މަނާ ބޭހަށް ޕޮޒިޓިވްވުމާ ގުޅިގެން ޔުވެންޓަސްގެ ފްރާންސް މިޑްފީލްޑަރު ޕައުލް ޕޮގްބާ ސަސްޕެންޑުކޮށްފިއެވެ.
މަނާ ބޭހަށް ޕޮގްބާ ޕޮޒިޓިވްވެފައިވަނީ މިދިޔަ މަހުގެ 20 ވަނަ ދުވަހު އުދިނޭސީއާ ދެކޮޅަށް ޔުވެންޓަސް އިން ކުޅެން އޮތް ލީގު މެޗަށްފަހު ނެގި ޓެސްޓުތަކުންނެވެ.
އެކަމާ ގުޅިގެން ޕޮގްބާއަށް ސަސްޕެންޝަނަކާ ކުރިމަތިލާން ޖެހިފައިވާ އިރު، އޭނާއަށް ޖަވާބުދާރީވުމަށް ތިން ދުވަހުގެ މުހުލަތެއް ލިބޭނެއެވެ. އަދި މަނާ ބޭހެއްގެ ގޮތުގައި ލިސްޓު ކުރެވިފައިވާ ބޭހަށް ޕޮޒިޓިވްވާން ޖެހުނު ސަބަބު ބަޔާންކޮށްދޭން އެނަލިސިސްއެއް ޕޮގްބާ ހުށަހަޅަން ޖެހޭނެއެވެ.
ޔޫރަޕުގެ މަތީ ލެވެލްގެ ލީގުތަކުގައި ކޮންމެ މެޗަކަށްފަހު، އެންޓި ޑޯޕިން ޓެސްޓު ހެދުމަކީ އާންމު ކަމެކެވެ. އުދިނޭސީއާ ދެކޮޅަށް ކުޅުނު މެޗުގެ ކުރިން ޕޮގްބާ ވަނީ އިޓާލިއަން ސެރީއާގައި ބޮލޯނާ އާއި އެމްޕޯލީއާ ދެކޮޅަށް ޔުވެންޓަސް އިން ކުޅުނު މެޗުތަކުގައި ވެސް ކުޅެފައެވެ.
ރިޕޯޓުތައް ބުނާގޮތުގައި، ޕޮގްބާއަށް ދިފާއު ނުކުރެވިއްޖެ ނަމަ، އޭނާއަށް ދެ އަހަރާއި ހަތަރު އަހަރާ ދެމެދުގެ މުއްދަތަކަށް ސަސްޕެންޑުކުރުމުގެ ބާރު ސެރީއާއަށް އޮންނާނެއެވެ.