ބެންފީކާގެ ޕޯޗުގަލް ފޯވަޑް ގޮންކާލޯ ރާމޯސް، ޕެރިސް ސެއިންޓް ޖާމައިން (ޕީއެސްޖީ)އާ ގުޅުމަށް އެއްބަސްވެފައިވާ ކަމަށް ރިޕޯޓުކޮށްފިއެވެ.
ޕީއެސްޖީން ގޮންކާލޯ ރާމޯސް ހޯދުމުގެ މަސައްކަތް ފަށާފައިވަނީ، އެ ކްލަބުގެ ފްރާންސް ތަރި ކިލިއަން އެމްބާޕޭގެ ބަދަލުގައެވެ. އެމްބާޕޭގެ ކޮންޓްރެކްޓް އާކުރުމަށް ޕީއެސްޖީން މަސައްކަތްތަކެއް ކުރި ނަމަވެސް، އޭނާ ވަނީ އެކަމަށް ދެކޮޅު ހަދައިފައެވެ. އެމްބާޕޭ ބޭނުންވަނީ ކުރިއަށްއޮތް ސީޒަން ނިމުމުން ހިލޭ ޓްރާންސްފާއެއްގެ ދަށުން ރެއާލް މެޑްރިޑާ ގުޅުމަށެވެ.
އިތުބާރު ހުރި ކުޅިވަރު ނޫސްވެރިޔާ ފަބްރީޒިއޯ ރޮމާނޯ ރިޕޯޓުކޮށްފައިވާ ގޮތުގައި، އުމުރުން 22 އަހަރުގެ ގޮންކާލޯ ރާމޯސް ހޯދުމަށް ޕީއެސްޖީން ވަނީ ބެންފީކާއަށް 80 މިލިއަން ޔޫރޯ (88 މިލިއަން ޑޮލަރު)ގެ އަގެއް ދެއްކުމަށް އެއްބަސްވެފައެވެ. ފީފާ ފެއާ ޕްލޭ މައްސަލަތަކާ ގުޅިގެން ޕީއެސްޖީން އޭނާ ލޯނުގެ ދަށުން ފުރަތަމަ ގެނައުމަށްފަހު، އަންނަ އަހަރު ދާއިމީކޮށް ގެންދިއުމަށް ނިންމާފައިވާ ކަމަށް ފަބްރީޒިއޯ ރިޕޯޓުކުރެއެވެ.
ފަބްރީޒިއޯ އިތުރަށް ބުނެފައިވާ ގޮތުގައި، މިދިޔަ ސީޒަނުގައި ބެންފީކާއަށް ކުޅުނު 47 މެޗުން 27 ގޯލު ޖަހައި 12 އެސިސްޓް ހަދާފައިވާ ގޮންކާލޯ ރާމޯސް، ޕީއެސްޖީގެ މެޑިކަލްގައި އަންނަ ހަފުތާގައި ބައިވެރިވާނެއެވެ.
ގޮންކާލޯ ރާމޯސްގެ ނަން އެންމެ ބޮޑަށް ފާހަގަކޮށްލެވިގެންދިޔައީ މިދިޔަ އަހަރު ގަތަރުގައި ބޭއްވި ވޯލްޑް ކަޕްގައެވެ. ޕޯޗުގަލްގެ ކެޕްޓަން ކްރިސްޓިއާނޯ ރޮނާލްޑޯގެ ބަދަލުގައި ޕޯޗުގަލުން ފެނިގެންދިޔަ ގޮންކާލޯ ރާމޯސް ވަނީ އޭނާގެ ފުރަތަމަ ވޯލްޑް ކަޕް މެޗުގައި ވެސް ހެޓްރިކެއް ފުރިހަމަކޮށްފައެވެ.