ބަޔާން މިއުނިކުން އިނގިރޭސި ފޯވަޑް ހެރީ ކޭން ހޯދުމަށް ހަރަދުކޮށްފައިވާނީ 100 މިލިއަން ޔޫރޯއަށްވުރެ ދަށް އަދަދެއް ކަމަށް އެ ކްލަބުގެ ޗެއާމަން ހާބާޓް ހައިނާ ވިދާޅުވެއްޖެއެވެ.
ހައިނާ އެހެން ވިދާޅުވެފައި މިވަނީ، މިދިޔަ ޓްރާންސްފާގައި ބަޔާނުން ކޭން ގެނެސްފައިވަނީ ޓޮޓެންހަމް ހޮޓްސްޕާއަށް 115 މިލިއަން ޔޫރޯ (122 މިލިއަން ޑޮލަރު)ގެ އަގެއް ދިނުމަށްފަހު ކަމަށް ރިޕޯޓުތައް ބުނެފައިވަނިކޮށެވެ.
"ކޭންއަށް 100 މިލިއަން ޔޫރޯއަށްވުރެ އިތުރަށް ހަރަދުކޮށްފައެއް ނުވާނެ. ކުރިއަށްއޮތް ސީޒަނުގައި އޭނާ ދައްކާ ކުޅުމަކުން އިތުރަށް ފައިސާ ދައްކަން ޖެހޭކަން އެނގޭނީ. ބޯނަސްތައް ނުލައި އަހަރެމެން ކޭން ހޯދުމަށް ހަރަދުކުރި އަގު 100 މިލިއަން ޔޫރޯއަށްވުރެ ދަށް އަދަދެއް،" ޖަރުމަންގެ މީޑިއާއަށް ދިން އިންޓަވިއުއެއްގައި ހައިނާ ވިދާޅުވިއެވެ.
ކޭން ހޯދުމަށް ބަޔާނުން ބޮޑު އަގެއް ހުށަހަޅާފައިވަނީ ޓޮޓެންހަމްއާއެކު އޭނާ ހަދާފައިވާ ކޮންޓްރެކްޓް ނިމުމަކާ ގާތަށް ގޮސްފައިވަނިކޮށެވެ. ނަމަވެސް ދެ ކްލަބުން ވެސް މިހާތަނަށް ކޭންގެ އަސްލު އަގެއް ހާމަކޮށްފައެއް ނުވެއެވެ.
ދާދިފަހުން ޓޮޓެންހަމްގެ ޗެއާމަން ޑެނިއެލް ލެވީ ވިދާޅުވެފައިވާ ގޮތުގައި ބަޔާނަށް ކޭން ވިއްކާލާފައިވަނީ އަނބުރާ އޭނާ ގަނެވޭނެ ގޮތަށް އެއްބަސްވުމަކަށް ގޮސްގެންނެވެ. އެހެންކަމުން ކޭންގެ ކެރިޔަރުގެ ވަކި ހިސާބަކުން އަލުން ޓޮޓެންހަމް އިން ފެނުމަކީ އެކަށީގެންވާ ކަމެކެވެ.