ބްރެޒިލްގެ ތަޖުރިބާކާރު ޑިފެންޑަރު ތިއާގޯ ސިލްވާގެ ބަދަލުގައި ޗެލްސީގެ ކެޕްޓަން ބޭންޑު އިނގިރޭސި ޑިފެންޑަރު ރީސް ޖޭމްސްއަށް ދިން ސަބަބާ ގުޅޭގޮތުން އެ ކްލަބުގެ ކޯޗު މައުރީސިއޯ ޕޮޗެޓީނޯ ވާހަކަދައްކައިފިއެވެ.
ޖޭމްސްއަށް ޗެލްސީގެ ކެޕްޓަން ބޭންޑު ދިނުމަށް ނިންމާފައިވަނީ އެ ކްލަބުގެ ކެޕްޓަންކަމުގެ ދައުރު އަދާކުރަމުންދިޔަ ސްޕެއިން ޑިފެންޑަރު ސެސާ އަޒްޕިލިކުއެޓާ، މިދިޔަ ސީޒަނަށްފަހު ކްލަބު ދޫކޮށްދިއުމާ ގުޅިގެންނެވެ. ޗެލްސީގެ ކެޕްޓަނަކަށް ތިއާގޯ ސިލްވާ ހަމަޖައްސާނެ ކަމަށް ކުރިން ބެލެވިފައިވީ ނަމަވެސް، ޕޮޗެޓީނޯ ނިންމީ ޒުވާން ޑިފެންޑަރު ޖޭމްސްއަށް ކެޕްޓަން ބޭންޑު ދިނުމަށެވެ.
"އެކަމުގައި ތަފާތު ސަބަބުތަކެއް އެބަހުރި. އަހަރެން ބަލަނީ ހަމައެކަނި މިހާރަކަށް ނޫން، ކުރިމަގަށް ވެސް އަހަރެން ވިސްނަން. ޖޭމްސް ވެސް ހުރީ ކެޕްޓަނަކަށް ވުމަށް ތައްޔާރަށް. ތިއާގޯ ސިލްވާ ފަދަ ވިސްނުންތޫނު އަދި އުމުރުން 38 އަހަރުވެފައިވާ ކުޅުންތެރިޔަކު ކެޕްޓަން ބޭންޑު ބޭނުންވެގެން އުޅޭނެތަ؟ ޖޭމްސް އަދި ބެން ޗިލްވެލް ގޮތަށް ސިލްވާއަކީ ވެސް ކެޕްޓަނެއް،" ވެސްޓް ހާމްއާ ދެކޮޅަށް މިއަދު ކުޅޭ ޕްރިމިއާ ލީގު މެޗުގެ ކުރިން ބޭއްވި ނޫސްވެރިންގެ ބައްދަލުވުމުގައި ޗެލްސީގެ ކޯޗު ޕޮޗެޓީނޯ ބުންޏެވެ.
އުމުރުން 23 އަހަރުގެ ޖޭމްސްއަށް ޗެލްސީގެ ކެޕްޓަން ބޭނުންޑު ދިން ނަމަވެސް، އޭނާއަށް އަނިޔާއާ ގުޅިގެން ދުވަސްތަކެއް ގެއްލޭނެ ކަމަށް ބެލެވެއެވެ. ޕްރިމިއާ ލީގުގައި ލިވަޕޫލާ ދެކޮޅަށް ޗެލްސީން ކުޅުނު ޕްރިމިއާ ލީގު މެޗުގައި ޖޭމްސްގެ ފައިގެ މަސްގަނޑަށް ވަނީ އަނިޔާއެއް ވެފައެވެ.
ޖޭމްސްއަކީ ޗެލްސީގެ އެކަޑަމީން ތަމްރީނުވެގެން އައި ކުޅުންތެރިއެކެވެ. ޗެލްސީގެ ސީނިއާ ޓީމަށް އޭނާ ކުޅެން ފެށީ 2018 ވަނަ އަހަރުން ފެށިގެންނެވެ. ޖޭމްސްއަކީ އިނގިރޭސި ގައުމީ ޓީމުގެ ވެސް މުހިންމު ކުޅުންތެރިއެކެވެ.