މިނިވަންކަމާ އެކު ގައުމު ބޭއްވުމަށްޓަކައި އެންމެ ފުރަތަމަ ކުރަންވީ ކަމަކީ ގައުމުގައި އުޅޭ ރައްޔިތުންނަށް މިނިވަންކަމާ އެކު އުޅެވޭނެ މަގުފަހިކޮށްދިނުން ކަމަށް ރައީސް އިބްރާހިމް މުޙައްމަދު ޞާލިހު ވިދާޅުވެއްޖެއެވެ.
ގާތްގަނޑަކަށް 100 އެއްހާ މީހުން ދިރިއުޅޭ ލ. މުންޑުއަށް ވަޑައިގެން މި ރަށުގައި ވާހަކަފުޅުދައްކަވަމުން ރައީސް ވިދާޅުވީ ރައްޔިތުންނަށް މިނިވަންކަމާ އެކު އުޅެވޭނީ އަސާސީ ޚިދުމަތްތައް ޔަގީންވެގެން ކަމަށެވެ.
އެ މަނިކުފާނު ވިދާޅުވީ ގައުމެއްގެ ސަރުކާރަކުން ޚިދުމަތް ދޭންވާނީ އެ ގައުމެއްގައި އުޅޭ ރައްޔިތުންނަށް ކަމަށެވެ. އެއީ ސަރުކާރެއް އިންތިޚާބުކުރުމުގެ ބޭނުންކަމަށް އެ މަނިކުފާނު ވިދާޅުވިއެވެ.
"އަޅުގަނޑުމެންނަށް އަޑަށް ބާރުލާފައި ބުނެވިދާނެ ބޭނުންވަނީ މި ރާއްޖޭގައި މިނިވަންކަން ގާއިމުކޮށް ބާއްވާށޭ. އެ ކަން ކުރެވޭނީ މި ކަންތައްތައް ކޮށްގެން،" ރައީސް ވިދާޅުވިއެވެ.
އެ މަނިކުފާނު ވިދާޅުވީ ރައްޔިތުންނަށް ޚިދުމަތް ދިނުމުގައި މީގެ ކުރީގެ ސަރުކާރުތަކުން ތަފާތުކުރުން ގެންގުޅެފައިވާ ކަމަށެވެ. އެއީ ގައުމުތަކުގައި ދާޚިލީ ހަމަނުޖެހުންތައް ފެށެން މެދުވެރިިވާ ސަބަބުކަމަށް ވެސް ރައީސް ވިދާޅުވިއެވެ.
"އެކަން ނައްތައިލަން އަޅުގަނޑުމެން މި އުޅެނީ،" އެ މަނިކުފާނު ވިދާޅުވިއެވެ.
ގާތްގަނޑަކަށް 100 އެއްހާ މީހުން ދިރިއުޅޭ މުންޑޫގެ އެންމެންހެން ރައީސަށް މަރުހަބާ ކިއުމަށްޓަކައި ބަނދަރަށް އައިސްފައިވެއެވެ.
ރައީސް ވިދާޅުވީ މީގެ ކުރިން ބާކީވެފައި އޮތް ނަމަވެސް ޖަޒީރާ ރާއްޖޭގެ މެނިފެސްޓޯގެ ދަށުން މުންޑުއަށް ވެސް އަސާސީ ޚިދުމަތްތައް ޔަގީންވަމުން އަންނަ ކަމަށެވެ.
ކުރިއަށް އޮތް ތަނުގައި ވެސް މުންޑުއަކީ ތަރައްގީގެ ސިޔާސަތުތަކުގެ ތެރޭ ހިމަނާނެ ރަށެއް ކަމަށް އެ މަނިކުފާނު ވިދާޅުވިއެވެ.
ކުރިއަށް އޮތް ދައުރުގައި މުންޑޫއަށް ކޮށްދެއްވާނެ ކަންކަން:
- ބަނދަރު ފުންކޮށް ތަރައްގީކުރުން
- ފުޓްބޯޅަ ދަނޑާއި ވޮލީ ކޯޓެއް އެޅުން
ހަމައެއާ އެކު ބޯހިޔާވަހިކަމުގެ ސިޔާސަތުގައި ވެސް މި ރަށް ބާކީނުވާނެ ކަމަށް އެ މަނިކުފާނު ވިދާޅުވިއެވެ.