ހުއްޓާލާފައިވާ އޮމާން އެއާގެ ދަތުރުތައް އަނެއްކާ ވެސް ރާއްޖެއަށް ފެށުމަށް ތައްޔާރުވެއްޖެއެވެ.
އޮމާން އެއާއިން ވަނީ މި ހިނގާ ޖޫން މަހުގެ 24 ވަނަ ދުވަހު ރާއްޖެއަށް ދަތުރުތައް ފެށުމަށް ނިންމައި، ރާއްޖެއަށް ދަތުރުކުރުމަށް ބޭނުންވާ މީހުނަށް އެ އެއާލައިނުގެ ވެބްސައިޓު މެދުވެރިކޮށް ޓިކެޓް ނެގޭނެ އިންތިޒާމް ހަމަޖައްސާފައެވެ.
އޮމާންގެ ވެރިރަށް މަސްކަޓުން ސީދާ ވެލާނާ އިންޓަނޭޝަނަލް އެއަރޕޯޓަށް ކުރުމަށް ހަމަޖެހިފައިވާ މި ދަތުރުގެ އަގަކަށް ހަމަޖައްސާފައިވަނީ، 385 އެމެރިކާ ޑޮލަރެވެ. އޮމާން އެއާއިން ހަފްތާއަކު 4 ދުވަހު ދަތުރުތައް ބާއްވާނެއެވެ.
މި އަހަރުގެ ހޫނު މޫސުމާއި ދިމާކޮށް އޮމާން އެއާއިން ވަނީ ރާއްޖޭގެ އިތުރުން މޮސްކޯ، ބެންކޮކް، އިސްތަންބޫލުގެ އިތުރުން ކުއަލަލަމްޕޫރަށް ވެސް ދަތުރުތައް ފެށުމަށް ނިންމާފައެވެ.
އޮމާން އެއާގެ ދަތުރުތައް ފެށުމަށް ތާވަލްކޮށްފައިވާކަމަށް އެމްއޭސީއެލްގެ އޮފިޝަލަކު ވެސް ވަނީ "ސަން"އަށް ކަށަވަރުކޮށްދެއްވާފައެވެ.
އޮމާން އެއާއިން ވަނީ މީގެކުރިން 2009، 2016 އަދި 2018 ވަނަ އަހަރުވެސް ރާއްޖެއަށް އުދުހުންތައް ބާއްވާފައެވެ.