ބ. ދަރަވަންދޫގައި މިއަހަރު އަޟްހާ ޢީދު ފެށުމުގެ ގޮތުން ހަވާ އެރުވުމާއި ޢީދު ހުޅުޖެހުން މިރޭ ބާއްވައިފިއެވެ.
ހަވާ އެރުވުމުގެ ހަރަކާތް ކުރިއަށް ގެންގޮސްފައި ވަނީ ދަރަވަންދޫ ރަސްގެއޮޑި އަތިރިމަތި ސަރަހައްދުގައެވެ. ޢީދު ހުޅުޖެހުމުގެ ހަރަކާތް ކުރިއަށް ގެންގޮސްފައި ވަނީ ދަރަވަންދޫ އިރުމަތީކޮޅު އަތިރިމަތި ސަރަހައްދުގައެވެ.
ހަވާ އެރުވުމާއި ހުޅު ޖެހުމުގެ ހަރަކާތް ބަލާލުމަށް ރަށުގެ ކުދިބޮޑު އެންމެން ކަހަލަ ގޮތަކަށް އެ ސަރަހައްދުތަކަށް ވަނީ އެއްވެފައެވެ. އޭގެ އިތުރުން ޢީދުގައި ބައިވެރިވުމަށް ދަރަވަންދުއަށް ޒިޔާރާތް ކޮށްފައިވާ ގިނަ އަދަދެއްގެ ފަރާތްތަކުން ވެސް މި ހަރަކާތް ބަލާލުމަށް ދިޔައެވެ.
ޢީދު ހުޅުޖެހުމުގެ ހަރަކާތަކީ ރާއްޖޭގެ އެކި ރަށްރަށުގައި ތަފާތު ގޮތްގޮތަށް ކުރަމުން އަންނަ ކަމެކެވެ. އެކި ރަށްރަށުގައި މި ހަރަކާތަށް ތަފާތު ނަންނަން ވެސް ކިޔައި އުޅެއެވެ.
ބ. ދަރަވަންދޫ ޢީދު ކުޅިވަރުތައް ފެށުމަށް ބޭއްވި ހަވާ އެރުވުމުގެ ހަރަކާތް— ސަން ފޮޓޯ
ޢީދު ހުޅު ޖެހުމުގެ ހަރަކާތް ކުރިއަށް ގެންގޮސްފައި ވަނީ ދަރަވަންދޫގެ ކްލަބް ޖަމިއްޔާއެއް ކަމަށްވާ ހަރަހެރި ޖަމިއްޔާއިންނެވެ. އެ ޖަމިއްޔާއިން ބުނި ގޮތުގައި އެހެން އަހަރުތަކާ ޚިލާފަށް މިއަހަރުގެ ޢީދު ހުޅުޖެހުން ކުރިއަށް ގެންދިޔައީ ވަރަށް ފުރިހަމައަށެވެ. އެގޮތުން މިއަހަރު މި ހަރަކާތް ކުރިއަށްވުރެ ބޮޑުކޮށް ވަނީ ބާއްވާފައެވެ.
ދަރަވަންދޫގައި ޢީދުގެ ހަރަކާތްތައް ޢީދު ނަމާދަށް ފަހު މާދަން ހެނދުނު ފަށާނެއެވެ. އެގޮތުން ޢީދު ސަޔަށް ފަހު ފެންކުޅީގެ ހަރަކާތްތައް އޮންނާނެއެވެ. އެއަށްފަހު ބިދަބިން ބޮޑުބެރު ގްރޫޕުގެ ސަގާފީ ހަރަކާތްތައް ހަވީރު ބާއްވާއިރު ރޭގަނޑު ބޮޑު ޢީދުގެ ޝޯ އޮންނާނެއެވެ.
އެއަށް ފަހު، ބުރާސްފަތި ދުވަހުން ހޮނިހިރު ދުވަހަށް ވެސް ޢީދުގެ މުނާސަބަތުގައި ކުރިއަށް ގެންދާ ސަގާފީ ކުޅިވަރުތަކާއި، ވާދައިގެ މުބާރާތްތައް އޮންނާނެއެވެ. އެގޮތުން އަންހެނުންނާއި ކުޑަކުދިންގެ މާލި، މަސް ރޭސް، ތުވާލި ބޯޅަ އަދި ވާދެމުގެ ހަރަކާތްތައް ބާއްވާނެއެވެ.
ދަރަވަންދޫގެ ފޯރިގަދަ ޢީދުގެ ހަރަކާތްތައް އެސްއެސްޓީވީ މެދުވެރިކޮށް ލައިވްކޮށް ގެނެސްދެވޭނެއެވެ. އަދި ޢީދުގެ އެންމެ ފަހުގެ މައުލޫމާތުތައް ސަން އޮންލައިން މެދުވެރިކޮށް ގެނެސްދޭނެއެވެ.