ކ. ގުރައިދޫ ޚާއްސަ އެހީއަށް ބޭނުންވާ މީހުންގެ މަރުކަޒުގެ އިސް މުވައްޒަފަކު އެ ތަނުގެ ބެލުމުގެ ދަށުގައިވާ ބަލި މީހެއްގެ އަތުން ފޭރުނު ކަމަށް ބުނާ މައްސަލައެއް ފެންމަތިވެ އެ މައްސަލަަ ބަަލަމުން އަންނަ ކަމަށް ޖެންޑާ މިނިސްޓްރީން މިއަދު ބުނެފިއެވެ.
މި މައްސަލަ އެންމެ ފުރަތަމަ ފެންމަތިވީ ސޯޝަލް މީޑިއާގައި އާންމުވި ޕޯސްޓެއްގައެވެ. އެގޮތުން މި މައްސަލައިގައި އެ މުވައްޒަފުގެ މައްޗަށް ތުހުމަތު ކުރެވެނީ ބަލި މީހާގެ ކޭޝް ކާޑު ބޭނުން ކޮށްގެން ވިޔަފާރިކުރުމާއި އޭނާގެ އެކައުންޓުން ފައިސާ ނެގި ކަމަށެވެ.
އެ ކަމާ ގުޅިގެން މީޑިއާތަކަށް މައުލޫމާތު ދެއްވަމުން އެ މިނިސްޓްރީގެ މީޑިއާ އޮފިޝަލް ފާތިމަތު ޒަމްހީނާ ވިދާޅުވީ އެ ކަން އެ މިނިސްޓްރީގެ ސަމާލުކަމަށް އައިސްފައިވާ ކަމަށެވެ. އަދި، މިހާރު އެ ކަން ތަހުގީގުކުރަމުން އަންނަ ކަމަށް ވެސް ޒަމްހީނާ ވިދާޅުވިއެވެ.
"އެ މައްސަލަ ބަލައި ނިމެންދެން މައްސަލައިގައި ތުހުމަތު ކުރެވިފައިވާ މުވައްޒަފުވަނީ މަސައްކަތުން އެކަހެރި ކޮށްފައި،" ޒަމްހީނާގެ މެސެޖުގައި ވެއެވެ.
އޭނާ ވިދާޅުވީ އެ މައްސަލަ ބަލައި ނިމުމުން އޭނާއާ މެދު އުސޫލާ އެއްގޮތަށް ފިޔަވަޅު އަޅާނެކަމަށެވެ.
ސޯޝަލް މީޑިއާގައި އާންމުވަމުން އަންނަ ޕޯސްޓުގައިވާ ގޮތުން ބަލިމީހާގެ އެކައުންޓުން 7،000 އަށްވުރެ ގިނަ ރުފިޔާ ބޭނުންކޮށްފައިވެއެވެ.