ސާފް ޗެމްޕިއަންޝިޕްގެ ގްރޫޕު ސްޓޭޖުގައި ރާއްޖެ ކުޅުނު ފަހު މެޗުގައި ލުބުނާން އަތުން ބަލިވެއްޖެއެވެ.
އިންޑިއާގެ ބެންގަލޫރުގެ ސްރީ ކަންތީރަވާ ސްޓޭޑިއަމްގައި މިއަދު ހަވީރު ކުޅުނު "ގްރޫޕު ބީ"ގެ މެޗުގައި ލުބުނާން އަތުން ރާއްޖެ ބަލިވީ 1-0 ގެ ނަތީޖާއަކުންނެވެ. އެ ނަތީޖާއާއެކު ލުބުނާނަށް ވަނީ ގްރޫޕުގެ އެއްވަނައިގެ ގޮތުގައި ސެމީ ފައިނަލުގެ ޖާގައެއް ޔަގީންވެފައެވެ.
ލުބުނާނާ ދެކޮޅަށް ނުކުތް އިރުވެސް ސެމީ ފައިނަލުގެ ޖާގައެއް ހޯދުމަށް ރާއްޖެއަށް އޮތީ ހަނީ ފުރުސަތެކެވެ. ރާއްޖެއަށް އޮތީ ލުބުނާން ބަލިކޮށް، ނުވަތަ އެއްވަރުކޮށްލައިގެން ވެސް މިރޭ ބަންގުލަދޭޝް އާއި ބޫޓާން ބައްދަލުކުރާ މެޗުން ނުކުންނަ ނަތީޖާއަކަށް އިންތިޒާރުކުރުމެކެވެ. ލުބުނާން އަތުން ބަލިވިޔަސް، ބޫޓާނަށް ބަރޯސާވެގެން ވަރަށް ހަނި ފުރުސަތެއް ރާއްޖެއަށް އޮންނާނެއެވެ. ރާއްޖެއަށް ފުރުސަތު އޮންނާނީ ބޫޓާނުން ބަންގުލަދޭޝް ކޮޅަށް ގިނަ ގޯލު ޖަހައިގެންނެވެ.
އެ މެޗަށް ނުކުތް އިރު، ލުބުނާނަށް އޮތީ ސެމީގެ ފުރުސަތު ބޮޑުކޮށެވެ. އެޓީމުން ބަންގުލަދޭޝް އަދި ބޫޓާނާ ދެކޮޅަށް ކުޅުނު މެޗުން ވެސް މޮޅުތަކެއް ހޯދާފައިވުމުން، ރާއްޖެ މެޗު އެއްވަރުކޮށްލައިގެން ވެސް ސެމީގެ ޖާގައެއް ޔަގީންކުރެވެން އޮތެވެ. އަދި ގޯލުގެ ތަފާތުން ވެސް އެޓީމު އޮތީ ވަރަށް ކުރީގައެވެ.
ސާފް ޗެމްޕިއަންޝިޕް 2023 ގައި ރާއްޖެ އާއި ލުބުނާން ބައްދަލުކުރި މެޗުގެ ތެރެއިން -- ސަން ފޮޓޯ/ އަބްދުﷲ އަބީދު
ރާއްޖެއަށް މުބާރާތުގައި އުނދަގޫތަކެއް ކުރިމަތިލާން ޖެހުނީ އެންމެ ފަހުން ބަންގުލަދޭޝްއާ ދެކޮޅަށް ކުޅުނު މެޗުން ބަލިވުމުންނެވެ. އޭގެ ކުރިން ބޫޓާންއާ ދެކޮޅަށް ކުޅުނު މެޗުން ރާއްޖެ ވަނީ މޮޅުވެފައެވެ. ފަހު މެޗުތަކަށް ނުކުތް އިރު، ރާއްޖެ އަދި ބަންގުލަދޭޝްއަށް ވެސް، ކޮންމެ ޓީމަކަށް ދެ މެޗުން ލިބިފައިވަނީ ތިން ޕޮއިންޓެވެ.
މިއަދު ހަވީރު ކުޅުނު މެޗުގެ ކުރީކޮޅުގައި ލުބުނާނުން އެޓޭކުކުރުމަށް ގިނަ މަސައްކަތްތަކެއް ކުރަމުންދިޔަ ނަމަވެސް، ރާއްޖޭގެ ޑިފެންސް ފެނުނީ ވަރަށް ވަރުގަދަކޮށެވެ. ހާއްސަކޮށް ރާއްޖޭގެ ގިނަ ކުޅުންތެރިންތަކެއް ފަހަތަށް ފައިބައިގެން ކުޅެމުންދިއުމާ ގުޅިގެން ލުބުނާނަށް ފުރުސަތުތައް ތަނަވަސްކުރުމަށް އުނދަގޫތަކަކާ ކުރިމަތިލާން ޖެހުނެވެ.
ލުބުނާނުން އެޓޭކުގައި ނުރައްކާކޮށް ފެނުނު ނަމަވެސް، ފުރަތަމަ ހަމަލާ އުފައްދާފައިވަނީ ރާއްޖެއިންނެވެ. މެޗުގެ ދިހަވަނަ މިނެޓުގައި ޕެނަލްޓީ އޭރިއާ ބޭރުން ރާއްޖޭގެ އިބްރާހިމް އައިހަމް ފޮނުވާލި އެ ހަމަލާ ދިޔައީ ލުބުނާންް ގޯލުގެ ހުރަސް ދަނޑިމަތިން ބޭރަށެވެ. އޭގެ އަށް މިނެޓު ފަހުން ވެސް ރާއްޖޭގެ ހަމަލާއެއް ފެނިގެންދިޔަ އިރު، ހައިޝަމް ހަސަން (ބިޑި) ފޮނުވާލި ހަމަލާ ލުބުނާންގެ ގޯލާ އަމާޒުވެފައެއް ނުވެއެވެ.
ސާފް ޗެމްޕިއަންޝިޕް 2023 ގައި ރާއްޖެ އާއި ލުބުނާން ބައްދަލުކުރި މެޗުގެ ތެރެއިން -- ސަން ފޮޓޯ/ އަބްދުﷲ އަބީދު
މެޗުގެ 24 ވަނަ މިނެޓުގައި ލުބުނާނުން ވަނީ ގޯލެއް ޖަހައި ލީޑު ހޯދައިފައެވެ. ޕެނަލްޓީ އޭރިއާ ކައިރިން ލިބުނު ހިލޭ ޖެހުމަކުން ލުބުނާނަށް އެ ގޯލު ކާމިޔާބުކޮށްދިނީ އެޓީމުގެ ރެކޯޑު ގޯލު ޖެހުންތެރިޔާ އަދި ކެޕްޓަން ހަސަން މާތޫކެވެ. އެއީ މި މުބާރާތުގައި އޭނާ ޖެހި ދެވަނަ ގޯލެވެ.
އޭގެ ފަހުން ވެސް ލުބުނާނަށް ކައިރިކައިރީގައި ގޯލު ޖަހާނެ ފުރުސަތުތަކެއް ލިބިގެންދިޔައެވެ. އެގޮތުން ޕެނަލްޓީ އޭރިއާ ތެރޭ ވަރަށް ހުސްކޮށް ހުރެ، ލުބުނާންގެ މުހައްމަދު ސަޑެކް ފޮނުވާލި ހަމަލާ ރާއްޖޭގެ ގޯލުގެ ހުރަސް ދަނޑިމަތިން ބޭރަށް ދިޔަ އިރު، ކެޕްޓަން ހަސަން މާތޫކު ފޮނުވާލި ހަމަލާގެ ހުރަހަކަށްވީ ރާއްޖޭގެ ކީޕަރު ހުސައިން ޝަރީފެވެ. މެޗުގެ ފުރަތަމަ ހާފު ނިމިގެންދިޔައީ 1-0 ގެ ނަތީޖާއަކުން ލުބުނާން ކުރީގައި އޮވެގެންނެވެ.
ސާފް ޗެމްޕިއަންޝިޕް 2023 ގައި ރާއްޖެ އާއި ލުބުނާން ބައްދަލުކުރި މެޗުގެ ތެރެއިން -- ސަން ފޮޓޯ/ އަބްދުﷲ އަބީދު
ދެވަނަ ހާފުގެ ކުރީކޮޅުގައި ލުބުނާނަށް ގޯލު ޖަހާނެ ރަނގަޅު ދެ ފުރުސަތެއް ލިބިގެންދިޔައެވެ. ޕެނަލްޓީ އޭރިއާ ތެރޭ ހުރެ، ލުބުނާން ކެޕްޓަން ހަސަން މާތޫކް ބޮލުން ފޮނުވާލި ހަމަލާ ރާއްޖޭގެ ގޯލުގެ ހުރަސް ދަނޑިމަތިން ބޭރަށް ދިޔަ އިރު، ޕެނަލްޓީ އޭރިއާ ތެރެއިން ޖޯޖް ފީލިކްސް މެލްކީ ފޮނުވާލި ހަމަލާ ރާއްޖޭގެ ގޯލްކީޕަރު ހުސައިން ޝަރީފް ވަނީ ހުޝިޔާރުކަމާއެކު މަތަކޮށްފައެވެ.
އޭގެ ފަހުން ރާއްޖެއިން ލުބުނާންގެ ގޯލަށް ނުރައްކާކުރުމަށް މަސައްކަތްކުރި ނަމަވެސް، ލުބުނާންގެ ޑިފެންސް ވަރުގަދަވުމުން ގިނަ ފުރުސަތުތަކެއް ތަނަވަސްކުރެވިފައެއް ނުވެއެވެ. ރާއްޖޭގެ ކުޅުންތެރިން ރީތި ކުޅުމެއް ދެއްކުމަށް ގިނަ މަސައްކަތްތަކެއް ކުރިއެވެ.
ސާފް ޗެމްޕިއަންޝިޕް 2023 ގައި ރާއްޖެ އާއި ލުބުނާން ބައްދަލުކުރި މެޗުގެ ތެރެއިން -- ސަން ފޮޓޯ/ އަބްދުﷲ އަބީދު
މެޗުގެ 76 ވަނަ މިނެޓުގައި ރާއްޖެއަށް ދެ ފުރުސަތެއް ލިބިގެންދިޔައެވެ. ޕެނަލްޓީ އޭރިއާ ބޭރުން ރާއްޖޭގެ ހަމްޒާ މުހައްމަދު (ހަމްޕު) ފޮނުވާލި ހަމަލާއެއް ލުބުނާންގެ ޑިފެންޑަރުން ވަނީ ބްލޮކްކޮށްފައެވެ. އަދި އެ ބޯޅަ، ޕެނަލްޓީ އޭރިއާ ތެރެއިން ލިބުމާއެކު ރާއްޖޭގެ ނާއިޒް ހަސަން (ދާދު) ފޮނުވާލި ހަމަލާ، ލުބުނާންގެ ގޯލާ އަމާޒުވެފައެއް ނުވެއެވެ.
ސާފް ޗެމްޕިއަންޝިޕް "ގްރޫޕު ބީ"ގެ ފަހު މެޗަށް ބަންގުލަދޭޝް އާއި ބޫޓާން ނުކުންނާނީ މިރޭ 7:00 ގައެވެ.