ކުރިއަށް އޮތް ރިޔާސީ އިންތިޚާބު ކާމިޔާބު ކުރެއްވިއްޖެ ނަމަ، އަދުގެ ސަރުކާރުން މާލޭ ރައްޔިތުންނަށް ދީފައިވާ ގޯތިތައް ފެނުން މައްޗަށް ނަގައިދެއްވާ ފުލެޓު އަޅުއްވައިދެއްވާނެ ކަމަށް އިދިކޮޅު ޕީއެންސީގެ ކެންޑިޑޭޓު ޑރ. މުހައްމަދު މުއިއްޒު މިރޭ ވިދާޅުވެއްޖެއެވެ.
މާލޭގައި އެ މަނިކުފާނުގެ ކެމްޕެއިން ޖަގަހައެއް ހުޅުއްވައިދެއްވުމަށް ފަހު ވާހަކަދައްކަވަމުން މުއިއްޒު ވަނީ ގައުމުގައި ހުރި ރައްޔިތުން ކަންބޮޑުވާ ބައެއް މައްސަލަތަކުގެ މައްޗަށް އަލިއަޅުއްވާ ލައްވައިފައެވެ.
އެގޮތުން މާލޭ ރައްޔިތުންނަށް ދިމާވެފައިވާ ބޯހިޔާވަހިކަމުގެ މައްސަލައަށް އިޝާރާތް ކުރައްވައި ވާހަކަ ދައްކަވަމުން މުއިއްޒު ވިދާޅުވީ، އެއީ އެންމެ މުހިންމު އެއް މައްސަލަ ކަމުގައިވީ ނަމަވެސް މިއަދު ފެނިގެން ދަނީ އިންތިޚާބަށް އެންމެ ދެ ހަފުތާއަށް ވުމުން ނެތް ބިމަކުން ރައްޔިތުންނަށް ގޯތި ބަހަމުންދާ މަންޒަރު ކަމަށެވެ.
މުއިއްޒު އެކަން ސިފަ ކުރެއްވީ ސަރުކާރުން ރައްޔިތުންނަށް ކުރަމުންދާ މަލާމާތެއްގެ ގޮތުގައެވެ.
ވެރިކަން ނިމެން ދެ ތިން ހަފުތާއަށް ވީމާ، ދުނިޔޭގައި ނެތް އެތައް ގޯއްޗަކާއި އެތައް ފްލެޓަކާ ލިޔުމުން ދީފި. މައްސަލައެއް ނެތް. ރައްޔިތުން އަޅުގަނޑުމެންނަށް އިތުބާރު ކޮށް ވެރިކަން ހަވާލު ކޮށްފިއްޔާމުން އެ ގޯތިތައް ފެނުން މައްޗަށް ނަގައިދޭނަން. ފްލެޓުތައް އިރާދަ ކުރެއްވިއްޔާ އަޅައިދޭނަން، ޑރ. މުހައްމަދު މުއިއްޒު
ޖަގަހަ ހުޅުވުމަށް ބޭއްވި ޖަލްސާ / ފޮޓޯ: ޕީޕީއެމް
މުއިއްޒު ވިދާޅުވީ އެ ހުރިހާ ގޯއްޗަކާއި ފްލެޓުތަކަކީ ގެދޮރުވެރި ވެވޭ، ހަގީގީ ގެދޮރުވެރިކަން ހާސިލް ކުރެވޭ ވަރުގެ ތަންތަނަށް ހައްދަވައިދެއްވާނެ ކަމަށެވެ.
ރާއްޖޭގެ އާބާދީގައި އެންމެ ގިނަ މީހުންނަށް ބޭނުން ވަނީ ގެދޮރުވެރިކަން ކަން ފާހަގަކުރައްވައި މުއިއްޒު ވަނީ، އެ މަނިކުފާނުގެ މެނިފެސްޓޯގައި ހިމަނާފައިވާ 65،000 ހައުސިން ޔުނިޓުގެ މަސައްކަތް ވެރިކަމުގެ އެންމެ ފުރަތަމަ ދުވަހުން ފެށިގެން ކާމިޔާބުކަމާ އެކު ނިންމުމުގެ މަސައްކަތް ކުރައްވާނެ ކަމަށް ވައުދުވެވަޑައިގެންފައެވެ.
އެގޮތުން ފުށިދިއްގަރުފަޅާއި، ގިރާވަރު ފަޅާއި ހުޅުމާލޭގެ ބިން ބޭނުން ކޮށްގެން ރައްޔިތުންނަށް ވައުދު ވެފައިވާ ފަދައިން ޕްލޭނާ އެއްގޮތަށް ގެދޮރުވެރިކަން ހާސިލް ކޮށްދެއްވާނެ ކަމަށް މުއިއްޒު ވިދާޅުވިއެވެ.
އެއީކީ އެހެން ދައުރެއް ހޯދަން ދައުރު ނިމޭތާ ފަހުކޮޅު ކޮށްދޭނަމޭ ކިޔާ ކަމަކަށް ނުވާނެ. ރައްޔިތުން އަތްމަތީގައި އޮތީ ގޮތް ނިންމުން. ނަތީޖާ ނެރެދޭނެ ފަރާތަކާ [ވެރިކަން] ހަވާލު ކުރާނީތޯ. ނޫނީ ނަތީޖާ ނެރެ އެކަން ނުވާނެ ފަރާތަކަށް ދޭނީތޯ،ޑރ. މުހައްމަދު މުއިއްޒު
މުއިއްޒު ވިދާޅުވީ ޕީޕީއެމް/ޕީއެންސީގެ ޓީމަކީ ވަރުގަދަ ޓީމެއް ކަމަށާއި، އެ ބޭފުޅުން ވަރުބަލި ނުވާނެ ކަމަށެވެ. އަދި، އަބަދު ވެސް މަސައްކަތް ކުރައްވާނީ އެކަތި ގަނޑެއްގެ ގޮތުގައިކަން ފާހަގަކުރެއްވިއެވެ.
އިންތިޚާބަށް މަދު ދުވަސްކޮޅަކަށް ވެފައިވާއިރު، ކުރިއަށް އޮތް ދުވަސްތަކުގައި އިންތިޚާބު ކާމިޔާބު ކުރުމަށް އެންމެން އެކަތިގަނޑެއްގެ ގޮތުގައި މަސައްކަތް ކޮށްދެއްވުމަށް މުއިއްޒު ވަނީ އެ މަނިކުފާނުގެ ސަޕޯޓަރުންގެ އަރިހުން އެދިވަޑައިގެންފައެވެ.