ރެއާލް މެޑްރިޑްގެ ކޯޗު ކާލޯ އެންޗެލޮޓީ ޓެކުހަށް މަކަރު ހެދުމުގެ ތުހުމަތުގައި ސްޕެއިންގެ ކޯޓަކަށް ހާޒިރުވުމަށް އަންގާފައިވާ ކަމަށް ރިޕޯޓުކޮށްފިއެވެ.
ރިޕޯޓުތައް ބުނާގޮތުގައި އެންޗެލޮޓީ ޓެކުހަށް މަކަރު ހަދާފައިވާ ކަމަށް ތުހުމަތުކުރަނީ އޭނާ 2014 ވަނަ އަހަރު ރެއާލްގެ ކޯޗުކަމާ ހަވާލުވި އިރު، އާމްދަނީގެ ބައެއް ހިސާބުތައް އޮޅުވާލާފައިވާތީއެވެ. އަދި އެ މައްސަލައިގައި މިހާރު ކޯޓުގެ ޝަރީއަތަކަށް ހާޒިރުވުމަށް އެންޗެލޮޓީއަށް އަންގާފައިވާ ކަމަށް ރިޕޯޓުތައް ބުނެއެވެ.
ސްޕެއިންގެ ކްލަބުތަކަކަށް ކުޅުނު ބައެއް ތަރިންތަކަކަށް ވެސް މީގެ ކުރިން އެފަދަ މައްސަލަތަކާ ކުރިމަތިލާން ޖެހުނެވެ. އެގޮތުން ރާއްލް މެޑްރިޑަށް ކުޅުނު ދުވަސްވަރު 2011 އިން 2014 އަށް ޓެކުހަށް މަކަރު ހަދާފައިވާކަން ޕޯޗުގަލް ތަރި ކްރިސްޓިއާނޯ ރޮނާލްޑޯއަށް ސާބިތުވިއެވެ.
އޭގެ އިތުރުން ބާސެލޯނާއަށް ކުޅުނު ދުވަސްވަރު 2007 އިން 2009 އަށް އާޖެންޓީނާ ތަރި ލިއޮނެލް މެސީ ޓެކުހަށް މަކަރު ހެދިކަން ކަށަވަރުވި އިރު، އޭނާއާއެކު ބާސާއަށް ކުޅުނު ޖެރާޑް ފީކޭގެ މައްޗަށް ވެސް މީގެ ކުރިން ކުށް ސާބިތުވިއެވެ.
އުމުރުން 64 އަހަރުގެ އެންޗެލޮޓީ ވަނީ ދެ ފަހަރެއްގެ މަތިން ރެއާލާ ހަވާލުވެފައެވެ. އެގޮތުން 2013 އިން 2015 އަށް އިރުޝާދު ދިނުމަށްފަހު، ދެން އޭނާ ރެއާލާ ހަވާލުވީ 2021 ވަނަ އަހަރުއެވެ. ރެއާލާއެކު އެންޗެލޮޓީ ހަދާފައިވާ ކޮންޓްރެކްޓް އަންނަ އަހަރު ނިމުމަކަށް އައުމުން ދެން އޭނާ ފެނިގެންދާނީ ބްރެޒިލް ގައުމީ ޓީމުގެ ކޯޗުކަމުގެ މަގާމުންނެވެ.