ވަކި ގޮތަކަށް ހެދުން އަޅައިގެން، ވަޒީފާގެ މާހައުލުގައި ތަފާތުކުރުމާއި ވަޒީފާއިން ވަކިކުރުން ނިމުމަކަށް ގެންނާނެކަމަށް ޕީޕީއެމް، ޕީއެންސީގެ ރިޔާސީ ކެންޑިޑޭޓް ޑރ. މުހައްމަދު މުއިއްޒު މިއަދު ވިދާޅުވެއްޖެއެވެ.
އަތޮޅުތެރެއަށް ކުރައްވަމުންގެންދަވާ ކެމްޕޭން ދަތުރުގައި ނ. މަަނަދޫގައި ވާހަކަ ދައްކަވަމުން މުއިއްޒު ވިދާޅުވީ ދިވެހީންނަކީ އިސްލާމްދީނުގެ ހިދާޔަތުގައި ތިބި ބައެއް ކަމަށާއި ދިވެހިރައްޔިތުންނަކީ ފަހުރުވެރި މުސްލިމުން ކަމަށެވެ.
މި ގައުމުގައި އިސްލާމީ ޝަރީއަތުގެ ތެރެއިން ކަންކަން ކުރެވެން ޖެހޭ ކަމަށާއި ނަމަވެސް، އެކި ކަހަލަ ނުފޫޒުތައް ވައްދަން ބަޔަކު މަސައްކަތްކުރަމުންދާ ކަމަށް ވެސް އޭނާ ވިދާޅުވިއެވެ.
ޑރ. މުއިއްޒު މަނަދުއަށް ވަޑައިގެންނެވިއިރު މަރުހަބާ ދަންނަވަނީ --
"އަޅުގަނޑުމެން ވާންޖެހޭނެ މި ހުރިހާ ކަމަކަށް ލޯ ހުޅުވިފައިވާ ބަޔަކަށް،" މުއިއްޒު ވިދާޅުވިއެވެ.
މި ކަންކަމަކަށް، ތުއްތު ދަރިން ބޮޑުކުރުމުގައި މައިންބަފައިންނާ ހިސާބުން ސަމާލުކަން ދޭންޖެހޭނެ ކަމަށް ވެސް އޭނާ ވިދާޅުވިއެވެ.
މުއިއްޒު ވިދާޅުވީ ރައްޔިތުންނަށް ޚިދުމަތް ދިނުމުގައި ވެސް ވަޒީފާ ދިނުމުގައި ވެސް ތަފާތުނުކުރައްވާނެ ކަމަށެވެ. ހެދުން އަޅަނީ ދީނީ މިންގަނޑަށް ފެތޭ ގޮތަށްނަމަ، ކޮންމެ ގޮތަކަށް ހެދުން އެޅި ނަމަވެސް ތަފާތުކުރެވިގެން ނުވާނެކަމަށް އޭނާ ވިދާޅުވިއެވެ.
"ހެދުން އެޅޭ ގޮތަކުން ވަކި ގޮތަކުން ވަޒިފާއިން ވަކިކުރެވިގެން ނުވާނެ،" މުއިއްޒު ވިދާޅުވިއެވެ.
މާލޭ ސިޓީގެ މޭޔަރުގެ މަގާމުގައި ހުންނެވި މުއިއްޒު ވިދާޅުވީ، ކައުންސިލްގައި ވެސް އެކި ގޮތްގޮތަށް ހެދުން އަޅާ މީހުންނަށް ފުރުސަތުތައް އޮންނާނެ ކަމަށެވެ. އަދި ހެދުން އަޅާ ގޮތުން ވަޒީފާއިން ވަކިކުރުމަކީ އިސްލާމީ ހަމަތަކުގެ ތެރޭގައި ހެދުން އަޅާނަމަ ކުރެވިގެންވާނެ ކަމެއް ނޫން ކަމަށް ވިދާޅުވިއެވެ.
ސަރުކާރުން ނެރުނު ޓީޗަރުންގެ ސްކޫލީ މިންގަނޑުގައި އޮތް ގޮތުން ކިޔަވައިދޭ ވަގުތު ހުރިހާ މުދައްރިސުން ވެސް ތިބެންވާނީ ކާކުކަން އެނގޭ ގޮތަށެވެ. އެއާއެކު، މޫނު ބުރުގާ އަޅައިގެން ކިޔަވައިދެވޭނެ ކަމާމެދު އޮތީ ސުވާލު އުފެދިފައެވެ.
ނަމަވެސް، މީގެ ދެ ދުވަސް ކުރިން އެ މިންގަނޑަށް ވަނީ ބަދަލު ގެނެސްފައެވެ.
އެޑިއުކޭޝަން މިނިސްޓްރީން މި މަހުގެ 22ގައ އެ އުސޫލަށް ގެނައި ބަދަލުގައިވާ ގޮތުން މޫނު ނަގައިގެން ކިޔަވައިދޭން ޖެހޭނީ ހަމައެކަނި 10 އަހަރުން ދަށުގެ ދަރިވަނުންނަށް ކިޔަވައިދޭ ނަމައެވެ. ކިޔަވައިދިނުމުގެ މާހައުލަކީ މޫނު ހާމަކުރެވޭ ތަނެއް ނޫންނަމަ އެ މުދައްރިސުންނަށް ވެސް މޫނު އަޅައިގެން ކިޔަވައިދެވެއެވެ.
މީގެ އިތުރުން، މޫނު ބުރުގާ އަޅާ މުދައްރިސުން އަބަދު ވެސް ތިބެންވާނީ ސްޓާފް ކާޑު އަޅައިގެން ކަމަށް އެ އުސޫލުގައި ވެއެވެ.