ޏ. ފުވައްމުލަކު މަގުތައް ހެދުމުގެ ދެވަނަ ފިޔަވަހީގެ މަސައްކަތްތައް ކުރުމަށް އެމްޓީސީސީއާ ހަވާލުކޮށްފިއެވެ.
ފުވައްމުލަކު މަގުތައް ރަނގަޅު ފެންވަރަކަށް ހެދުމަށް ކުރަމުންދާ މަސައްކަތުގެ ދަށުން، ފުރަތަމަ ފިޔަވަހީގެ މަސައްކަތް ތައްވެސް ކުރިއަށް ގެންދިޔައީ އެމްޓީސީސީންނެވެ. ފުރަތަމަ ފިޔަވަހީގެ މަސައްކަތް އެމްޓީސީސީން 2019 ވަނަ އަހަރު ފެށިއިރު، މި ފިޔަވަހީގެ ދަށުން 34 މަގުގެ މަސައްކަތް މިހާރުވެސް އެކުންފުނިން އަންނަނީ ކުރަމުންނެވެ.
ފުވައްމުލަކު މަގުތައް ހެދުމުގެ މަޝްރޫޢުގެ ދަށުން 34 މަގެއް ހެދުމަށް ވަނީ ހަމަޖެހިފައެވެ. މިއީ ޖުމްލަ 18.2 ކިލޯ މީޓަރެވެ. މި މަޝްރޫޢުގެ 89 އިންސައްތަ މަސައްކަތް ނިމިފައިވާއިރު، މި މަސައްކަތުގެ ދަށުން 20.6 ކިލޯމީޓަރުގެ ފުވައްމުލައް ރިންގް ރޯޑުގެ މަސައްކަތްވެސް ނިމިފައިވާކަމަށް އެމްޓީސީސީން ބުނެއެވެ.
މަގުތައް ހެދުމުގެ އިތުރުން މި ފިޔަވަހީގެ ދަށުން ފެންހިންދާ ނިޒާމެއް ޤާއިމްކުރުމާއ،ި 650 ކޭބަލް ޖަންކްޝަން ބޮކްސްއެއް ވަޅުލުމާއ،ި 13,964 އަކަ މީޓަރުގެ ސަރަޙައްދެއްގައި ޕޭވްމަންޓް ހަދާނެއެވެ. މީގެ އިތުރުން 71,164 އަކަ މީޓަރުގެ ދުއްވާ ސަރަޙައްދުގައި ތާރު އެޅުމާއ،ި 633 މަގުބައްތި ހަރުކުރުމަށް ވަނީ ހަމަޖެހިފައެވެ.
މި މަޝްރޫޢުގެ ޖުމްލަ އަގަކީ 236.30މިލިއަން ރުފިޔާއެވެ. މި 730 ދުވަހުގެ ތެރެގައި ނިންމަން ޖެހެއެވެ.
ވިއްސާރަވުމުގެ ސަބަބުން ފުވައްމުލަކު މަގުތަކުގައި ފެން ބޮޑުވެ ޗަކަ ވަޅުގަނޑުތައް ހެދުމުގެ މައްސަލައަކީ އެ ރަށުގެ ރައްޔިތުންގެ ވަރަށްބޮޑު ކަންބޮޑުވުމެކެވެ.
ފުވައްމުލައް ސިޓީގެ އިތުރުން ސަރުކާރުން އިއްޔެ ވަނީ ހަތަރު ރަށެއްގެ އުމްރާނީ ތަރައްޤީގެ އެކި މަޝްރޫޢުތައް ކުރިއަށްގެންދިއުމަށް އެމްޓީސީސީއާ ހަވާލުކޮށްފައެވެ.
އދ. މަހިބަދޫ ބިން ހިއްކުން
އެ މަސައްކަތަކީ 43.6 މިލިއަން ރުފިޔާގެ މަޝްރޫޢު އެކެވެ. މަހިބަދުއަށް ކުރިމަތިވެފައިވާ ބިމުގެ ދަތިކަން ހައްލުކުރުމަށްޓަކައި ކުރިއަށްގެންދިއުމަށް ހަމަޖެހިފައިވާ މަޝްރޫޢުގެ ދަށުން ހަތް ހެކްޓަރު ހިއްކުމަށް ވަނީ ހަމަޖެހިފައެވެ. މި މަސައްކަތް 240 ދުވަހުގެ ތެރޭގައި ނިންމަން ޖެހެއެވެ.
އއ. އުކުޅަސް ގޮނޑުދޮށް ހިމާޔަތްކުރުން
މި މަޝްރޫޢުގެ ދަށުން އުކުޅަހު ގިރާ ސަރަޙައްދު ހިމާޔަތްކުރުމަށް 650 އަކަ މީޓަރުގެ ބޭރުތޮއްޓެއް ޖެހުމުގެ އިތުރުން، ގޮނޑުދޮށަށް ވެލި އެޅުމާއެކު، 90 އަކަ މީޓަރުގެ ގްރޮއިން ޖަހާނެއެވެ. މިއީ 28 މިލިއަން ރުފިޔާގެ މަސައްކަތެކެވެ. ނިންމަން ޖެހެނީ 180 ދުވަހުގެ ތެރޭގައެވެ.
ދ. މާއެނބޫދޫ ބިން ހިއްކުން
މާއެނބޫދޫ ބިން ހިއްކުމުގެ މަޝްރޫޢުގެ ދަށުން 15 ހެކްޓަރުގެ ބިން ހިއްކުމަށް ހަމަޖެހިފައިވާއިރު، މި މަސައްކަތަށް 80.9 މިލިއަން ރުފިޔާ ޚަރަދުވާނޭކަމަށް ބެލެވޭއިރު، މަސައްކަތް ނިންމުމަށް ދީފައިވަނީ 300 ދުވަހުގެ ތެރޭގައި ނިންމާ ގޮތަށެވެ.
ލ. މާވަށު ބިން ހިއްކުން
މި މަޝްރޫޢުގެ ދަށުން 15 ހެކްޓަރުގެ ބިން ހިއްކުމަށް ވަނީ ހަމަޖެހިފައެވެ. މަސައްކަތް ނިންމުމަށް 240 ދުވަސް ދީފައިވާއިރު، އަގަކީ 66.3 މިލިއަން ރުފިޔާއެވެ.
މި މަސައްކަތްތައް ހަވާލުކުރުމުގެ އެއްބަސްވުމުގައި އެމްޓީސީސީގެ ފަރާތުން ސޮއިކުރީ އެ ކުންފުނީގެ ސީއީއޯ އާދަމް އާޒިމެވެ. ޕްލޭނިން މިނިސްޓްރީގެ ފަރާތުން ސޮއިކުރެއްވ،ީ ޑިރެކްޓަރު ޖެނެރަލ، ފާތުމަތު ޝާނާ ފާރޫޤެވެ.