ޕްލާސްޓިކް ކޮތަޅުން ބޮޑު ފީއެއް ނަގާ މައްސަލަ ހައްލުކުރަން ސަރުކާރުގެ ފަރާތުން ކުނި މެނޭޖްކުރުމުގެ ގާނޫނަށް ހުށަހެޅި އިސްލާހުގެ ބިލާއި މަސައްކަތްތެރިންގެ ހައްގުތަކާ ބެހޭ "އިންޑަސްޓްރިއަލް ރިލޭޝަންސް" ބިލު ދިރާސާކުރަން މިއަދު ކޮމިޓީއަށް ފޮނުވައިފިއެވެ.
ސަރުކާރުގެ ފަރާތުން ކޮމަންޑޫ ދާއިރާގެ މެންބަރު މުހައްމަދު ރާޝިދު ހުށަހަޅުއްވާފައިވާ ކުނި މެނޭޖުކުރުމުގެ ގާނޫނަށް އިސްލާހު ގެނައުމުގެ ބިލު ވަނީ ފާސްކޮށް މުޅި މަޖިލީހުގެ ކޮމިޓީއަށް ފޮނުވައިފައެވެ.
މި ބިލު މިއަދުގެ މަޖިލީހުން ފާސްކޮށް ކޮމިޓީއަށް ފޮނުވީ ވަނީ 40 މެންބަރުންގެ އިއްތިފާގުންނެވެ. މި ބިލު ފާސްކުރަން ބޭނުންވަނީ 21 މެންބަރުންގެ ވޯޓެވެ.
މި ބިލު ދިރާސާކުރުމަށް މުޅި މަޖިލީހުގެ ކޮމިޓީއަށް ފޮނުވާފައިވަނީ މި ބިލުގައި ޓެކްސްއަކާ ބެހޭ މާއްދާއެއް ހިމެނޭތީއެވެ.
މި ބިލު ދިރާސާކުރުމަށް މިހާރު ކޮމިޓީއަށް ފޮނުވާފައިވާ އިރު، މަޖިލީހުގެ އެންވަޔަރަމެންޓް ކޮމިޓީގެ މުގައްރިރު އަދި ހޯރަފުށީ ދާއިރާގެ މެންބަރު އަހުމަދު ސަލީމް ވަނީ ކޮތަޅުފީ، ދެ ރުފިޔާއިން 50 ލާރިއަށް ކުޑަ ކުރުމަށް ހުށަހަޅުއްވައިފައެވެ.
ގާނޫނު އޮތް ގޮތުން ޓެކްސް މައިގަނޑު ގޮތެއްގައި ދައްކަން ޖެހެނީ އެންމެ ނިކަމެތި އެންމެ އާދައިގެ ރައްޔިތުންނަށް ވުމަކީ އެކަށީގެންވާ ކަމެއް ކަމެއް ކަމަށް ވިދާޅުވެ ޕްލާސްޓިކް ކޮތަޅުން ފީއެއް ނަގަން ފެށީ ތަކެތީގެ އަގު ވަރަށް ބޮޑަށް އުފުލުނު ދަނޑިވަޅެއްގައި ކަމަށް މިދިޔަ ހޯމަ ދުވަހު ސަލީމް ވިދާޅުވިއެވެ.
އެހެންކަމުން އޭގެ ތަކުލީފު ރައްޔިތުންނަށް ވަރަށް ބޮޑަށް އިހުސާސް ކުރެވުނު ކަމަށް ސަލީމް ވިދާޅުވިއެވެ.
ސަރުކާރުގެ ފަރާތުން މަރަދޫ ދާއިރާގެ މެންބަރު އިބްރާހީމް ޝަރީފް "އިންޑަސްޓްރިއަލް ރިލޭޝަންސް" ބިލު ހުށަހަޅާފައި ވަނީ މި އަހަރުގެ މާޗު މަހުގެ 19 ވަނަ ދުވަހުއެވެ.
މި ބިލު މިއަދުގެ މަޖިލީހުން ފާސްކުރުމަށް ފަހު ދިރާސާ ކުރުމަށް އިގްތިސާދީ ކޮމިޓީއަށް ފޮނުވާފައި ވަނީ 43 މެންބަރުންގެ އިއްތިފާގުންނެވެ. މި ބިލު ފާސްކުރަން ބޭނުންވަނީ 22 މެންބަރުންގެ ވޯޓެވެ.
މީގެ ކުރިން ވެސް މި ބިލަށް ބަހުސްކުރުމަށް ވަނީ ހަތަރު ޖަލްސާއެއްގައި އެޖެންޑާކޮށްފައެވެ. ނަމަވެސް މެންބަރުން ބަހުސްކުރުމަށް ފަހު ވެސް ވޯޓަށް އެހުމާ ހަމައަށް ނުގޮސް އެ ބިލުގެ މަސައްކަތް ވަނީ ފަސްކޮށްފައެވެ. މި ބިލު މިއަދު ފާސްކޮށްފައި ވަނީ މެންބަރުން އެކަމުގެ ކަންބޮޑުވުން ފާޅުކޮށްފައި ވަނިކޮށެވެ.
މި އަހަރުގެ ރިޔާސީ އިންތިޚާބުގެ ކުރިން ސަރުކާރުގެ ފަރާތުން ރައްޔިތުންގެ މަޖިލީހަށް ހުށަހަޅާފައިވާ އިންޑަސްޓްރިއަލް ރިލޭޝަންސް ބިލް ފާސްކުރުމަށް މަސައްކަތެރިންނާ ގުޅޭ އެކި ޖަމުއިއްޔާ ޖަމާއަތްތައް ތަމްސީލުކުރުމަށް އެކުލަވާލައިފައިވާ, މޯލްޑިވްސް ޓްރޭޑް ޔޫނިއަން ކޮންގްރެސް (އެމްޓީޔޫސީ)އިން ވަނީ މީގެ ކުރިން ގޮވާލައިފައެވެ.
މި ބިލް ހުށަހަޅާފައި ވަނީ ގާނޫނު އަސާސީން ކަށަވަރުކޮށްދީފައިވާ މަސައްކަތްތެރިންގެ ޖަމުއިއްޔާތައް އުފެއްދުމާއި އެފަދަ ޖަމުއިއްތާތަކުން ހިންގާ ހަރަކާތްތަކުގައި ބައިވެރިވުމާ ނުވުމުގެ ހައްގު ކުރިއަރުވައި، ކަށަވަރު ކޮށްދިނުމަށެވެ.
މީގެ އިތުރުން މިއަދުގެ ޖަލްސާގައި ހެންވޭރު އުތުރު ދާއިރާގެ މެންބަރު އިބްރާހީމް މުއިއްޒު ހުށަހެޅުއްވި އިންތިޚާބުތަކާ ބެހޭ އާންމު ގާނޫނަށް އިސްލާހު ގެނައުމުގެ ބިލު މިނިވަން މުއައްސަސާތަކުގެ ކޮމިޓީން ފާސްކުރުމުން، އެ ބިލު މަޖިލީހުން ވަނީ 43 މެންބަރުންގެ އިއްތިފާގުން ފާސްކޮށްފައެވެ.
އަދި، މާވަށު ދާއިރާގެ މެންބަރު މުހައްމަދު ސައީދު ހުށަހެޅުއްވި ލ. ހިތަދޫއާއި ކުނަހަންދޫ ގުޅުވައިލުމަށް ހަމަޖެހިފައިވާ ކޯޒްވޭގެ މަސައްކަތް އަވަސް ކޮށްދިނުމަށް ގޮވާލައި ހުށަހެޅި ގަރާރު 39 މެންބަރުންގެ އިއްތިފާގުން ވަނީ ފާސްކޮށްފައެވެ.
ހަމައެއާ އެކު މާވަށު ދާއިރާގެ މެންބަރު މުހައްމަދު ސައީދު ހުށަހެޅުއްވި ލ. ކުނަހަންދޫ އިންޖީނުގެއާއި ނަރުދަމާގެ މަސައްކަތް ހުއްޓިފައިވުމުން މި މަސައްކަތް އަވަސްކުރުމަށް ހުށަހެޅުއްވި ގަރާރު 38 މެންބަރުންގެ އިއްތިފާގުން ފާސްކޮށް ވަނީ ފާސްކޮށްފައެވެ.
މި ދެ ގަރާރު ވެސް ވަނީ ގައުމީ ތަރިކައާއި ތަރައްގީގެ ކޮމިޓީއަށް ފޮނުވައިފައެވެ.