އާޖެންޓީނާ ތަރި ލިއޮނެލް މެސީގެ ކެޕްޓަންކަމުގެ ދަށުން ކުޅެމުންދާ އިންޓަ މަޔާމީން ރެއާލް މެޑްރިޑްގެ ކްރޮއޭޝިއާ މިޑްފީލްޑަރު ލޫކާ މޮޑްރިޗް ހޯދުމުގެ މަސައްކަތް ފަށައިފިއެވެ.
ރިޕޯޓުތައް ބުނާގޮތުގައި އުމުރުން 38 އަހަރުގެ މޮޑްރިޗް ހޯދުމުގެ މަސައްކަތުގައި އެންމެ އިސްކޮށް އުޅެނީ އިންޓަ މަޔާމީގެ ވެރިޔާ އަދި ރެއާލްގެ ލެޖެންޑް ޑޭވިޑް ބެކަމްއެވެ. ރެއާލްއާއެކު މޮޑްރިޗް ހަދާފައިވާ ކޮންޓްރެކްޓް އަހަރެއް ތެރޭ ނިމުމަކަށް އަންނާނެއެވެ.
މެސީއާއެކު ކުރިން ބާސެލޯނާ އިން ފެނުނު ސްޕެއިން ޑިފެންޑަރު ޖޯޑީ އަލްބާ އަދި ސްޕެއިން މިޑްފީލްޑަރު ސާޖިއޯ ބުސްކެޓްސް ވެސް މިހާރު ކުޅެމުންދަނީ އިންޓަ މަޔާމީއަށެވެ. އެ ކުޅުންތެރިންގެ މުސާރަތައް ބޮޑުވާނެތީ، މޮޑްރިޗް ގެނައުމަށް އުނދަގޫތަކެއް ކުރިމަތިވާނެ ކަމަށް ރިޕޯޓުތައް ބުނެއެވެ.
ޓޮޓެންހަމް ހޮޓްސްޕާއަށް ކުޅުމަށްފަހު، ރެއާލްއާ މޮޑްރިޗް ގުޅުނީ 2012 ވަނަ އަހަރުއެވެ. އެއަށްފަހު އޭނާ ރެއާލާއެކު 20 ތަށި ހޯދާފައިވާ އިރު، އޭގެ ތެރޭގައި ފަސް ޗެމްޕިއަންސް ލީގު ހިމެނެއެވެ.
އެމެރިކާގެ މޭޖާ ލީގް ސޮކާ (އެމްއެލްއެސް)ގައި މެސީއާއެކު އިންޓަ މަޔާމީން އަންނަނީ ރަނގަޅު ކުޅުމެއް ދައްކަމުންނެވެ. އަނިޔާއާ ގުޅިގެން މެސީއާ ނުލައި އިންޓަ މަޔާމީން މެޗުތަކެއް ކުޅެން ޖެހުނު ނަމަވެސް، އެޓީމުގެ ނަތީޖާތައް ގޯހެއް ނޫނެވެ.