މިސްރު ތަރި މުހައްމަދު ސަލާހު ލިވަޕޫލުގައި މަޑުކޮށް، ކްލަބުގެ ހުރިހާ ރެކޯޑެއް މުގުރާލާނެ ކަމަށް އުންމީދުކުރާ ކަމަށް އެޓީމުގެ ބްރެޒިލް ގޯލްކީޕަރު އެލިސަން ބުނެފިއެވެ.
މިދިޔަ ޓްރާންސްފާގައި ސައުދީ އަރަބިއާގެ ކްލަބުތަކުން ވަނީ ސަލާހު ގެންދިއުމަށް ގިނަ މަސައްކަތްތަކެއް ކޮށްފައެވެ. އެގޮތުން ސައުދީގެ ކްލަބަކުން ސަލާހަށް 200 މިލިއަން ޕައުންޑު (243 މިލިއަން ޑޮލަރު)ގެ އަގެއް ހުށަހެޅި ކަމަށް ރިޕޯޓުތައް ބުނެއެވެ. ކުރިއަށްއޮތް ދުވަސްތަކުގައި ވެސް ލިވަޕޫލުގައި މަޑުކުރުމަށް ކީޕަރު އެލިސަން ވަނީ އެދިފައެވެ.
"ސަލާހަކީ ވަރަށް މޮޅު ކުޅުންތެރިއެއް. އަހަރެންގެ ޓީމުގައި އޭނާ ހުރުމުން ވަރަށް އުފާކުރަން. އަހަރެން އުންމީދުކުރަން އޭނާ ލިވަޕޫލުގެ ޖާޒީގައި، މި ކްލަބުގެ ހުރިހާ ރެކޯޑެއް މުގުރާލާނެ ކަމަށް،" ލިވަޕޫލުގެ ވެބްސައިޓަށް ދިން އިންޓަވިއުއެއްގައި އެލިސަން ބުންޏެވެ.
ލިވަޕޫލާ 2017 ވަނަ އަހަރު ގުޅުނު ސަލާހު ދަނީ އެ ކްލަބުގެ ގިނަ ރެކޯޑުތަކެއް މުގުރަމުންނެވެ. ސަލާހަކީ ލިވަޕޫލުގެ ދިގު ތާރީހުގައި ފަސްވަނައަށް އެންމެ ގިނަ ގޯލު ކާމިޔާބުކޮށްދިން ކުޅުންތެރިޔާއެވެ. ލިވަޕޫލުގެ ލެޖެންޑުން ކަމަށްވާ މައިކަލް އޮވެން، ކެނީ ޑަލްގިޝް، ރޮބީ ފައުލާ އަދި ސްޓީވަން ޖެރާޑް ފަހަތަށް ޖައްސާލި ސަލާހު ވަނީ މިހާތަނަށް ލިވަޕޫލަށް ކުޅުނު 316 މެޗުން 194 ގޯލު ކާމިޔާބުކޮށްފައެވެ. ލިވަޕޫލަށް އެންމެ ގިނަ ގޯލު ކާމިޔާބުކޮށްދީފައިވާ އިއާން ރަޝް، ރެކޯޑު ހަދާފައިވަނީ 660 މެޗުން 346 ގޯލު ކާމިޔާބުކޮށްގެންނެވެ. އެ ރެކޯޑަށް މިހާރު ވަނީ 27 އަހަރު ވެފައެވެ.
ކުރިއަށްއޮތް ޖެނުއަރީ ޓްރާންސްފާގައި ވެސް ސަލާހަށް ހުށަހެޅުންތަކެއް ލިބޭނެ ކަމަށް ލަފާކުރެވެއެވެ. އެގޮތުން ސައުދީގެ ކްލަބުތަކުން ސަލާހަށް ބޮޑެތި އަގުތައް ހުށަހެޅުމަށް މިހާރު ތައްޔާރުވެފައިވާ ކަމަށް ވެސް ރިޕޯޓުތައް ބުނެއެވެ.