ޕްލާސްޓިކް މަދުކުރުމުގެ ގޮތުން މިދިޔަ އެޕްރީލް މަހު ކޮތަޅު ފީގެ ގޮތުގައި ނަގަން ފެށި ދެ ރުފިޔާ، 50 ލާރިއަށް ކުޑަ ކުރުމަށް ރައްޔިތުންގެ މަޖިލީހަށް މިއަދު އިސްލާހެއް ހުށަހަޅައިފިއެވެ.
މި އިސްލާހު ހުށަހަޅާފައި ވަނީ، ހޯރަފުށީ ދާއިރާގެ އެމްޑީޕީ މެންބަރު އަހުމަދު ސަލީމެވެ.
މިދިޔަ ޑިސެމްބަރު މަހު ފާސްކުރި ކުނި މެނޭޖުކުރުމުގެ ގާނޫނުގައިވާ ގޮތުން ކޮތަޅު ބޮނޑި ހޯލްސޭލް ރޭޓުގައި ގަތަސް، އެ ބޮނޑީގެ އަގުގެ އިތުރުން ކޮންމެ ކޮތަޅަކަށް ދެ ރުފިޔާގެ ފީ ދައްކަން ޖެހެއެވެ.
މިއަދުގެ މަޖިލީހުގައި ސަރުކާރުގެ ފަރާތުން ކޮމަންޑޫ ދާއިރާގެ މެންބަރު މުހައްމަދު ރާޝިދު ހުށަހަޅުއްވާފައިވާ ކުނި މެނޭޖްކުރުމުގެ ގާނޫނަށް އިސްލާހު ގެނައުމުގެ ބިލަށް ބަހުސްކުރަމުން މެންބަރު ސަލީމް ވިދާޅުވީ، ގާނޫނު އޮތް ގޮތުން ޓެކްސް މައިގަނޑު ގޮތެއްގައި ދައްކަން ޖެހެނީ އެންމެ ނިކަމެތި އެންމެ އާދައިގެ ރައްޔިތުންނަށް ވުމަކީ އެކަށީގެންވާ ކަމެއް ކަމަށެވެ. އެގޮތުން ޕްލާސްޓިކް ކޮތަޅުން ފީއެއް ނަގަން ފެށީ ތަކެތީގެ އަގު ވަރަށް ބޮޑަށް އުފުލުނު ދަނޑިވަޅެއްގައި ކަމަށް ސަލީމް ވިދާޅުވިއެވެ.
އެހެންކަމުން އޭގެ ތަކުލީފް ރައްޔިތުންނަށް ވަރަށް ބޮޑަށް އިހުސާސް ކުރެވުނު ކަމަށް ސަލީމް ވިދާޅުވިއެވެ.
މަޖިލީހުގެ އެންވަޔަަރަމެންޓް ކޮމިޓީގެ މުގައްރިރުކަން ވެސް ކުރައްވާ ސަލީމް ވަނީ، ކުނި މެނޭޖްކުރުމުގެ ގާނޫނަށް ގެނައި އިސްލާހުތަކުން ކުރިމަތިވި މައްސަލަތައް ހައްލުކުރުމަށް ގޮތްތަކެއް ވެސް ހުށަހަޅައިފައެވެ.
އެގޮތުން ގަނޑުކޮށް ކޮތަޅު ގަތަސް ގަނޑުކުރި މަސް ނުވަތަ ރޯމަސް ފަދަ ތަކެތި އެޅުމުގެ ބޭނުމަށް ގަންނަ ކޮތަޅުން ޓެކްސް އިސްތިސްނާ ކުރުމާއި، ރީޓެއިލް ފިހާރަތަކާ ކެފޭތަކަށް އިދާރީ ގޮތުން ބުރަ ނުވާނޭ ފަދަ ގޮތަކަށް ޔުނިފޯމް ޓެކްސްއެއްގެ ގޮތަށް ޓެކްސް ތައާރަފު ކުރުމަށް ސަލީމް ވަނީ ހުށަހަޅައިފައެވެ.
"ތިންވަނަ ކަމަކަށް އަޅުގަނޑު ހުށަހަޅަނީ ކޮތަޅަކަށް ޗާޖްކުރެވޭ އަދަދު މިހާރަށް ވުރެ ދަށްކުރުން. އަަޅުގަނޑު ދެކޭ ގޮތުގަައި ފުރަތަމަ ފަހަރު 50 ލާރި ކޮތަޅަކަށް ނަގާ ގޮތަށް އޮތުން ރަނގަޅު. ހަތަރުވަނަ ކަމަކަށް ވިޔަފާރިތަކުން ދެ ފަހަރު ފީ ދައްކަން ޖެހޭ ގޮތަށް އޮތް އޮތުން އުވާލަން ޖެހޭ،" ސަލީމް ވިދާޅުވިއެވެ.
މީގެ އިތުރުން ރެޖިސްޓްރީކޮށްފައިވާ ވިޔަފާރިތަކުން ކޮތަޅު ގަންނަ އިރު ދައްކާ ފީ، އެ ފަރާތުން ކޮތަޅު ވިއްކާއިރު ނަގާ ފީން އަޅާ ކެނޑޭ ގޮތަށް ހެދުމަށް ވެސް ވަނީ ހުށަހަޅައިފައެވެ.
ދެހާސް ތިރީހުގެ ނިޔަލަށް ޒީރޯ ޕްލާސްޓިކް ގައުމަކަށް ރާއްޖެ ހެދުމަކީ ސަރުކާރުގެ އަމާޒެެކެވެ. އަދި 2023 ވަނަ އަހަރުގެ ކުރީން، "ސިންގަލް-ޔޫސް ޕްލާސްޓިކް" ނުވަތަ އެއް ފަހަރު ބޭނުންކޮށްފައި އުކާލާ ޕްލާސްޓިކްގެ މައްސަލައަށް ހައްލެއް ހޯދުމަކީވެސް ސަރުކާރުގެ މުހިއްމު އަމާޒެކެވެ.