ޗެލްސީގެ އިނގިރޭސި ފޯވަޑް ރަހީމް ސްޓާލިން އަދި މެންޗެސްޓާ ސިޓީ ފަދަ ބޮޑެތި ކްލަބުތަކަށް ކުޅެފައިވާ އިޓަލީ ފޯވަޑް މާރިއޯ ބަލޮޓެލީގެ ކުރީގެ ލޯބިވެރިޔާ ޓެބީ ބްރައުން، އުމުރުން 38 އަހަރުގައި މަރުވެއްޖެއެވެ.
މޮޑެލް އަދި ރިއަލިޓީ ޓީވީ ތަރިއެއްގެ ގޮތުގައި މަޝްހޫރުވެގެންދިޔަ ޓެބީ މަރުވެފައިވާކަން އޭނާގެ މެނޭޖަރު ވަނީ މީޑިއާތަކަށް ކަށަވަރުކޮށްދީފައެވެ. ނަމަވެސް ޓެބީ މަރުވި ސަބަބެއް އޭނާގެ މެނޭޖަރު ހާމަކޮށްފައެއް ނުވެއެވެ.
އިނގިރޭސިވިލާތުގެ ލަންޑަންގައި ދިރިއުޅެމުންދިޔަ ޓެބީ އެންމެ ބޮޑު މަސައްކަތެއް ކުރަމުންދިޔައީ މޮޑެލިންގެ ދާއިރާގައެވެ. ނަމަވެސް އޭނާ މަޝްހޫރުވެގެންދިޔައީ "ޗެނަލް 5"ގެ ޑޭޓިން ޝޯ، "ދަ ބެޗެލާސް" އިންނެވެ.
ޓެބީ ވަނީ ނެށުންތެރިއެއްގެ ގޮތުގައި ބައެއް މިއުޒިކް ވީޑިއޯތަކުން ވެސް ފެނިފައެވެ. އެގޮތުން އޭނާ ވަނީ ސްނޫޕް ޑޯގް އަދި ޑިޒީ ރާސްކަލްގެ ބައެއް ވީޑިއޯތަކުން ފެނިގެންގޮސްފައެވެ. އޭގެ އިތުރުން އޭނާ ވަނީ ކެނޯން، ވާޖިން އެޓްލާންޓިކް، އޭކްސް އަދި ލީންކްސްގެ އިސްތިހާރުތަކުން ވެސް ފެނިފައެވެ.
ސްޓާލިންއާ އެކު ޓެބީ ލޯބީގެ ގޮތުން ގުޅިގެން އުޅުނީ 2016 ވަނަ އަހަރުގެ ތެރޭގައެވެ. އަދި، އޭނާ ވަނީ ބަލޮޓެލީއާ އެކު 2011 ވަނަ އަހަރުން ފެށިގެން ހަތް މަސް ދުވަހަށް ލޯބީގެ ގޮތުން ގުޅިގެން އުޅެފައެވެ.