މި އަހަރުގެ އަޟްހާ އީދު ކުލަގަދަކޮށް ފާހަގަކުރަން އައްޑޫ ސިޓީ ކައުންސިލުން ކުރިއަށް ގެންދަން ނިންމާފައިވާ "އައްޑޫ އީދި ސަމާ"ގައި އިންޑިއާގެ ލަވަކިޔުންތެރިޔާ މުހައްމަދު ފާއިޒް ބައިވެރިވާން ނިންމައިފިއެވެ.
"ސުޕަސްޓާ ސިންގާ 2" ކާމިޔާބުކުރި އިންޑިއާގެ ކުޅަދާނަ ލަވަ ކިޔުންތެރިޔާ ފާއިޒްއާއެކު ދިވެހި ގިނަ ފަންނާނުންތަކެއް ވެސް އައްޑޫ އީދި ސަމާގައި ބައިވެރިވާނެއެވެ.
އައްޑޫ ސިޓީ ކައުންސިލްގެ ޕަބްލިކް ރިލޭޝަންސް އޮފިސަރު ޝިމާން ހާދީ ރޭ "ސަން"އަށް ވިދާޅުވީ މި އަހަރުގެ އީދު އައްޑޫގެ ހުރިހާ ރަށެއްގައި ވެސް ވަރަށް ކުލަގަދަކޮށް ފާހަގަކުރާނެ ކަމަށެެވެ.
އީދު ކުޅިވަރު ފެށުމަށް، ވިލޭރޭ އީދު ބަޑި އެއްލުން ހިތަދޫގައި ރަސްމީކޮށް އޮންނާނެކަމަށް އޭނާ ވިދާޅުވިއެވެ. އަދި އައްޑޫގެ އެހެން ރަށްތަކުގައި ވެސް އެ ހަރަކާތް ކުރިއަށް ގެންދާނެ ކަމަށް ވިދާޅުވިއެވެ.
އަދި އީދު ދުވަހު ހުރިހާ ރަށެއްގައި ވެސް ބޮޑު ޖަމާއަތުގައި އީދު ނަމާދުކުރުުމާއި އީދު ސައި އޮންނާނެކަމަށް ސިމާން ވިދާޅުވިއެވެ. އަދި ހުރިހާ އަވަށެއްގައި އުޟްހިއްޔާ ކަތިލުމުގެ ހަަރަކާތް ވެސް ކުރިއަށް ދާނެ ކަމަށް ވިދާޅުވިއެވެ.
"އޭގެ އިތުރުން ބޮޑު މަސް ބޭނުމުގެ ހަރަކާތަކާއި މަސް ރޭހަކާއި ކުޑަކުދިންގެ އާއިލީ ހަވީރަކާ އައްޑޫގެ ހަ އަވަށުގައި ހަ ކުޅިވަރު މުބާރާތް އޮންނާނެ. އޭގެ ތެރޭގައި ބައިބަލާ، ވާ ދެމުން، މިކްސް ވޮލީ، ފުޓްސަލް، ޓެކްބޯލް އަދި ޑޮޖްބޯލް މުބާރާތެއް ބޭއްވޭނެ،" ސިމާން ވިދާޅުވިއެވެ.
މީގެ އިތުރުން، ރާއްޖޭގައި މިހާތަނަށް އަތޮޅުތެރޭގައި ބޭއްވޭ ފަންނާނުންގެ އެންމެ ބޮޑު ޝޯ އައްޑޫގައި މި އީދުގައި އޮންނާނެކަމަށް ސިމާން ވިދާޅުވިއެވެ.
ޖުލައި މަހުގެ އެއްވަނަ ދުވަހުގެ ރޭ ހިތަދޫ ސްޓޭޖް ސަރަހައްދުގައި އޮންނަ މި ޝޯ ނިންމައިލުމުގެ ގޮތުން ހަވާ ވެސް އަރުވާނެއެވެ.
"ފަންނާނުންގެ އިތުރުން ފަޔާ ސްޓޯމް ނަމަކަށް ކިޔާ ފަޔާ ޑާންސް ޓީމެއްގެ އަލިފާނުގެ ކުޅިވަރުތަކެއް ވެސް ފެންނާނެ،" ސިމާން ވިދާޅުވިއެވެ.
މިދިޔަ އަހަރު އައްޑޫގައި އަލިފާނުގެ ހަރަކާތް ކުރިއަށް ގެންދަނީ --
މުޅި އީދު ސަމާ ކުރިއަށް ގެންދެވެނީ އައްޑޫގެ ޖަމިއްޔާތަކާއި ސަރުކާރު ކުންފުނިތަކާއި އަމިއްލަ ކުންފުނިތަކުގެ ވެސް އެހީތެރިކަމާއެކު ކަން އޭނާ ފާހަގަކުރެއްވިއެވެ.