ހުޅުލެއާއި މާލެ ގުޅައިލަދޭ ބްރިޖަށް މިއަދު އެރި ރާޅުގައި ހަ މީހަކަށް އަނިޔާވެ ސެނަހިޔާގައި ފަރުވާދެމުންދާކަމަށް ފުލުހުން ބުނެފިއެވެ.
ފުލުހުންގެ މީޑިއާ އޮފިޝަލް މިއަދު "ސަން"އަށް ވިދާޅުވީ ބްރިޖަށް އެރި ރާޅުގައި ހަ މީހަކަށް އަނިޔާވި ކަމަށާއި އެ އެންމެންނަށް ވެސް ސެނަހިޔާގައި ފަރުވާދެމުން ދާ ކަމަށެވެ.
އޭގެ ތެރޭގައި ހިމެނެނީ ތން ފިރިހެނަކާއި ދެ އަންހެނެކެވެ. އަދި، 11 އަހަރުގެ ކުޑަ ފިރިހެން ކުއްޖެއްވެސް ހިމެނެއެވެ.
އެ އެންމެންނަށް ވެސް ލިބިފައިވަނީ އަތްފައި މެށުން ފަދަ ކުދި އަނިޔާތަކެކެވެ.
ފުލުހުން ވަނީ މާލޭގެ ރާޅުގަނޑު ސަރަހައްދަށް އުދަ އަރަމުންދާތީ އެ ސަރަހައްދުން ދުއްވާ މީހުން ސަމާލުވުމަށް އިލްތިމާސްކޮށްފައެވެ.
ރާޅުގަނޑު ސަރަހައްދުގެ އިތުރުން ސިނަމާލެ، ބްރިޖާއި، ހައިވޭއަށް ވެސް އުދަައިގެ ރާޅު އަރަމުން އެބަދެއެވެ. ސޯޝަލް މީޑިއާގައި ބްރިޖަށް އުދައަރާ ވީޑިއޯއެއް ދަނީ ދައުރުވަމުންނެވެ. އެ ވީޑިއޯއިން ފެންނަ ގޮތުގައި، ބްރިޖަށް އުދައިގެ ވަރުގަދަ ރާޅެއް ބިންދާލުމާއެކު، ދަތުރުކުރަމުން ދިޔަ ގިނަ އަދަދެއްގެ ސައިކަލުތަކުގައި ތިބި މީހުން ރާޅާއެކު ކަހާލައިގެން ބިންމައްޗަށް ވެއްޓެއެވެ.
އަދި އެ ސަރަހައްދުގެ ޓްރެފިކް ބަލަހައްޓަމުން ދިޔަ ފުލުހަށް އަނިޔާވާތަން ވެސް އެ ވީޑިއޯއިން ފެނެއެވެ.