ރައްޔިތުންގެ މަޖިލީހުގެ މަތިވެރި ދާއިރާގެ އެމްޑީޕީގެ މެންބަރު ހަސަން ޒަރީރަށް ހަމަލާދިން މައްސަލައިގައި, އިބްރާހިމް އަބްދުﷲ (ގައްބަރޭ) އާއި އިތުރު ދެ މީހެއްގެ މައްޗަށް ދައުވާ ކުރަން، ޕްރޮސިކިއުޓާ ޖެނެރަލް (ޕީޖީ) އޮފީހުން ކްރިމިނަލް ކޯޓަށް ފޮނުވައިފިއެވެ.
ހަބީބީ ކެފޭ އެންޑް ބިސްޓްރޯ ތެރޭގައި އިންނަވަނިކޮށް ޒަރީރަށް, ފަސް މީހުންގެ ގްރޫޕަކުން ހަމަލާ ދީފައިވަނީ މެއި މަހު އެއްވަނަ ދުވަހު ރޭ ދަންވަރު 3:30 އެހާކަންހާއިރުއެވެ. މަރުތޭލައަކުން ޖަހައި ބޯ ފަޅާލުމުގެ އިތުރުން އެހެން ބައެއް އަނިޔާތައް ވެސް ޒަރީރަށް ވަނީ ލިބިފައެވެ.
މި މައްސަލައިގައި ގައްބަރޭ އާއި ދެން ތުހުމަތު ކުރެވޭ މ. ތާޖް މުލާއިމް މުހައްމަދާއި، ތ. ކިނބިދޫ، ދީފުރަމްގެ އަހުމަދު އައުޝަމްގެ މައްޗަށް ދައުވާކުރުމަށް ޕީޖީން ވަނީ ކްރިމިނަލް ކޯޓަށް މިދިޔަ މަހުގެ 19ގައި ފޮނުވައިފައެވެ. އެ ތިން މީހުންގެ މައްޗަށް ކޮށްފައި ވާ ދައުވާތަކަކީ:
- ގައްބަރޭ- މީހަކަށް ނުރައްކާތެރި ހާނިއްކައެއްވާ ގޮތަށް ހަތިޔާރެއް ބޭނުންކޮށްގެން މާރާމާރީ ހިންގުން.
- މުލާއިމް މުހައްމަދު- މީހަކަށް ނުރައްކާތެރި ހާނިއްކައެއްވާ ގޮތަށް ހަތިޔާރެއް ބޭނުންކޮށްގެން މާރާމާރީ ހިންގުމުގައި ބައިވެރިވުން.
- އަހްމަދު އައުޝަމް- މީހަކަށް ނުރައްކާތެރި ހާނިއްކައެއްވާ ގޮތަށް ހަތިޔާރެއް ބޭނުންކޮށްގެން މާރާމާރީ ހިންގުމުގައި ބައިވެރިވުން.
މި މައްސަލާގައި މީގެ ކުރިން ހައްޔަރުކުރި ގައްބަރޭ އަދިވެސް ހުރީ ފުލުހުންގެ ބެލުމުގެ ދަށުގައެވެ. އޭނާ ހައްޔަރު ކުރީ، ހޯދަން އިއުލާންކުރިތާ ހަފުތާއެއް ފަހުން، އޭނާ އަމިއްލައަށް ފުލުހުންގެ އިދާރާއަށް ހާޒިރުވުމުން މެއި މަހުގެ 23ވަނަ ދުވަހުއެވެ. އެންމެ ފުރަތަމަ އޭނާގެ ބަންދަށް ޖެހީ 30 ދުވަހެވެ.
އެއަށް ފަހު މިދިޔަ ޖުލައި މަހުގެ ހަވަނަ ދުވަހު ކްރިމިނަލް ކޯޓުން ވަނީ އޭނާ ބަންދުން ދޫކޮށްލާފައެވެ. ނަމަވެސް އެންމެ ފުރަތަމަ އޭނާ ބަންދު ކުރީ ކުށަށް ތުހުމަތުކުރެވޭ ވަރަށް ފުލުހުން ހެކި ހުށަހަޅާފައި ވާތީއެވެ.
ކްރިމިނަލް ކޯޓުން ގައްބަރޭ ދޫކޮށްލުމުން ދައުލަތުގެ ފަރާތުން ވަނީ އެ މައްސަލަ ހައި ކޯޓުގައި އިސްތިއުނާފް ކޮށްފައެވެ. އެ މައްސަލައިގައި ހައި ކޯޓުން ކުރި ހުކުމުގައިވަނީ ގައްބަރޭ އާއި ދެން ތިބި ދެ މީހުން ދޫކޮށްލަން ކްރިމިނަލް ކޯޓުން ނިންމީ ގާނޫނާ ހިލާފަށް ކަމަށާއި، އެ މީހުންގެ ބަންދު ކުރަން ފަސް ދުވަސް ތެރޭގައި ހުށަހަޅައިފިނަމަ ބަންދާ މެދު ގޮތެއް ނިންމަން އަމުރު ކުރާ ކަމަށް ވެސް ބުނެފައިވެއެވެ.
އެއަށް ފަހު މިދިޔަ މަހުގެ 18ވަނަ ދުވަހު އޭނާ އަލުން ހައްޔަރު ކޮށް ޝަރީއަތް ނިމެންދެން ބަންދުގައި ބެހެއްޓުމަށް ކްރިމިނަލް ކޯޓުން ވަނީ އަމުރު ކޮށްފައެވެ.
އެހެންނަމަވެސް މި ފަހުން ގައްބަރޭ ދޫކޮއްލުމަށް ފުލުހުން ގާތު އެދި ޒަރީރު ކޮށްފައިވާ ޓްވީޓެއްގައި ވަނީ ގައްބަރޭއަކީ އޭނާގެ ވަރަށް ގާތް ރަހުމަތްތެރިއެއް ކަމަށް ބުނެފައެވެ.