މޮރޮކޯއަށް ކުރިމަތިވީ ބިންހެލުމާ ގުޅިގެން މޮރޮކޯއަށް އެހީތެރިވުމަށް ރާއްޖޭގެ ރެޑް ކްރެސެންޓުން ހުޅުވާލި ފަންޑަށް މުޅި ޖުމްލަ 70،931.64 ރުފިޔާ ލިބިފައިވާ ކަމަށް މޯލްޑިވްސް ރެޑް ކްރިސެންޓުން ބުނެފިއެވެ.
މިއީ މި މަހުގެ އަށްވަނަ ދުވަހު މޮރޮކޯއަށް އައި ބިންހެލުމާ ގުޅިގެން ހާލުގައި ޖެހުނު މީހުންނަށް އެހީތެރިވުމަށްޓަކައި، ރެޑް ކްރެސެންޓުގެ ފަރާތުން ހުޅުވާލި ރިލީފް ފަންޑެކެވެ. މި ފަންޑު ކުރިއަށް ގެންދިޔައީ މި މަހުގެ އަށްވަނަ ދުވަހުން ފެށިގެން މި މަހުގެ 14 ވަނަ ދުވަހާ ހަމައަށެވެ.
ރެޑް ކްރެސެންޓުން ބުނީ މި ފަންޑުން އެހީވުމަށް ހަމަޖެހިފައިވަނީ، އިންޓަނޭޝަަނަލް ފެޑެރޭޝާން އޮފް ރެޑް ކްރޮސް އެންޑް ރެޑް ކްރެސެންޓް ސޮސައިޓީސް (އައިއެފްއާރުސީ)ގެ ފަރާތުން މޮރޮކޯގެ ހާލުގައި ޖެހިފައިވާ މީހުންނަށް އެހީތެރިކަން ފޯރުކޮށްދިނުމަށް ނެރެފައިވާ 100 މިލިއަން ސްވިސް ފްރެންކްސްގެ އިމަޖެންސީގެ އިލްތިމާސާ އެއްގޮތަށް ކަމަށެވެ.
ރެޑް ކްރެސެންޓުން ހުޅުވާލި މި ފަންޑަށް ލިބުނު ފައިސާ މިހާރު އައިއެފްއާރްސީ އާ ހަވާލު ކުރުމަށް ކުރަން ޖެހޭ މަސައްކަތްތައް މިހާރު ފަށާފައިވާ ކަމަށް ރެޑް ކްރެސެންޓުން މައުލޫމާތު ދެއެވެ.
މީގެ އިތުރަށް ރެޑް ކްރެސެންޓުން ބުނީ ދިވެހިން މި ފަންޑަށް ދީފައިވާ ފައިސާ ދެފުށް ފެންނަ ނިޒާމެއްގެ ދަށުން ހަވާލު ކުރާނެ ކަމަށާއި އެ ފައިސާއިން މޮރޮކޯގެ ހާލުގައި ޖެހުނު މީހުންނަށް ފޯރުކޮށްދޭ އެހީތެރިކަން ވެސް ރެޑް ކްރެސެންތް މެދުވެރިކޮށް ދައްކަމުން ދާނެ ކަމަށެވެ.
އަށްވަނަ ދުވަހުގެ ރޭ މޮރޮކޯއަށް ކުރިމަތިވީ މި ބިންހެލުމުގައި 296 މީހުން މަރުވެ 153 މީހަކަށް އަނިޔާވެފައިވާ ކަމަށް އެ ގައުމުގެ ދައުލަތުގެ މީޑިއާއިން ރިޕޯޓުކޮށްފައިވެއެވެ.
މޮރޮކޯއަށް މިހާ ގެއްލުން ބޮޑު ބިންހެލުމެއް އެންމެ ފަހުން އައިސްފައި ވަނީ 2004ގައެވެ. އެގޮތުން 6.3 މެގްނިޓިއުޑުގެ ބާރުމިނުގައި އައި އެ ބިންހެލުމުގައި 600އަށް ވުރެ ގިނަ މީހުން މަރުވިއެވެ.