ދެވަނަ ދައުރެއްގައި ބ. ފުޅަދުއާއި، ފެހެންދޫ ހިމެނޭ ފަޅުގައި ރިސޯޓެއް ތަރައްގީކުރުމުގެ ވައުދާއެކު ގިނަ ކަންތައްތަކެއް ކޮށްދެއްވުމަށް ފުޅަދޫގެ ރައްޔިތުންނަށް ރައީސް އިބްރާހީމް މުޙައްމަދު ޞާލިޙް ވައުދުވެވަޑައިގެންފިއެވެ.
އާލާސްކަންފުޅުން ރަނގަޅުވުމަށްފަހު އަލުން ރައީސް ކެމްޕޭންގެ ދަތުރުފުޅުތައް ފައްޓަވައި މިއަދު ވަޑައިގެންފައިވަނީ ބ. އަތޮޅަށެވެ. އެގޮތުން އެންމެ ފުރަތަމަ ވަޑައިގަތީ މި އަތޮޅު ފުޅަދުއަށެވެ.
މި ރަށަށް ވަޑައިގެން ދެއްކެވި ވާހަކަފުޅުގައި ރައީސް ވިދާޅުވީ މީގެ ކުރިން ރާއްޖޭގައި ވެރިކަން ކުރެއްވި އެއްވެސް ވެރިއަކު ރާއްޖޭގެ ކުދި އާބާދީތަކާއި ކުދި ރަށްތައް ތަރައްގީކުރުމަށް އެއްވެސް އިސްކަމެއް ދެއްވައިފައިިނުވާ ކަމަށެވެ. އެގޮތުން އެ މަނިކުފާނުގެ ކުރިން 100 ވެރިން ރާއްޖޭގެ ވެރިކަން ކުރެއްވިއިރު އެ ވެރިންގެ ވިސްނުންފުޅުގައި އެ ކަން ނެތްކަމަށެވެ.
"ބޭނުންކުރަނީ ވެރިންގެ އަމިއްލަ މުހުތާދުތައް ފުއްދުމަށް. ރައްޔިތުން ބޭނުންކުރަމުން ދިޔައީ،" އެ މަނިކުފާނު ވިދާޅުވިއެވެ.
ރައީސް ބ. ފުޅަދުއަށް ވަޑައިގަތުން -- ފޮޓޯ/ އެމްޑީޕީ
ނަމަވެސް އެ ކަން މުޅިން ބަދަލުކުރީ 2018ވަނަ އަހަރު މި ސަރުކާރުން ވެރިކަމަށް އައިސް އެކުލަވައިލި ޖަޒީރާ މެނިފެސްޓޯއާއެކު ކަމަށް އެ މަނިކުފާނު ވިދާޅުވިއެވެ.
އެއީ ރަށްތަކުގެ ތަރައްގީއަށް އިސްކަންދީ މުޅި ރާއްޖެ ބާކީނުކޮށް ތަރައްގީ ގެނައުމުގެ ބޭނުމުގައިކަމަށް ރައީސް ވިދާޅުވިއެވެ.
"މިތާ އުޅެން ބޭނުންވަނީ ކާކުތޯ. މި އުފާވެރި މާހައުލުގައި. އެހެންނަމަވެސް އެ ކަން ނުވަނީ އުޅެވޭނެ ގޮތެއް ސަރުކާރުން ދައްކައިފައިނުވާތީ،" ރައީސް ވިދާޅުވިއެވެ.
ރައީސް ވިދާޅުވީ އަސާސީ ޚިދުމަތްތައް ކަށަވަރުވެފައި އޮތުމަކީ ދިރިއުޅުން ތަނެއްގައި ބިނާކުރުމަށް ކޮންމެހެން މުހިންމު ކަމެއްކަމަށެވެ.
އެގޮތުން ރައީސް ވިދާޅުވި ގޮތުގައި ދެވަނަ ދައުރެއްގައި މި ރަށަށް ކޮށްދެއްވާނެ ކަންކަމަކީ:
- ގޮއިދޫ ފުޅަދޫ ފެހެންދޫ ފަޅު ތެރޭގައިި ރިސޯޓެއް ތަރައްގީކުރަން ހުޅުވައިލުން
- ފްލޯޓިން ޖެޓީއެއް ތަރައްގީކުރުން
- ޒުވާނުންނަށް އިންޑޯ ވޮލީކޯޓެއް ތަރައްގީކުރުން
- ކޮމިއުނިޓީ ސެންޓަރެއް އެޅުން
- ވޭސްޓް މެނޭޖްމަންޓް ސެންޓަރެއް އެެޅުން
- ސަރުކާރު މުވައްޒަފުންނަށް އެކޮމޮޑޭޝަން ބްލޮކެއް އެޅުން
- ސިއްހީ މަރުކަޒުގައި ލެބޯޓްރީގެ ޚިދުމަތް
"އާދެ އަޅުގަނޑު ހިތުން މި ގެނެވެނީ ރަނގަޅު ބަދަލެއް،" ރައީސް ވިދާޅުވިއެވެ.
ރައީސް ވިދާޅުވީ މިއީ މުސްތަގްބަލަށް މި ރަށް ތަރައްގީވެ، މި ރަށަށް ބަދަލުވާން ބޭނުންވާ ރައްޔިތުންނަށް ވެސް ލިބޭނެ ފުރުސަތަަކަށްވާނެ ކަމަށެވެ.
ރައީސް ބ. އަތޮޅަށް ކުރައްވާ ކެމްޕޭން ދަތުރުފުޅުގައި އެމްޑީޕީ ކޯލިޝަންގައި ހިމެނޭ އެމްޑީއޭގެ ރައީސް އަޙްމަދު ސިޔާމް މުޙައްމަދާއި، އަދާލަތު ޕާޓީގެ ރައީސް އިމްރާން ޢަބްދުﷲގެ އިތުރުން ތިން ޕާޓީގެ އިސްވެރިން ބައިވެރިވެލައްވައެވެ.