އިންޑޮނޭޝިއާގެ އިރުމަތީ ނޫސާ ތެންގާރާ ޕްރޮވިންސްގެ ފްލޯރެސް ޖަޒީރާގެ އުތުރުން ކަނޑުގެ ސަރަހައްދަށް އައި 7.7 މެގްނިޓިއުޑްގެ ބާރުގަދަ ބިންހެލުމެއްގައި މަދުވެގެން 68 މީހުން މަރުވެއްޖެއެވެ.
ހޮނިހިރު ދުވަހުގެ ހެނދުނު 6:00 ހާއިރު އައި މި ބިންހެލުމަށްފަހު، މިހާތަނަށް 1،600 އާ ގާތްކުރާ އަދަދަކަށް އާފްޓަޝޮކް އައިސްފައިވާ ކަމަށް އޮފިޝަލުން ބުނެއެވެ.
އެ ގައުމުގެ ނޭޝަނަލް ޑިޒާސްޓާ މެނޭޖްމަންޓް އޭޖެންސީން ހާމަކޮށްފައިވާ ގޮތުގައި، މި ކާރިސާގައި 1،300 އަށް ވުރެ ގިނަ ގެއަށް ގެއްލުންވެފައިވާއިރު، ހަމައެކަނި ފްލޯރެސް ޖަޒީރާއިން 250 އާ ގާތްކުރާ އަދަދަކަށް ގެ ވަނީ އެއްކޮށް ހަލާކުވެފައެވެ.
މަރުވި މީހުންގެ އަދަދު 68 އަށް އަރާފައިވާއިރު، އިމާރާތްތަކުގެ ދަށުގައި އިތުރު ބަޔަކު ތާށިވެފައި ތިބެދާނެ ކަމުގެ ބިރު އޮތް ކަމަށް ރިޕޯޓުތައް ބުނެއެވެ. އެހެންކަމުން މީހުން ސަލާމަތްކުރާ ފަރާތްތަކުން ދަނީ ހަލާކުވެފައިވާ އިމާރާތްތަކުގެ ކައިރީގައި ހަރަކާތްތެރިވަމުންނެވެ. މީގެ އިތުރުން، 200 އަށް ވުރެ ގިނަ މީހުންނަށް އަނިޔާވެ، 5،000 އެއްހާ މީހުން ވަނީ ވަގުތީ ހިޔާތަކަށް ބަދަލުކޮށްފައެވެ.
ހޮނިހިރު ދުވަހުގެ ބިންހެލުމަށްފަހު، ހޯމަ ދުވަހު ވެސް އެ ސަރަހައްދަށް 5.6 މެގްނިޓިއުޑްގެ ބިންހެލުމެއް އައިސްފައިވާ ކަމަށް އޮފިޝަލުން ބުނެއެވެ. އެހީ ފޯރުކޮށްދިނުމުގެ މަސައްކަތް ފަށާފައިވީ ނަމަވެސް، ބިންގަނޑު ކަނޑައިގެން ދިއުމާއި މަގުތައް ބެދުމުގެ ސަބަބުން، އިރުމަތީ އިންޑޮނޭޝިއާގެ ގިނަ ރައްޔިތުންނަށް އަދިވެސް އެހީ ނުލިބޭ ކަމަށް ރިޕޯޓުތައް ބުނެއެވެ. ކާބޯތަކެތި ނުލިބުމުގެ ކަންބޮޑުވުން އޮތް ކަމަށް ރިޕޯޓުތައް ބުނާއިރު، ބައެއް ސަރަހައްދަތަކުގައި ވަގުތީ ހޮސްޕިޓަލްތައް ދަނީ އިމާރާތްކުރަމުންނެވެ.
މި ކާރިސާއާ ގުޅިގެން، 1992 ވަނަ އަހަރު ފްލޯރެސްއަށް އައި ބާރުގަދަ ބިންހެލުމާއި ސުނާމީގެ ހަނދާންތައް އާވެފައިވާ ކަމަށް ބައެއް ރައްޔިތުން ބުނެއެވެ. އެ ކާރިސާގައި 2،500 އެއްހާ މީހުން މަރުވެފައިވެއެވެ.
ގެދޮރު ހަލާކުވި މީހުންގެ ތެރޭގައި ހިމެނޭ ރަޝީދު ޖަފާރު ނަމަކަށް ކިޔާ މީހަކު ބުނި ގޮތުގައި އޭނާގެ ގެ ވަނީ އެއްކޮށް ފުނޑުފުނޑުވެފައެވެ.
"އަހަރެންގެ ގެ މިހާރު ވަނީ އެއްކޮށް ފުނޑުފުނޑުވެފައި. ކާބޯތަކެއްޗާއި ބޭހާއި ސާފު ބޯފެން ވަރަށް އަވަހަށް ބޭނުންވޭ،" އޭނާ ބުންޏެވެ.
ހަމައެހެންމެ، 22 އަހަރުގެ ވެރޯނިކާ ންގަމްބީ ބުނީ އޭނާގެ ދަރިފުޅު ބަލަހައްޓަމުން ދަނީ ޓްރަކެއްގެ ފަހަތުގައި ކަމަށެވެ.
ކާރިސާގެ ސަރަހައްދުގައި 1،500 އެއްހާ ސިފައިންނާއި ފުލުހުން ހަރަކާތްތެރިވަމުންދާއިރު، 275 ޓަނުގެ އެހީ ވަނީ ފޮނުވާފައެވެ. ޕަލުއޭ ނަމަކަށް ކިޔާ ކުޑަ ޖަޒީރާއަށް އެހީދޭ ފަރާތްތަކުން މިހާރު ގޮސްފައިވާއިރު، ޑެޕިއުޓީ ޕޮލިސް ޗީފް މާސެލަސް ޔޫގޯ އަމްބޯރޯ ވިދާޅުވި ގޮތުގައި މަގުތައް ބެދިފައިވުމުން އެ ރަށަށް ދިއުމަކީ ވަރަށް އުނދަގޫ ކަމެކެވެ.
"މަގުތައް އޮތީ ވަރަށް އުސްކޮށް އަދި ބިންގަނޑު ކަނޑައިގެން ދިއުމުގެ ސަބަބުން ގިނަ މަގުތައް ވަނީ ބެދިފައި. އެއީ މަރުގެ ތުންފަތްމައްޗަށް ދިއުން ފަދަ ނުރައްކާތެރި ދަތުރެއް،" އޭނާ ވިދާޅުވިއެވެ.
އެ ރަށުން އެކަކު މަރުވެ، ދެ މީހަކަށް ބޮޑެތި އަނިޔާތަކެއް ލިބި، 150 އެއްހާ ގެ ވަނީ ހަލާކުވެފައެވެ.