްފައި ހުރި ބަލިމީހުންގެ ގަޔަށް އަޅާ ލޭ ކުރިއަށް އޮތް ހަފުތާ ތެރޭ ހުސްވެދާނެ ކަމަށް ޣައްޒާގެ މެދުތެރޭގައި ހުންނަ އަލް އަޤްޞާ މާޓިޔާ ހޮސްޕިޓަލްގެ މެނޭޖަރު ރިޔާދު މެގްދާދް ވިދާޅުވެއްޖެއެވެ.
ރިޔާދާ ހަވާލާދީ އަލްމަޔާދީން ނޫހުން ރިޕޯޓުކޮށްފައިވާ ގޮތުގައި ގިނަ ބަޔަކު ދީލަތިކަމާއެކު ލޭ ހަދިޔާ ކުރި ނަމަވެސް ޣައްޒާގައި ލޭ ރައްކާކޮށްފައިވާ މިންވަރު ވަނީ ވަރަށް ބޮޑަށް ދަށްވެފައެވެ. ފާއިތުވި 24 ގަޑިއިރުގެ ތެރޭގައި ޒަހަމްވި 300 އަށް ވުރެ ގިނަ އާންމުން އަލް އަގްސާ ޝަހީދު ހޮސްޕިޓަލަށް ބަދަލުކޮށްފައިވާ ކަމަށްވެސް ރިޔާދު ވިދާޅުވިއެވެ.
ޔަހޫދޫންގެ ހަމަލާތަކާހެދި މިހާރުވެސް އެކަށީގެންވާ ވަސީލަތްތައް ނެތް ޣައްޒާގެ ސިއްހީ ނިޒާމު ވަނީ ގާތްގަޑަކަށް ފުޑުފުޑުވެފައެވެ. ސިއްހީ ފަރުވާދޭން ބޭނުންވާ ސާމާނާއި ކާނާއާއި ފެނާއި ކަރަންޓާއި ތެޔޮ ފަދަ މުހިއްމު ވަސީލަތްތަކުގެ ބޭނުން ހޮސްޕިޓަލްތަކަށް ވަނީ ވަރަށް ބޮޑަށް ޖެހިފައެވެ.
ކަރަންޓާއި ބޭސް ފަރުވާއަށް ބޭނުންވާ ސާމާނު ނެތުމުގެ ސަބަބުން ހޭ ނުނައްތައި އޮޕަރޭޝަންތައްކޮށް، ޒަހަމްވެފައިވާ މީހުން ފާރުތައް ސާފުކުރަން ވިނެގާ ބޭނުންކުރަން ޑޮކްޓަރުންނަށް ވަނީ ޖެހިފައެވެ.
ޔަހޫދީންގެ ނުބައި ނުލަފާ ލާއިންސާނީ އަމަލުތަކުގެ ސަބަބުން ޣައްޒާގައި މަރުވި 8،000 އަށް ވުރެ ގިނަ މީހުންގެ ތެރެއިން 40 އިންސައްތައަށް ވުރެ ގިނަ މީހުންނަކީ ކުޑަކުދިންނެވެ. ޝަހީދުވި ކުދިންގެ އިތުރުން، ޣައްޒާއިން އިތުރު 1،000 ކުޑަކުދިން ގެއްލިގެންވެސް ވަނީ ރިޕޯޓްކޮށްފައެވެ. އެ ކުދިން ތިބީ ސުންނާފަތިވެފައިވާ އިމާރާތްތަކުގެ ދަށުގައި ކަމަށްވެސް އެކަށީގެންވާ ކަމަށް ރިޕޯޓުތައް ބުނެއެވެ. ހަނގުރާމަ ފެށުނު ފަހުން ޣައްޒާގައި ވަނީ 6،000 އަށް ވުރެ ގިނަ ކުޑަކުދިން ވަނީ ޒަހަމްވެފައެވެ.