މޯލްޑިވްސް ރިޓަޔަމަންޓް ޕެންޝަން ސްކީމް އުފެދި ޕެންޝަން ފަންޑު ބޮޑުވާން ފެށިއިރު އެފަދަ ފަންޑެއް ހިންގައި ބެލެހެއްޓުމަށް ބޭނުންވާ ވަސީލަތްތަކާއި ޚިދުމަތްތައް ރާއްޖޭގެ މާލީ ނިޒާމުގައި އެންމެ ފުރިހަމަވެފައި ނެތޭ ދެންނެވިދާނެއެވެ. ފަންޑަށް ބޭނުންވާ އެންމެ އަސާސީ ކަަންކަމަށް ބަލާއިރު، ޕެންޝަން ފަންޑުން އިންވެސްޓް ކުރުމަށް ރާއްޖޭގެ ކެޕިޓަލް މާކެޓްގައި ހުރި ފުރުސަތުތައް މަދެވެ.
ހަމަ އެހެންމެ، ރާއްޖޭގެ އެކިކަންކޮޅުތަކުން ޕެންޝަން ކޮންޓްރިބިއުޝަން ޖަމާކުރުމާއި، ފައިސާ ބަލައިގަތުމާއި، ކަސްޓޯޑިއަންގެ ޚިދުމަތް ދޭނެ ފަރާތްތައް ވާދަވެރި މާރކެޓަކުން ހޮވޭނެ ފުރުސަތެއްވެސް ނެތެވެ. އަދި، މިފަދަ ފަންޑަކަށް ބޭނުންވާ އިންޝުއަރެންސް ޚިދުމަތާއި، ފަންޑު މެނޭޖަރުންނެއްވެސް ރާއްޖޭގައި ނެތެވެ. މީގެއިތުރުން، މިޚިދުމަތްތައް ފޯރުކޮށްދޭން ތިބި ފަރާތްތަކަށް ހުރި ގާނޫނީ ހުރަސްތައް ވެސް ގިނައެވެ.
މިދަތިތަކަށް އެކަށޭނަ ހައްލެއް ލިބޭނީ ރާއްޖޭގެ މާލީދާއިރާ އިތުރަށް ތަރައްޤީވެ ކުރިއަރައިގެން ކަމީ ދެބަސްވެންނެތް ހަޤީޤަތެކެވެ. ކަންމިހެން އޮތުމާއެކު، ޕެންޝަން ފަންޑު އެކަށީގެންވާ ގޮތުގައި ހިންގައި ބެލެހެއްޓުމުގެ ޒިންމާއަދާކުރާ ފަރާތުގެ ހައިސިޔަތުން ފަންޑު ހިންގުމަށް އެކަށޭނަ މާހައުލެއް ގާއިމުކުރުމަށް ޕެންޝަން އޮފީހުން އެކިގޮތްގޮތުން ތަފާތު މަސައްކަތްތައް ފެށިއެވެ.
މޯލްޑިވްސް ފައިނޭންސް ފޯރަމްގެ ތެރެއިން --- ފޮޓޯ/ ޕެންޝަން އޮފީސް
ފައިނޭންސް ފޯރަމަކީ މިމަސައްކަތުގެ ތެރެއިން 2012 ވަނަ އަހަރު އުފަންވި ފޯރަމެކެވެ. ފައިނޭންސް ފޯރަމްގެ މަގްސަދަކީ މާލީ ދާއިރާގެ ވެރިންނާއި ތަޖުރިބާކާރުން އެއްތަނަކުން ބައްދަލުވެ ޚިޔާލާއި، ތަޖުރިބާ އަދި މައުލޫމާތު ހިއްސާކޮށް މަޝްވަރާ ކުރެވޭނެ ޕްލެޓްފޯމެއް ގާއިމު ކުރުމެވެ.
މިހާތަނަށް މިސިލްސިލާގެ 10 ފޯރަމް ބޭއްވުނުއިރު މިފޯރަމުތަކުން ޙާސިލްކުރެވުނު ކަންކަމަކީ ކޮބައިތޯ ބަލާލުން މުހިންމެވެ. މިގޮތުން ބަލާއިރު ފައިނޭންސް ފޯރަމުން ހޯދިފައިވާ އެންމެ ބޮޑު ކާމިޔާބީއަކީ މާލީދާއިރާގެ ކުރިއެރުމަށްޓަކައި މަޝްވަރާކުރެވޭނެ ޕްލެޓްފޯމެއް ގާއިމު ކުރުމެވެ.
ހަމައެއާއެކު މާލީ ދާއިރާގެ ކުރީސަފުގައި ހަރަަކާތްތެރިވާ އިދާރާތަކާއި މުއައްސަސާތަކުގެ ވެރިންގެ ބައިވެރިވުމާއެކު މުހިންމު އެކި މައުޟޫޢުތަކަށް މަޝްވަރާކޮށް އަގުނުކުރެވޭހާ މުހިންމު ގިނަ މަޢުލޫމާތު ވަނީ އެއްކުރެވިފައެވެ.
ފާއިތުވި ދިހަ ފޯރަމުގައި ތަފާތު ދިހަ ދާއިރާއަކުން އެއްކުރެވިފައިވާ މައުލޫމާތު ޕެންޝަން އޮފީހުންވަނީ ފައިނޭންސް ފޯރަމްގެ ވެބްސައިޓް (financeforum.mv) އިން އާންމުކޮށް ލިބޭނެ އިންތިޒާމު ހަމަޖައްސާފައެވެ. މިގޮތުން މައުލޫމާތު އެއްކުރެވިފައިވާ ފާހަގަކޮށްލެވޭ ދާއިރާތައް ތިރީގައި އެވަނީއެވެ.
10 ވަނަ ފައިނޭންސް ފޯރަމްގެ އުސްއަލިތައް :
- ދިވެހިރާއްޖޭގެ މާލީދާއިރާގައި ފައިނޭންޝަލް ޓެކްނޮލޮޖީ އަދި އާޓިިފިޝަލް އިންޓެލިޖެންސްގެ ދައުރު
"ފިންޓެކް" މިލަފްޒަކީ ފައިނޭންޝަލް ޓެކްނޮލޮޖީ މިދެބަހުގެ ފެށޭ އަކުރުތައް ބޭނުންކޮށްގެން ހެދިފައިވާ ލަފުޒެކެވެ. ފައިނޭންޝަލް ޓެކްނޮލޮޖީ ނުވަތަ ފިންޓެކަކީ ހާޑްވެއަރ އަދި ސޮފްޓްވެއާ ހިމެނޭހެން މާލީ ޚިދުމަތްތައް ފޯރުކޮށްދިނުމަށާއި ލިބިގަތުމަށް ބޭނުންކުރާ ޓެކްނޮލޮޖީތަކަށް ކިޔާ ނަމެކެވެ.
ޒަމާނީ ފިންޓެކްގެ ތާރީޚް ފެށިފައިވަނީ 1960 ގެ އަހަރުތަކުގައި އޭޓީއެމް މެޝިން ބޭނުންކުރަން ފެށުމާ ހަމައިން ކަމުގައި ބެލެވިދާނެއެވެ. ފިންޓެކްގެ ސަބަބުން މާލީ ދާއިރާއަށް އިންގިލާބީ ބަދަލުތަކެއް އައިސް، ޒަމާނުއްސުރެ ބޭންކުތަކާއި މާލީ މުވައްސަސާތަކުގެ ގަވާއިދުތަކާއި އުސޫލުތަކުގެ ތެރެއިން ފޯރުކޮށްދެވެމުންއައި ގިނަ ޚިދުމަތްތަކެއް ވަނީ އަވަހަށް އަދި ފަސޭހަކަމާއެކު ނިންމާލެވޭ މުއާމަލާތުތަކަކަށް ވެފައެވެ.
މީގެ ސަބަބުން ޚިދުމަތް ހޯދާ ފަރާތްތަކުން ފިންޓެކް ސޮލިއުޝަންސްތަކަށް ދޭ ތަރުހީބު ބޮޑުވެ، ބޭންކިން، އިންޝުއަރެންސް، ސްޓޮކް ޓްރޭޑިންގ ފަދަ މާލީ ޚިދުމަތްތައް ދިނުމަށާއި ލިބިގަތުމުގައި ފިންޓެކަށް ބަރޯސާވާ މިންވަރު އެއްދުވަހުން އަނެއްދުވަހަށް ދަނީ އިތުރުވަމުންނެވެ.
މޯލްޑިވްސް ފައިނޭންސް ފޯރަމްގެ ތެރެއިން --- ފޮޓޯ/ ޕެންޝަން އޮފީސް
ހަމައެއާއެކު، ފިންޓެކްގެ އެހީގައި އާ ޚިދުމަތްތަކާއި ވަސީލަތްތައްވެސް ދަނީ ތައާރަފު ކުރެވެމުންނެވެ. މީގެތެރޭގައި ޕިއަރ ޓު ޕިއަރ ލެންޑިންގ ޕްލެޓްފޯމުތައް މެދުވެރިކޮށް ފައިނޭންސް ހޯދުމާއި ، އީ ކޮމާސްގެ އެހީގައި ވިޔާފާރިކުރުމާއި، ވެލްތު މޭނެޖްކުރުމާއި، ވިޔާފާރިތަކުގެ މެދުގައި ފައިސާގެ މުޢާމަލާތްތައް ހިންގުމަށް ބޭނުންކުރެވޭ ޕްލެޓްފޯމްތައް ވަނީ މަޤްބޫލު ޚިދުމަތްތަކަށް ވެފައެވެ.
ފިންޓެކް އިންޑަސްޓްރީގެ ބައެއް ތަފާސްހިސާބުތައް:
- ފިންޓެކް ސިނާއަތަކީ 118 ބިލިއަން އެމެރިކާ ޑޮލަރުގެ ސިނާއަތެއް
- ފާއިތުވި ދެއަހަރު ތެރޭ 26,000 ފިންޓެކް ސްޓާޓްއަޕްސް އުފެދިފައިވޭ
- 2023 ވަނަ އަހަރު ނިމޭއިރު ފިންޓެކް ސްޓާޓްއަޕްސްގެ އަދަދު 50،000 އަށް އަރާނެ ކަމަށް ލަފާކުރެވޭ
- 2015 ވަނައަހަރުން ފެށިގެން މިހާތަނަށް ފިންޓެކް ސިނާއަތުގެ އިންވެސްޓްމަންޓްތައް ވަނީ 3 ގުނަ އިތުރުވެފައި
- އެމެރިކާގެ އާބާދީގެ %65 މީހުން ޑިޖިޓަލް ބޭންކިންގ ބޭނުންކުރޭ
- ޗައިނާގައި %90 މީހުން ފިންޓެކްގެ އެހީގައި ދެވޭ ތަފާތު ބޭންކިން ޚިދުމަތްތައް ބޭނުންކުރޭ
ފިންޓެކްގެ މުސްތަގްބަލް ކަމުގައި ބެލެވޭ 7 ޓެކްނޮލޮޖީ:
- އާރޓިފިޝަލް އިންޓެލިޖެންސް
- ކްލައުޑް ސަރވިސަސް
- އިންޓަރނެޓް އޮފް ތިންގްސް
- ނޯކޯޑް، ލޯކޯޑް
- ހައިޕަ އޮޓޮމޭޝަން
- ބްލޮކްޗެއިން
- ކްރިޕްޓޯ ކަރަންސީ
އާޓިފިޝަލް އިންޓެލިޖެންސްގެ ސަބަބުން މާލީދާއިރާއަށް ބަދަލު އަންނާނެކަމަށް ބެލެވޭ ކަންކަން:
- ކްރެޑިޓް ސްކޯރ ބެލެހެއްޓުމާއި ލެންޑިންގ އޮޕަރޭޝަންސްތައް
- ޕާރސަނަލް ފައިނޭންސް މޮނިޓަރކުރުން
- އިންވެސްޓްމަންޓް ސްޓްރެޓެޖީ
- މާކެޓް ރިސަރޗް އަދި ސެންޓިމެންޓް އެނަލިސިސް
- ޑެޓް ކަލެކްޝަން
- ބިޒްނަސް ފައިނޭންސް އާއި އެކްސްޕެންސް ރިޕޯރޓިންގ
- ޕްރެޑިކްޓިވް އެނަލިސިސް
- ރެގިއުލޭޓަރީ ކޮމްޕްލަޔަންސް އަދި ފްރޯޑް ޑިޓެކްޝަން
ރާއްޖޭގެ މާލީ ދާއިރާގައި ފިންޓެކް އަދި އާޓިފިޝަލް އިންޓެލިޖެންސަށް ހުރި ފުރުސަތުތައް:
ރާއްޖޭގެ މާލީދާއިރާގައި ފިންޓެކް ސޮލިއުޝަންސް ބޭނުންކުރާ މިންވަރަށް ބަލާއިރު އެންމެ ފުޅާދާއިރާއެއްގައި ފިންޓެކް ސޮލިއުޝަންސް ބޭނުންކުރެވެމުންދަނީ އޮންލައިން ބޭންކިންގ އަދި ޕޭމަންޓް ޚިދުމަތްތަކަށެވެ. ރާއްޖޭގެ ފައިނޭންޝަލް އިންފްރަސްޓްރަކްޗަރ ހަރުދަނާ ކުރުމަށް ކުރެވޭ މަސައްކަތުގެ މުހިންމު ބައެއްކަމަށްވާ ޑޮމެސްޓިކް ޕޭމަންޓް ސިސްޓަމެއް ގާއިމުކުރުމަށް މޯލްޑިވްސް މަނިޓަރީ އޮތޯރިޓީން ކުރަމުންދާ މަސައްކަތްތަކާއެކު މިނިޒާމު އިތުރަށް ފުރިހަމަވެގެންދާނެ ކަމުގައި ބެލެވެއެވެ.
މީގެ އިތުރުން މާލީ ޚިދުމަތްދޭ އޮފީސްތަކާއި މުއައްސަސާތަކުން އާރޓިފިޝަލް އިންޓެލިޖެންސް، މެޝިން ލާނިންގ، ކްލައުޑް ކޮމްޕިއުޓިންގ ފަދަ ޓެކްނޮލޮޖީތައް ބޭނުންކުރަން ވަނީ ފަށާފައެވެ.
ރާއްޖޭގައި މިފަދަ ޚިދުމަތްތަައް ތައާރަފުވެ ބޭނުންކުރަން ފަށާފައިވާއިރު ޓްރެޑިޝަނަލް ބޭންކިންގ ޚިދުމަތްތަކާއި ޒަމާނީ ޚިދުމަތްތަކުގެ ބެލެންސެއް އޮތުމަކީ މުހިންމު ކަމެއްކަމުގައި ދާއިރާގެ އިސްފަރާތްތަކުން ގަބޫލުކުރެއެވެ. ހަމަމިއާއެކު، ރާއްޖެއަށް ތައާރަފުކުރެވޭ ފިންޓެކް ސޮލިއުޝަން ތަކަކީ ރައްކާތެރި، ކަމަށް އެކަށޭނަ ސޮލިއުޝަންސްތަކަށް ވުން މުހިންމު ކަމުގައި އެފަރާތްތަކުން ފާހަގަކުރެއެވެ.
މޯލްޑިވްސް ފައިނޭންސް ފޯރަމްގެ ތެރެއިން --- ފޮޓޯ/ ޕެންޝަން އޮފީސް
މިގޮތުން އަޖުމަބެލުން މުހިންމު އަދި އޭގެ ސަބަބުން މަންފާކުރާނެ ދާއިރާތައް ކަމުގައި އެފަރާތްތަކުން ފާހަގަކުރާ ބައެއް ދާއިރާތަކުގެ ތެރޭގައި އޭއައިގެ އެހީގައި ކަސްޓަމަރ ސަރވިސަސްގައި ބޭނުންކުރެވޭ ޗެޓްބޮޓްސް ތަކާއި ފްރޯޑް ޕްރިވެންޝަން އަށް ބޭނުންކުރެވޭ އެޕްލިކޭޝަންތަކުގެ އިތުރުން ބްލޮކްޗެއިން ، ކްލައުޑް ކޮމްޕިއުޓިން ، ޑޭޓާ ޝެއަރިން ފަދަ ދާއިރާތައް ފާހަގަކުރެވެއެވެ.
ރާއްޖޭގައި ފިންޓެކް އަދި އޭއައި ސްޓާޓްއަޕްސް ތަކަށް ހުރި ފުރުސަތުތަކާއި ގޮންޖެހުންތައް:
ދުނިޔޭގެ އެހެން ޤައުމުތަކެކޭ އެއްފަދައިން ރާއްޖޭގައިވެސް ފިންޓެކް އަދި އޭއައި ސްޓާޓްއަޕްސް ފަށައި އެކަމަށް ކުރިމަތިލާ މީހުން އެބަތިއްބެވެ. މިދާއިރާއިން ގިނަ ފުރުސަތުތައް ހުރިއިރު ކުރިއަށް ދިއުމުގައި ދިމާވާ ގޮންޖެހުންތައް ވެސް ގިނައެވެ. މީގެ ތެރޭގައި ރެގިއުލޭޓަރީ މައްސަލަތަކާއި، އިންވެސްޓަރުން ނުލިބުމާއި، ޚިދުމަތް ބޭނުންކުރާނެ މީހުން މަދުވުމުމާއި، މަސައްކަތަށް ބޭނުންވާ ވަސީލަތްތަކާއި ޚިދުމަތްތައް ނުލިބުމާއި، މީހުން ރީޓެއިން ކުރަން އުނދަގޫވުން ފަދަ ކަންކަން ހިމެނެއެވެ.
ފިންޓެކް އަދި އޭއައި ސްޓާޓްއަޕްސްތައް ކާމިޔާބުކުރުމަށް އެހީވެދޭނެ ކަންކަމުގެ ގޮތުގައި ސްޓާޓްއަޕްސްތަކުން ފާހަގަކުރާ ކަންކަން
- ރެގިއުލޭޓަރީ ސޭންޑް ބޮކްސް ގާއިމްކުރުމުގެ އަމަލީ މަސައްކަތް އަވަސްކޮށް އެކަށޭނަ ހައްލެއް ހޯދުން
- ދާއިރާގައި ހަރަކާތްތެރިވާ ފަރާތްތަކުގެ މެދުގައި މަޝްވަރާކުރެވި ދިމާވާ މައްސަލަތަކަށް ހައްލުހޯދުމާއި މަސައްކަތްތައް ފަސޭހަ ކުރުމަށް ސްޓާޓްއަޕްތަކަށް ހުރި ފުރުސަތުތައް ދެނެގަތުމާއި މައުލޫމާތު ހިއްސާކުރެވޭނެ ޕްލެޓްފޯމްތަކެއް ހުރުން
- ގާނޫނުތަކާއި ގަވާއިދުތަކުގެ ސަބަބުން މަސައްކަތް ކުރުމަށް ދަތިވާ ހާލަތްތައް މަދުކުރެވޭނެ ގޮތަކަށް ކަންކަން ހަމަޖެއްސުން
- ފިންޓެކް އަދި އޭއައި ސްޓާޓްއަޕްސްތައް ހިންގުމަށް އެކަށޭނަ އިކޯސިސްޓަމެއް ގާއިމުކުުރުން
- މަސައްކަތް ކުރެވޭނެ ވަސީލަތްތަކާއި ޖާގަ ތަނަވަސްވުމާއި ، އުފައްދާ އެޕްލިކޭޝަންސް ޓެސްޓްކޮށް ވެލިޑޭޓް ކުރެވޭނެ ފުރުސަތު އޮތުން
- ސްޓާޓްއަޕްތަކަށް އިންވެސްޓަރުން ލިބުން
- ކޯވޯކިން ސްޕޭސް ހެދުމާއި ޑިޖިޓަލް ނޯމެޑް ފްރެންޑްލީ ވޯކް ސްޕޭސްތައް ހެދުން