ކްރިސްޓޮފް ގަލްޓިއޭގެ ބަދަލުގައި ސްޕެއިން ކޯޗު ލުއިސް އެންރީކޭ، ޕެރިސް ސެއިންޓް ޖާމައިން (ޕީއެސްޖީ)އާ ހަވާލުވާން ނިންމާފައިވާ ކަމަށް ރިޕޯޓުކޮށްފިއެވެ.
ރިޕޯޓުތައް ބުނާގޮތުގައި އެންރީކޭ ވަނީ އެނބުރި ކޯޗުކަމަށް އައިސް، ޕީއެސްޖީއާ ހަވާލުވާން ނިންމައި، އެ ކްލަބާއެކު އެއްބަސްވުމަށް އައިސްފައެވެ. އަދި މިހާރު ޕީއެސްޖީގެ ސްކޮޑަށް ގެންނަ ބަދަލުތަކާ ގުޅޭ މަސައްކަތްތައް އޭނާ ފަށާފައިވާ ކަމަށް ވެސް ރިޕޯޓުތައް ބުނެއެވެ.
މީގެ ކުރިން ބާސެލޯނާއަށް ޔޫއެފާ ޗެމްޕިއަންސް ލީގާއި ސްޕެނިޝް ލަލީގާ ކާމިޔާބުކޮށްދީފައިވާ އެންރީކޭ އެންމެ ފަހުން ހުރީ ސްޕެއިން ގައުމީ ޓީމުގެ ކޯޗަކަށެވެ. ނަމަވެސް ވޯލްޑް ކަޕް 2022 ގައި ސްޕެއިނަށް ލިބުނު ނާކާމިޔާބާ ގުޅިގެން އޭނާ ވަނީ ސްޕެއިންގެ ކޯޗުކަމުގެ މަގާމުން ވަކިވެފައެވެ. އޭގެ ފަހުން އެންރީކޭ ހޯދުމަށް އިނގިރޭސި ޕްރިމިއާ ލީގުގެ ކްލަބުތަކަކުން ވެސް މަސައްކަތްކުރިއެވެ.
ޕީއެސްޖީގެ ކޯޗަކަށް ހުރި ގަލްޓިއޭ -- ފޮޓޯ/ ގެޓީ
ދާދި ފަހުން ޕީއެސްޖީން ވަނީ އެ ކްލަބުގެ ކޯޗުކަމުން ގަލްޓިއޭ ވަކިކޮށްފައިވާކަން ރަސްމީކޮށް އިއުލާންކޮށްފައެވެ. ޕީއެސްޖީގެ ކޯޗުކަމުގައި ގަލްޓިއޭ ހޭދަކުރި އެއް ސީޒަނުގެ ތެރޭގައި އޭނާ ވަނީ ފްރާންސް ލީގު ކާމިޔާބުކޮށްދީފައެވެ. ނަމަވެސް ވަރުގަދަ ސްކޮޑަކާއެކު އޭނާއަށް ޔޫއެފާ ޗެމްޕިއަންްސް ލީގު ކާމިޔާބުކޮށްދެވިފައި ނުވުމުން، ގިނަ ފާޑުކިޔުންތަކަކާ ކުރިމަތިލާން ޖެހުނެވެ.
މިއަހަރުގެ ތެރޭގައި ގަލްޓިއޭއަށް ވަނީ ބޮޑެތި ތުހުމަތުތަކެއް ވެސް ކޮށްފައެވެ. އެއީ އޭނާ ނީސްގެ ކޯޗުކަމުގެ މަގާމުގައި ހުރި އިރު، ކުޅުންތެރިންނަށް ފުރައްސާރަކޮށް، ތަފާތުކުރުންތައް ގެންގުޅުމުގެ ތުހުމަތުތަކެކެވެ. އެ މައްސަލަ ފްރާންސްގެ ފުލުހުން މިހާރު ތަހުގީގުކުރަމުންދާ އިރު، އޭނާގެ މައްޗަށް ކޯޓުގައި ކުށް ސާބިތުވެއްޖެ ނަަމަ، ތިން އަހަރުގެ ޖަލު ހުކުމެއް އަންނާނެއެވެ.