ކުރިއަށް އޮތް ރިޔާސީ އިންތިޚާބުގައި ރާއްޖޭން ބޭރުގައި ދިރިއުޅޭ ދިވެހީންނަށް ވޯޓު ލެވޭނެ އިންތިޒާމް ހަމަޖެއްސުމުގެ ގޮތުން މިހާތަނަށް ބޭރުގެ ހަތަރު ގައުމެއްގައި ވޯޓު ފޮށި ބެހެއްޓޭނެކަން ކަށަވަރު ކުރެވިފައިވާ ކަމަށް އިލެކްޝަންސް ކޮމިޝަން (އީސީ) އިން ބުނެފިއެވެ.
އެ ކޮމިޝަންގެ ނައިބު ރައީސް އިސްމާއީލް ހަބީބު މިރޭ "ސަން"އަށް ވިދާޅުވީ ބޭރުގެ ގައުމުތަކުގެ ތެރެއިން މިހާތަނަށް ވޯޓު ފޮށި ބެހެއްޓޭނެކަން ކަށަވަރު ކުރެވިފައި ވަނީ އިނގިރޭސި ވިލާތާއި، މެލޭޝިއާ އަދި އިންޑިއާގެ ޓްރިވޭންޑްރަމްގެ އިތުރުން ސްރީލަންކާގެ ކޮލަމްބޯގައި ކަމަށެވެ.
ރާއްޖެއިން ބޭރުގައި ވޯޓު ފޮށި ބަހައްޓަނީ އެންމެ މަދުވެގެން 150 މީހުން ވޯޓުލާން ރެޖިސްޓްރީ ވުމުންނެވެ. ހަބީބު ވިދާޅުވީ، މިހާތަނަށް އެ އަދަދު ހަމަވެފައި ވަނީ އެ ހަތަރު ގައުމުގައި ކަމަށެވެ.
ނަމަވެސް ސިންގަޕޫރާއި، ތައިލެންޑް، އަބޫދާބީ އަދި ޖަޕާނުގައި ވެސް ކޮންމެވެސް ވަރަކަށް ދިވެހިން ރަޖިސްޓްރީ ވެފައި ވީނަމަވެސް، ވޯޓު ފޮށި ބަހައްޓާ ވަރަށް އަދަދު ހަމަ ނުވާ ކަމަށެވެ.
"ސިންގަޕޫރަކީ މީގެ ކުރިން ގިނަ އަދަދެއްގެ ދިވެހިން ރަޖިސްޓާ ވާ ގައުމެއް ވޯޓުލާން. މި ފަހަރު ވަރަށް މަދު. ދެން އޮންލައިން ކޮށް ރަޖިސްޓާ ވާ އަދަދު ގިނަ ވެދާނެ ކަމަށް ލަފާ ކުރެވޭ." ހަބީބު ވިދާޅުވިއެވެ.
ވޯޓު ގުނުން ކުރިއައްދަނީ -- ސަންފޮޓޯ/ ނާއިލް ހުސައިން
ރަށްވެހިވެފައިވާ ރަށް ނޫން އެހެން ރަށެއްގައި ވޯޓުލާން ބޭނުންވާ މީހުން ފޯމު ހުށަހަޅައިގެން ރަޖިސްޓާ ވުމުގެ ފުރުސަތު އީސީން ހުޅުވާލާފައިވާއިރު، އޮންލައިންކޮށް ރީރެޖިސްޓާ ވުމަށް ހުޅުވާލި މުއްދަތު އަންނަ ބުދަ ދުވަހުގެ ނިޔަލަށް މިހާރު ވަނީ އިތުރު ކޮށްފައެވެ.
ހަބީބު ވިދާޅުވީ އެ މުއްދަތު އިތުރު ކުރުމާ އެކު ބައެއް ގައުމުތަކުގައި ވޯޓު ފޮށި ބެހެއްޓޭ ވަރަށް މީހުން ރަޖިސްޓާ ވުމުގެ ފުރުސަތު އެބަ އޮތް ކަމަށެވެ. މިއީ، އޮންލައިކޮށް ރީރެޖިސްޓާ ކުރެވޭ ގޮތަށް ކަނޑައެޅި ފުރަތަމަ ފަހަރެވެ. އެގޮތުން، އޮންލައިންކޮށް ރީރެޖިސްޓާ ކުރުމަށް އީސީން ވަނީ ޙާއްސަ ޕޯޓަލެއް ހަދައިފައެވެ.
އީސީން މީގެ ކުރިން ބުނެފައިވާ ގޮތުގައި އެންމެ ފަހުން ބޭއްވި ލޯކަލް ކައުންސިލް އިންތިޚާބުގައި މާލެއަށް ވޯޓުލީ މީހުން މި ފަހަރު އަލުން ރީރެޖިސްޓާ ކުރާކަށް ނުޖެހޭނެއެވެ.
އިއްޔެއާ ހަމައަށް އޮންލައިކޮށް، 10،000 އަށް ވުރެ ގިނަ މީހުން ރީރެޖިސްޓާ ކޮށްފައިވާއިރު އެއީ އެހެން އިންތިޚާބުތަކާ އަޅާ ބަލާއިރު ދަށް އަދަދެކެވެ. އަދި، ރީރެޖިސްޓާ ކުރާނެ ކަމަށް އީސީން ކުރިން ލަފާކޮސްފައި އޮތް، 42،000 މީހުންގެ 42 އިންސައްތައެވެ.
މުޅި ރާއްޖޭގައި ޖުމުލަ 600 ވޯޓު ފޮށި މި އަހަރު ބެހެއްޓުމަށް ނިންމާފައި ވެއެވެ. މި ރިޔާސީ އިންތިޚާބުގައި 280،000 އެއްހާ މީހުން ވޯޓުުމުގެ ހައްގު ލިބިފައިވާ ކަމަށް އީސީން ބުނެފައިވެއެވެ.