އެންމެ ފުރަތަމަ އިސްކަންދެއްވާނީ އާބާދީއާ އެކަށީގެންވާ މިންވަރަށް މަސައްކަތްތައް ކުރިއަށް ގެންދިއުމަށް ކަމަށާއި އެއަށް ފަހު ވ. ރަކީދޫގެ ރައްޔިތުން އެދުނު ފަދައިން ތަރައްގީގެ އެންމެ ބޮޑެތި މަޝްރޫތައް އެ ރަށުގައި ވެސް ކުރިއަށް ގެންދާނެ ކަމަށް ވިދާޅުވެ ރަކީދޫގެ ރައްޔިތުންނަށް ރައީސް ބޮޑެތި މަޝްރޫތަކާ މެދު އުންމީދެއް ދެއްވައިފިއެވެ.
މ. އަތޮޅަށް ކުރެއްވި ކެމްޕޭން ދަތުރުފުޅު ނިންމަވައިލެއްވުމަށް ފަހު ވ. އަތޮޅަށް ކުރައްވައި ދަތުރުފުޅުގައި އެންމެ ފުރަތަމަ ވަޑައިގަތީ މި އަތޮޅު ރަކީދޫއަށެވެ.
ރާއްޖޭގައި އޮތް އެންމެ އާބާދީ މަދު އަތޮޅަކީ ވ. އަތޮޅުކަން ފާހަގަކުރައްވަމުން ރަށުގެ ރައްޔިތުންނާ މުޚާތަބުކުރައްވައި، ރައީސް ވިދާޅުވީ އާބާދީ ކުޑަ ނުވަތަ ބޮޑު ނަމަވެސް ރައްޔިތުންނަށް ފޯރުކޮށްދޭންޖެހޭ އަސާސީ ޚިދުމަތްތައް ފޯރުކޮށްދޭންޖެހޭނީ ހަމަހަަމަ ކަމާއެކު ކަމަށެވެ.
"އެހެންނަމަވެސް ރަކީދޫގައި އުޅެނީ ދިވެހި ރައްޔިތުން،" ރައީސް ވިދާޅުވިއެވެ.
ރައީސް ޞާލިހު ވ. ރަކީދޫއަށް ވަޑައިގަތުން -- ފޮޓޯ/ އެމްޑީޕީ ކެމްޕޭން ޓީމް
މި ދައުރުގެ ޖަޒީރާ ރާއްޖޭގެ މެނިފެސްޓޯގެ ބޭނުމަކީ އެއީ ކަމަށް އެ މަނިކުފާނު ވިދާޅުވާ ވާހަކަފުޅު ތަކުރާރުކުރެއްވިއެވެ.
ރަށުގެ ރައްޔިތުން އެދުނީ ރައީސްގެ ފަރާތުން އެދުނު ކަންކަން:
- ރަށުގެ ބިން ހިއްކުން
- ޓޫރިޒަމަށް ރަށް ފަހިކޮށްދިނުން
- ރަށުގައި ހުރެގެން ތައުލީމް ހާސިލްވާނެ މަގުފަހިކޮށްދިނުން
ރަކީދޫއަށް ރައީސްގެ ވައުދުފުޅުތައް
- ރަށުގައި ފުޓްސަލް ދަނޑެއް އަަޅައިދެއްވާނެކަމަށް
- އާރްޓީއެލް ފެރީގެ ނިޒާމުން ވ. އަތޮޅު ގުޅައިލާނެ ކަމަށް
- ރަކީދޫ ގިރާ ސަަރަހައްދުން ހިމާޔަތްކުރި ހިސާބަށް ގެންނަންޖެހޭ ބަދަލުތައް ގެންނާނެކަމަށް
- ރަކީދޫ ބަނދަރަށް ވެސް ގެންނަންޖެހޭ އިތުރު ބަދަލުތައް ގެންނާނެކަމަށް
އެ ކަންކަމަށް އަލިއަޅުއްވައިލައްވައި ރައީސް ވިދާޅުވީ، ސަރުކާރުން މިހާރު ކުރަން ނިންމި ކަންކަމަށް ފަހު ރަށަށް ހިޖުރަކުރާ މީހުންގެ އަދަދު ބެލުމަށްފަހު އިތުރު މަޝްރޫތައް ކުރިއަށް ގެންދަވާނެކަމަށެވެ.
"... ދެނެގަތުމަށްފަހު އެއީ ކުރަން ޖެހޭ ކަމެއްކަމަށް އަޅުގަނޑުމެން އެންމެނަށް ގަބޫލުކުރެވޭ ހިސާބަށް ދިޔައިމަ އިރާދަކުރެއްވިއްޔާ އެއީ ނުކުރަންވީ ކަމެއްނޫން،" ރައީސް ވިދާޅުވިއެވެ.
ރައީސްގެ ވާހަކަފުޅުގެ ކުރިން ޖަލްސާގައި ވާހަކަދައްކަވަމުން މި ދާއިރާގެ މެމްބަރު ހުސައިން ގާސިމް (ގާބެ) ވިދާޅުވީ އޭނާ މަޖިލިސް މެމްބަރުކަމާ ހަވާލުވީއްސުރެ ކުރެވޭތޯ މަސައްކަތްކުރާ އެންމެ މުހިންމު ކަމަކީ ރަށުގެ ސްކޫލު ހުޅުވުންކަމަށެވެ. 2007ވަނަ އަހަރު ކޮންމެ ވެސް ސަބަބަކާ ހެދި ރަށުގެ ސްކޫލު ބަންދުކުރިއިރު މިއަދާ ހަމައަަށް ވެސް ރަށުގައި ތައުލީމް ހާސިލްކުރެވޭނެ ގޮތެއް ނެތް ކަމަށް އޭނާ ވިދާޅުވިއެވެ.
ކެޔޮދޫ ދާއިރާގެ މެމްބަރު ހުސައިން ގާސިމް (ގާބެ) ރަކީދޫގައި ވާހަކަދައްކަވަނީ -- ފޮޓޯ/ އެމްޑީޕީ ކެމްޕޭން ޓީމް
އެހެންވެ، ރަށުގައި ދިރިއުޅޭ ކުދިން ކިޔަވައި އުމުރަށް ދިއުމުން ރަށުން ފައިބަން މަޖުބޫރުވާކަމަށް ގާސިމް ވިދާޅުވިއެވެ. އެއީ ރަށުގެ އާބާދީ މަދުވަމުން އަންނަ ސަބަބުކަމަށް އޭނާ ވިދާޅުވިއެވެ. މެމްބަރު އެދިލެއްވީީ ރަކީދޫގެ ސްކޫލު މަސައްކަތް އަވަހަށް ނިމޭނެ ގޮތް ހައްދަވައިދެއްވުމަށެވެ.
އެ ކަމަށް އަލިއަޅުއްވައިލައްވައި އާބާދީ މަދު ރަކީދޫގައި ހުންނަވައި، އެ މަނިކުފާނު ވިދާޅުވީ ރަށުގައި އާބާދީ ހިފެހެއްޓުމަށް ޓަކައި ކުރުން އެންމެ މުހިންމު ކަމަކީ ރަށުގައި ތައުލީމުގެ ފުރުސަތު އޮތުންކަމަށެވެ.
ސްކޫލު އިމާރާތް ތަރައްގީކޮށް، ރަށުން ޓީޗަރުން ހޯދަން ކުރި މަސައްކަތުގައި ރަށުން ޓީޗަރުން ނުލިބުމުން މިހާރު ކުރަމުން އަންނަނީ ރަށުން ބޭރުން ޓީޗަރުން ހޯދުމުގެ މަސައްކަތްކަމަށް ރައީސް ވިދާޅުވިއެވެ.
އަދި ކުރިއަށް އޮތްތަނުގައި ސެޓެލައިޓް ސްކޫލުގެ ޚިދުމަތް ރަށުގައި ފެށޭނެކަމަށް ރައީސް ވިދާޅުވިއެވެ.