މި އަންނަ އަހަރު ޖަރުމަނުވިލާތުގައި ބޭއްވުމަށް ހަމަޖެހިފައިވާ ޔޫރޯ 2024 އިން ޕޯޗުގަލް ޖާގަހޯފައިފިއެވެ.
މި މުބާރާތުން ޕޯޗުގަލް ޖާގަހޯދީ ޔޫރޯ ކޮލިފައިން ގްރޫޕް ޖޭ ގައި ރޭ ސްލޮވާކިއާ އާއި ބައްދަލުކުރިމެޗް އަމިއްލަ ރަށުގައި ކުޅެ 3 ލަނޑު 2 ލަނޑުން މެޗް ކާމިޔާބުކޮށްގެންނެވެ.
މި ކާމިޔާބީއާއެކު ޕޯޗުގަލް މި ވަނީ މިހާތަނަށް އެ ޓީމް ކުޅުނު ހަތް މެޗްވެސް ކާމިޔާބުކޮށްފައެވެ. ރޭގެ މެޗްގައި ދެޓީމްގެ ފަރާތުން ވާދަވެރި ކުޅުމެއް ފެނިގެންދިޔައިރު ގިނަ ހަމަލާ އުފައްދާ ގިނަ އިރު ބޯޅަ ގެން ގުޅެފައިވަނީ ޕޯޗުގަލްއިންނެވެ.
މި މެޗް ޕޯޗުގަލް ފަށާފައިވަނީ ވަރަށް ފޯރީގައެވެ. މިގޮތުން މެޗްގެ 18 ވަނަ މިނެޓްގައި ޕޯޗުގަލްއިން ވަނީ މެޗްގެ ލީޑު ނަގާފައެވެ. މި ލަނޑު އެ ޓީމަށް ކާމިޔާބުކޮށް ދިނީ ގޮންކާލޯ ރާމޯސްއެވެ. އަދި މެޗްގެ 29 ވަނަ މިނެޓްގައި ލިބުނު ޕެނަލްޓީއަކުން ޕޯޗުގަލްގެ ލީޑު ފުޅާކޮށްދިނީ ކެޕްޓަން ކްރިސްޓިއާނޯ ރޮނާލްޑޯއެވެ.
މި މެޗްގައި ސްލޮވާކިއާއިން ކާމިޔާބުކުރި ފުރަތަމަ ލަނޑު މެޗްގެ 69 ވަނަ މިނެޓްގައި ޖަހާދިނީ ޑޭވިޑް ހަންޗްކޯއެވެ. ނަމަވެސް މިލަނޑު ޖެހިތާ ތިން މިނެޓް ފަހުން ރޮނާލްޑޯ ވަނީ އަނެއްކާވެސް ޕޯޗުގަލްއަށް ދެލަނޑުގެ ލީޑެއް ނަގާދީފައެވެ. މިއީ އޭނާ ޕޯޗުގަލް ޤައުމީ ޓީމަށް ކާމިޔާބު ކޮށްދިން 125 ވަނަ ލަނޑެވެ.
މިމެޗްގައި ސްލޮވާކިއާއިން ވަނީ މެޗްގެ 80 ވަނަ މިނެޓްގައި ލަނޑެއް ޖަހާ މެޗްގެ ފަހު ދިހަ މިނެޓްގެ ފޯރި އިތުރަށް ވަރުގަދަ ކޮށްފައެވެ. މި ލަނޑު އެ ޓީމަށް ޖަހާދިނީ ސްޓަނިސްލާވް ލޮބޮޓްކާއެވެ. ސްލޮވާކިއާއިން އިތުރު ލަނޑެއް ޖަހާ މެޗްގެ ނަތީޖާ ހަމަހަމަ ކުރެވޭތޯ މަސައްކަތް ކުރި ނަމަވެސް ޕޯޗުގަލްއިން ވަނީ ނަތީޖާއަށް އިތުރު ބަދަލެއް އަޔަނުދީ ހިފަހައްޓާލާފައެވެ.
މި ކާމިޔާބީއާއެކު ޕޯޗުގަލްއަށް ލިބިފައިވާ 21 ޕޮއިންޓާއެކު އެޓީމް ވެފައިވަނީ ޔޫރޯ 2024 އިން ޖާގަހޯދި ހަތަރުވަނަ ޓީމަށް ވެގެން ގޮސްފައެވެ. މިހާތަނަށް މިމުބާރާތުން ޖާގަހޯދައިވާ އަނެއް ތިން ޓީމަކީ ފަރަންސޭސިވިލާތް، ބެލްޖިއަމް އަދި މުބާރާތް ބާއްވާ ޤައުމީ ޖަރުމަނުވިލާތެވެ. ސްލޮވާކިއާ މި ވަގުތު އޮތީ ކުޅުނު ހަތް މެޗުން ލިިބިފައިވާ 13 ޕޮއިންޓާއެކު ގްރޫޕްގެ ދެވަނައިގައެވެ.