ލިޔެކިޔުންތައް ފުރިހަމަ ނުވާ ކަމަށް ބުނެ ޔޫތު މިނިސްޓްރީން، ދީނީ ހޭލުންތެރިކަން އިތުރު ކުރަމުންދާ ޖަމިއްޔާއެއް ކަމަށްވާ ސަލަފް އުވާލަން ނިންމާފައިވަނީ އެ މިނިސްޓްރީން ބަލަން ޖެހޭ ކަންކަން ރަނގަޅަން ނުބަލާ ކަމަށް ސަލަފްއިން ބުނެފިއެވެ.
އެ މިނިސްޓްރީން މިދިޔަ އަންގާރަ ދުވަހު ކުރި އިއުލާނެއްގައި ވަނީ ރާއްޖޭގައި ރަޖިސްޓްރީ ކޮށްގެން ހިންގަމުންދާ ޖަމިއްޔާތަކުގެ ތެރެއިން ލިޔެކިޔުން ފުރިހަމަ ނުކުރާ ޖަމިއްޔާތައް އުވާލަން އިއުލާން ކޮށްފައެވެ.
އެގޮތުން، މި އަހަރުގެ ނިޔަލަށް ވިދިވިދިގެން ދެ އަހަރުގެ އަހަރީ ރިޕޯޓު ހުށަހަޅާފައި ނުވާ، އަދި ހިންގާ ކޮމެޓީ ރަޖިސްޓްރީ ކޮށްފައި ނުވާތީ 1،989 ޖަމިއްޔާއެއް އުވާލަން ލިސްޓު ކޮށްފައިވެއެވެ.
ޔޫތު މިނިސްޓްރީން ބުނީ އެ ޖަމިއްޔާތަކުގެ ތެރެއިން އުވާލުން ހުއްޓުވައިދިނުމަށް އެދި ޖަމިއްޔާތަކާ ބެހޭ ގާނޫނުގެ ދަށުން، އެ ޖަމިއްޔާގެ މެންބަރަކަށް ނުވަތަ މަސްލަހަތު އޮތް ތިންވަނަ ފަރާތަކަށް ޖަމިއްޔާތަކުގެ ރަޖިސްޓްރާރަށް ލިޔުމުން އެކަން ހުށަހެޅުމުގެ ފުރުސަތު އަންނަ ސެޕްޓެމްބަރު މަހުގެ 24 ވަނަ ދުވަހުގެ ނިޔަލަށް ހުޅުވާލާފައިވާ ކަމަށެވެ.
މިކަމާ ގުޅިގެން ސަލަފްއިން ބުނީ މިދިޔަ އަހަރުގެ މެއި މަހުގެ 31 ވަނަ ދުވަހު ޔޫތު މިނިސްޓްރީން ރަޖިސްޓްރީ ކޮށްފައިވާ އެ ޖަމިއްޔާގެ ހިންގާ ކޮމިޓީގެ މުއްދަތު ހަމަ ވަނީ، އަންނަ އަހަރު ކަމަށެވެ.
އަދި، ފާއިތުވި ދެ އަހަރުގެ އަހަރީ ރިޕޯޓާއި އަހަރީ ހިސާބުވެސް ސަލަފްއިން މިނިސްޓްރީއަށް ހުށަހަޅާފައިވާ ކަން ފާހަގަކޮށް ސަލަފްއިން ބުނީ މިނިސްޓްރީން އުވާލަން ލިސްޓު ކޮށްފައިވާ ޖަމިއްޔާތަކުގެ ތެރޭގައި ސަލަފް ރަޖިސްޓާ ކޮށްފައި ވަނީ ބަލަން ޖެހޭ ވަރަށް ނުބަލައި ކަމަށެވެ.
ސަލަފް އަކީ ރާއްޖޭގައި ދީނީ ހޭލުންތެރިކަން އިތުރު ކުރުމަށް މަސައްކަތް ކުރަމުން އަންނަ ޖަމިއްޔާ އެކެވެ. އެ ޖަމިއްޔާގައި ގިނަ އަދަދެއްގެ ދީނީ ޢިލްމުވެރިން ހަރަކާތްތެރި ވާއިރު، ފާއިތުވި އަހަރުތަކުގައި ސަލަފްއިން ދީނީ އެކި ހަރަކާތްތައް ބާއްވައި އިންތިޒާމް ކޮށްފައިވެއެވެ.