ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ)ން އިފްތިތާހް ކުރި އާ އެކްޝަން ޕްލޭނާ އެކު ކުންފުނިތަކުގެ ހިންގުން އިތުރަށް ހަރުދަނާ ކުރުމަށް މުހިންމު ފިޔަވަޅުތަކެއް އެޅިގެންދާނެ ކަމަށް އޮޑިޓާ ޖެނެރަލް ހުސެއިން ނިޔާޒީ އިއްޔެ ވިދާޅުވެއްޖެއެވެ.
ޕީސީބީގެ ކުރިއަށް އޮތް ފަސް އަހަރުގެ ސްޓްރެޓީޖިކް އެކްޝަން ޕްލޭން އިފްތިތާހް ކުރުމަށް ބޭއްވި ރަސްމިއްޔާތުގައި މި އެކްޝަން ޕްލޭން ލޯންޗުކޮށްދެއްވީ އޮޑިޓަ ޖެނެރަލް ހުސެއިން ނިޔާޒީއެެވެ.
މި ރަސްމިއްޔާތުގައި ވާހަކަދައްކަވަމުން ނިޔާޒީ ވިދާޅުވީ، ކުންފުނިތަކުގެ ހިންގުން ހަރުދަނާ ކުރުމަށްޓަކައި ގިނަގުނަ މަސައްކަތްތަކެއް މިހާރު ވެސް ކުރަމުންދާ ކަމަށެވެ.
އެގޮތުން، ރިޕޯޓްތައް ރިވިއުކޮށް ނިމުމުން ކުންފުނިތަކާއި ޕީސީބީގެ ހިންގުން ހަރުދަނާ ކުރުމަށް ރަނގަޅު ރެކޮމެންޑޭޝަންތަކެއް ލިބިގެންދާނެކަން ނިޔާޒީ ވަނީ ފާހަގަކުރައްވާފައެވެ.
ނިޔާޒީ ވިދާޅުވީ އެކްސްޓާނަލް އޮޑިޓަރުންގެ ޒިންމާތަކުގެ ތެރޭގައި ކުންފުނީގެ ހިންގުން ހަރުދަނާކުރުމަށް އަޅާފައިވާ ފިޔަވަޅުތަކަކީ އެކަށީގެންވާ ފިޔަވަޅުތަކެއްތޯ ބައްލަވާނެ ކަމަށެވެ. އަދި، އޮޑިޓަރުންގެ ނަޒަރުން ދެކޭ ގޮތާއި، ފްރޯޑް ރިސްކް ދެނެގަނެވިފައިވާ މިންވަރާއި، އެކަންކަމާ ގުޅިގެން އަޅާފައިވާ ފިޔަވަޅުތައް ވެސް ބެލުން މުހިންމު ކަން އޮޑިޓާ ޖެނެރަލް ފާހަގަ ކުރެއްވިއެވެ.
މީގެ އިތުރުން، ސީބީން ކަނޑައަޅާ ޕްރޮކިއުމެންޓް ގައިޑްލައިނާއި، ކޯޕަރޭޓިވް ގަވަނަންސް ކޯޑަށް ބޯލަނބާފައިވާ މިންވަރު ބެލުމަކީ ވެސް ކުންފުނިތައް ހަރުދަނާ ކުރުމަށް އެޅިގެންދާނެ މުހިންމު ފިޔަވަޅެއް ކަމަށް އޭނާ ވިދާޅުވިއެވެ.
އަދި، އަލަށް އިފްތިތާހް ކުރެވުނު އެކްޝަން ޕްލޭނާ އެކު ސަރުކާރު ހިއްސާވާ ކުންފުނިތަކުގެ ހިންގުން ހަރުދަނާކުރުމަށް މަގުފަހިވެގެންދާނެ ކަމަށާއި، ޕީސީބީގެ މަސައްކަތްތަކާއި ސަރުކާރު ހިއްސާވާ ކުންފުނިތަކުގެ ގަވަނަންސް އެއް އަމާޒަކަށް ގެންދިޔުމަށް މަގުފަހިވެގެން ދާނެ ކަމަށް ވެސް ވިދާޅުވިއެވެ.
ސްޓްރެޓެޖިކް އެކްޝަން ޕްލޭންގެ ހިމެނޭ ލަނޑުދަނޑިތަކު ތެރޭގައި އެސްއޯއީތަކާ ގުޅޭ ގަވައިދުތައް ހަރުދަނާ ކުރުމާއި، ޕީސީބީގެ ކެޕޭސިޓީ އިތުރުކުރުމާއި، އެސްއޯއީތައް މިނިޓާކުރާނެ ރަނގަޅު ނިިޒާމެއް އެކުލަވައިލުން ހިމެނެއެވެ.
އަދި، އެސްއޯއީތަކުގެ ނަޒާހަތްތެރިކަމާއި ޖަވާބުދާރީ ކުރެވޭނެ ނިޒާމެއް އެކުލަވައިލުމުގެ އިތުރުން ޕީބީސީގެ މުޅި ޕްރޭމްވޯކް އެކުލަވައިލުން ވެސް ހިމެނެއެވެ.