ރައްޔިތުންގެ މަޖިލީހުގެ އައްޑޫ މަރަދޫ ދާއިރާގެ މެމްބަރު އިބްރާހިމް ޝަރީފް (މަވޯޓާއަށް) ހަމަލާދިން މައްސަލައިގައި މީހަކު ހައްޔަރުކޮށްފިއެވެ.
މިދިޔަ ހޮނިހިރު ދުވަހު ވޯޓްލަމުން ދަނިކޮށް ޝަރީފަށް ހަމަލާދީފައި ވަނީ މެންހެޓަން ބިޒްނަސް ހޮޓަލުގެ ތެރޭގައެވެ. އެ ހަމަލާގައި ޝަރީފުގެ އެއް ލޯ މައްޗަށް ވަނީ ލޭ އަރާ ވަރަށް ބޮޑަށް ދުޅަވެފައެވެ. މީގެ އިތުރުން ނޭފަތް މަތި ފަޅައިގެން ގޮސް ލޭ އައިސްފައިވެއެވެ.
އެ ހަމަލާއާ ގުޅިގެން ފުލުހުން އަންނަނީ މައްސަލަ ތަހުގީގު ކުރަމުންނެވެ.
"ސަން"އަށް ޔަގީންވެފައިވާ ގޮތުގައި ޝަރީފަށް ހަމަލާ ދިން ކަމުގެ ތުހުމަތުގައި އުމުރުން 24 އަހަރުގެ ދިވެހި ފިރިހެނަކު މިއަދު ވަނީ ހައްޔަރުކޮށްފައެވެ.
މިކަމާ ގުޅޭގޮތުން ފުލުހުންގެ ރަސްމީ ބަހެއް ވަނީ ލިބޭގޮތް ނުވެފައެވެ.
ޝަރީފަށް ދިން ހަމަލާގެ އިތުރުން ރައްޔިތުންގެ މަޖިލީހުގެ ފޭދޫ ދާއިރާގެ މަޖިލިސް މެންބަރު މުޙައްމަދު ނިހާދަށް ވެސް ބަޔަކު ވަނީ ހަމަލާ ދީފައެވެ. އޭނާއަށް ހަމަލާ ދީފައިވަނީ ވޯޓުލުމުގެ ކަންކަމުގައި އޭނާ ހަރަކާތްތެރިވަމުން ދަނިކޮށް ކަމަށް މައުލޫމާތު ލިބިފައިވެއެވެ.