ބާސެލޯނާގެ ކޯޗުކަމުގެ މަގާމުގައި ހުރި ޒަވީ، އެ ކްލަބާއެކު ހަދާފައިވާ ކޮންޓްރެކްޓް އާކުރަން އެއްބަސްވެއްޖެއެވެ.
ބާސާގެ ކޯޗުކަމުގެ މަގާމާ ޒަވީ ހަވާލުވީ 2021 ވަނަ އަހަރު ރޮނަލްޑް ކޫމަން އެ ކްލަބު ދޫކޮށްލުމާއެކުއެވެ. ޒަވީ އޭރު ތިން އަހަރު ދުވަހަށް ސޮއިކުރުމުން އެ ކޮންޓްރެކްޓް ނިމުމަކަށް އަންނަން އޮތީ މި ސީޒަން ނިމުމުންނެވެ.
ރިޕޯޓުތައް ބުނާގޮތުގައި އުމުރުން 43 އަހަރުގެ ޒަވީ ވަނީ އިތުރު ދެ އަހަރު ދުވަހު ބާސާގައި މަޑުކުރުމަށް އެއްބަސްވެފައެވެ. އެހެންކަމުން ދެން އޭނާގެ ކޮންޓްރެކްޓް ނިމުމަކަށް އަންނާނީ 2025 ގައެވެ.
މިސީޒަނަށް ބާސާ އިން ސްކޮޑު ވަރުގަދަކުރުމަށް ގިނަ މަސައްކަތްތަކެއް ކުރިއެވެ. ނަމަވެސް އެ ކްލަބަށް ކުރިމަތިވި އެންމެ ބޮޑު ގޮންޖެހުމަކަށް ވެފައިވަނީ ކްލަބުގެ މާލީ ހާލަތެވެ. ބާސާ އިން ވަނީ އާޖެންޓީނާ ތަރި ލިއޮނެލް މެސީ ވެސް އަނބުރާ އެ ކްލަބަށް ގެނައުމަށް މަސައްކަތްތަކެއް ކޮށްފައެވެ.
ކޮންޓްރެކްޓް އާކުރުމަށް ޒަވީ އެއްބަސްވީ ނަމަވެސް، އަދި އާ ކޮންޓްރެކްޓުގައި ސޮއިކޮށްފައެއް ނުވެއެވެ. އޭނާ ކޮންޓްރެކްޓުގައި ސޮއިކުރުމަށް ހަމަޖެހިފައިވަނީ އަންނަ ބުދަ ދުވަހު ކަމަށް ރިޕޯޓުތައް ބުނެއެވެ.