ޓޮޓެންހަމް ހޮޓްސްޕާގެ އިނގިރޭސި ފޯވަޑް ހެރީ ކޭން ސޮއިކޮށްފައިވާކަން ބަޔާން މިއުނިކުން އިއުލާންކޮށްފިއެވެ.
ބަޔާނުން ކޭން އިއުލާންކޮށްފައި މިވަނީ، ގިނަ ދުވަސްތަކެއް ވަންދެން އޭނާގެ ޓްރާންސްފާއާ ގުޅޭ މަޝްވަރާތައް ކުރުމަށްފަހުއެވެ. އުމުރުން 30 އަހަރުގެ ކޭން، ބަޔާނާ ގުޅުނީ ހަތަރު އަހަރުގެ ދުވަހުގެ ކޮންޓްރެކްޓެއްގެ ދަށުންނެވެ.
ބަޔާންގައި ކޭން ބޭނުންކުރާނީ މީގެ ކުރިން އެ ކްލަބުގައި ޕޮލެންޑް ފޯވަޑް ރޮބާޓް ލެވަންޑޯސްކީ ބޭނުންކުރި ނުވަ ނަމްބަރުގެ ޖާޒީއެވެ. ބަޔާނާއެކު ގިނަ ކާމިޔާބީތަކެއް ހޯދި ލެވަންޑޯސްކީ މިދިޔަ ސީޒަނުގައި އެ ކްލަބު ދޫކޮށް ގުޅިފައިވަނީ ބާސެލޯނާއާއެވެ.
ލެވަންޑޯސްކީ އެ ކްލަބު ދޫކޮށް ދިއުމާއެކު ބަޔާނުން ވަނީ ސްޓްރައިކަރެއް ހޯދުމަށް ގިނަ މަސައްކަތްތަކެއްކޮށްފައެވެ. އެ މަސައްކަތުގެ ދަށުން ބަޔާނަށް ކޭންގެ ސޮއި ހޯދިފައިވަނީ ޓޮޓެންހަމްއަށް 100 މިލިއަން ޕައުންޑް (127 މިލިއަން ޑޮލަރު)ގެ އަގެއް ދެއްކުމަށް އެއްބަސްވުމުންނެވެ.
އިނގިރޭސި ގައުމީ ޓީމުގެ ކެޕްޓަންކަމުގެ މަގާމު ވެސް އަދާކުރަމުންދާ ކޭން، ބަޔާންގެ ޖާޒީގައި މިރޭ ފެނުމަކީ އެކަށީގެންވާ ކަމެކެވެ. ޖަރުމަން ސުޕަކަޕްގެ މެޗުގައި ބަޔާނުން އާރްބީ ލައިޕްޒިގާ ދެކޮޅަށް ނުކުންނާނީ ރާއްޖޭގަޑިން މިރޭ 11:45 ގައެވެ.