ރިޔާޟް (3 އޮކްޓޯބަރު 2023) : ސައޫދީ ގައުމީ އެއާލައިންސް ރީބްރޭންޑްކޮށް ލޯގޯއާއި ފަޅުވެރިންގެ ޔުނީފޯމް ބަދަލުކޮށްފިއެވެ.
ސައޫދީ ރަސްމީ މީޑިއާ ބުނާގޮތުން ރީބްރޭންޑްކުރީ އެގައުމުގެ ވަލީއުލްއަހްދު މުހައްމަދު ބިން ސަލްމާން އިއުލާން ކުރައްވާފައިވާ ވީޝަން 2030 އާ ގުޅުވައިގެންނެވެ. އެ އަހަރާ ހަމައަށް ދާއިރަށް ގައުމީ އެއާލައިސްގެ ފްލީޓްގައި ހިމެނޭ ބޯޓުތަކާއި ވަސީލަތްތަކާއި ޚިދުމަތުގެ ފެންވަރު ރަނގަނޅުކޮށް ދަތުރުތައް ގިނަކުރުމަށް އަމާޒުކޮށްގެންނެވެ.
އެ ހިސާބަށް ދާއިރަށް ސައޫދީ ގައުމީ އެއާލައިން މެދުވެރިކޮށް އަހަރަކު 330 މިލިއަން މީހުންނަށް ޚިދުމަށް ދިނުމަކީ އަމާޒެއްކަަމަށް އޭނާ ވިދާޅުވިއެވެ. އަދި ދުނިޔެއާއި ސައޫދީ މިހާރަށްވުރެ ބޮޑަށް ގުޅުވާލައި އެއާލައިންސް އިން ލިބޭ އާމްދަނީ އެތައް ގުނައެއް އިތުރު ކުރުންވެސް މިބަދަލުގެ އަމާޒުތަކުގެ ތެރޭގައި ހިމެނެއެވެ.
ސައޫދީ އެއާލައިންސްގެ ބޯޓުތަކުގައި މަސައްކަތްކުރާ ފަޅުވެރިންގެ އައު ޔުނިފޯމް
ސައޫދީ ގައުމީ އެއާލައިސްގެ ކުރުނަމަކީ ސައޫދިއްޔާއެވެ. ރީބްރޭންޑް ކުރުމުގެ ރަސްމިއްޔާތުގައި ވާހަކަ ދައްކަވަމުން ސައޫދީ އެއާލައިންސްގެ މަސްއޫލުވެރިއަކު ވިދާޅުވިގޮތުގައި އެކުންފުނީގެ އައު ލޯގޯއާއި ޔުނީފޯމްގައި ހިމެނެނީ ތިން ކުލައެކެވެ. އެއީ ފެހި ކުލައާއި ނޫ ކުލައާއި ވެލީގެ ކުލަ ނުވަތަ މަޑު މުށި ކުލައެކެވެ.
ފެހި ކުލަ ރަމްޒުކޮށްދެނީ ސައޫދީގެ އަމިއްލަވަންތަކަމާއި ގައުމިއްޔަތެވެ. ސައޫދީގެ ގައުމީ ދިދައާއި، ސައޫދީގެ ގައުމީ ގަސްކަމަށްވާ ކަދުރު ރުކާއި ސައޫދީގައި ދިރިއުޅޭ އަރަބިންގެ ޒަމާންވީ ސަގާފަތާއި، މެހްމާންދާރީ ރަމްޒުކޮށްދޭ ކުލައަކީ ފެހިކުލައެވެ.
ނޫކުލައިން ރަމްޒުކޮށްދެނީ ސައޫދީ އެއަރލައިންސްގެ މުސްތަޤްބަލެވެ. ނޫކަނޑާއި ނޫކުލައިގެ އުޑު ހުރަސްކޮށް ކުރާ ދަތުރުތަކެވެ. ވެލީގެ ކުލަ ނުވަތަ ހަނަފަސް ސަހަރާގެ ކުލައިން ރަމްޒުކޮށްދެނީ ސައޫދީގެ ބިމެވެ. ސައޫދީގައިވާ ހަނަފަސްބިންތަކާއި ވެލީގެ ފަރުބަދަތަކާއި ވެލީގެ ވާދީތަކެވެ. މީގެއިތުރުން އިންސާނީ ވަސީލަތްތައް ކުރިއެރުވުމަށް ކުރަންރާވާފައިވާ މަސައްކަތްތައް ރަމްޒުކޮށްދެނީވެސް ވެލީގެ ކުލަ ކަމަށް ސައޫދީ މަސްއޫލުވެރިޔާ ވިދާޅުވިއެވެ.