ރެއާލް މެޑްރިޑަށް އިރުޝާދުދެމުންދާ ކާލޯ އެންޗެލޮޓީއަކީ ބްރެޒިލް ގައުމީ ޓީމަށް ވަރަށް އެކަށީގެންވާ ކޯޗެއް ކަމަށް ބްރެޒިލް ތަރި ނޭމާ ބުނެފިއެވެ.
ބްރެޒިލް ގައުމީ ޓީމުގެ ކޯޗަކަށް އެންޗެލޮޓީ ގެންދިއުމަށް ބްރެޒިލް ފުޓުބޯޅަ ފެޑެރޭޝަނުން ގިނަ މަސައްކަތްތަކެއް ކުރަމުންދިޔަ ނަމަވެސް، އަންނަ އަހަރު ރެއާލްގެ ކޮންޓްރެކްޓް ނިމުމަކަށް އަންނަންދެން އެ ކްލަބުގައި މަޑުކުރާނެ ކަަމަށް އެންޗެލޮޓީ ވަނީ ބުނެފައެވެ. ނަމަވެސް އޭނާގެ ކޮންޓްރެކްޓް ނިމުމަކަށް އައުމުން ބްރެޒިލްގެ ކޯޗުކަމާ ހަވާލުވާނެ ކަމަށް ބެލެވެއެވެ.
ޕެރިސް ސެއިންޓް ޖާމައިން (ޕީއެސްޖީ)ގެ ބްރެޒިލް ތަރި ނޭމާ ވެސް ވަނީ އެންޗެލޮޓީއާ ގުޅޭގޮތުން ވާހަކަދައްކައިފައެވެ. އޭނާ ދެކޭގޮތުގައި އެންޗެލޮޓީގެ ފަރާތުން ބްރެޒިލަށް ގިނަ ކަންތައްތަކެއް ދަސްވެގެންދާނެއެވެ.
"އަހަރެމެންނަށް ބިދޭސީ ކޯޗެއް ގެނައުމުގެ ފުރުސަތު އޮންނާނެ. އެންޗެލޮޓީއަކީ ހުރިހާ ކާމިޔާބެއް ހޯދާފައިވާ ކޯޗެއް. އޭނާގެ ފަރާތުން ވަރަށް ގިނަ ކަންތައްތަކެއް އަހަރެމެންނަށް ދަސްވާނެކަން ޔަގީން،" ނޭމާ ދިން އިންޓަވިއުއެއްގައި ބުންޏެވެ.
އަންނަ ސީޒަނަށްފަހު އެންޗެލޮޓީގެ ބަދަލުގައި ކޯޗެއް ހޯދުމުގެ މަސައްކަތް ރެއާލުން ދަނީ ކުރަމުންނެވެ. ރެއާލުން އެ މަގާމަށް ގެންދަން ބޭނުންވަނީ އެ ކްލަބަށް ކުރިން ކުޅުނު އަދި މިހާރު ބަޔާން ލެވަކޫސަނަށް އިރުޝާދުދެމުންދާ ޒަބީ އަލޮންސޯއެވެ. ލެވަކޫސަންއާއެކު އަލޮންސޯ ހަދާފައިވާ ކޮންޓްރެކްޓް ވެސް ނިމުމަކަށް އަންނާނީ އަންނަ އަހަރުއެވެ.
ވޯލްޑް ކަޕް 2022 އަށްފަހު ބްރެޒިލް ގައުމީ ޓީމުގެ ހެޑް ކޯޗުގެ މަގާމުން ޓިޓޭ އިސްތިއުފާދިނުމަށްފަހު އެ މަގާމަށް އަދިވެސް ކޯޗަކު އައްޔަންކޮށްފައެއް ނުވެއެވެ. މިހާރު ވަގުތީގޮތުން ޓީމާ ހަވާލުވެ ހުރީ ބްރެޒިލްގެ 20 އަހަރުން ދަށުގެ ގައުމީ ޓީމުގެ ކޯޗެއްގެ ގޮތުގައި ވެސް މަސައްކަތްކުރާ ރަމޯން މެނެޒޭސްއެވެ.