ޗެލްސީގެ ފްރާންސް މިޑްފީލްޑަރު އެންގޯލޯ ކަންޓޭ، ސައުދީ އަރަބިއާގެ އަލް އިއްތިހާދުގެ މެޑިކަލް ފުރިހަމަކޮށްފިއެވެ.
ކަންޓޭއާ ވާހަކަދެއްކުމަށް އިނގިރޭސިވިލާތުގެ ލަންޑަނަށް އަލް އިއްތިހާދުގެ އޮފިޝަލުންތަކެއް ދަތުރުކޮށްފައިވާ ކަމަށް ރިޕޯޓުތައް ބުނާ އިރު، ޓްރާންސްފާގެ ކަންކަން މިހާރު ނިމިފައިވާ ކަމަށް އިތުބާރު ހުރި ނޫސްވެރިޔާ ފަބްރީޒިއޯ ރޮމާނޯ ވެސް ވަނީ ބުނެފައެވެ. އަލް އިއްތިހާދުން ކަންޓޭއަށް ހުށަހަޅާފައިވަނީ މުސާރައިގެ ގޮތުގައި ދެ އަހަރަށް 200 މިލިއަން ޔޫރޯ (213.8 މިލިއަން ޕައުންޑް) ދޭ ގޮތަށް ކަމަށް ރިޕޯޓުތައް ބުނެއެވެ.
ނޫސްވެރިޔާ ރޮމާނޯ ރިޕޯޓުކޮށްފައިވާ ގޮތުގައި އަލް އިއްތިހާދާ އެކު ކަންޓޭގެ މެޑިކަލް ފުރިހަމަކުރީ ލަންޑަންގައެވެ. އަދި, ދާދި އަވަހަށް ރަސްމީކޮށް އަލް އިއްތިހާދުން ކަންޓޭގެ ޓްރާންސްފާ އިއުލާނު ކުރާނެ ކަމަށް ވަނީ ރިޕޯޓުކޮށްފައެވެ.
ސައުދީ ޕްރޯ ލީގުގެ ޗެމްޕިއަން އަލް އިއްތިހާދުން ވަނީ ރެއާލް މެޑްރިޑްގައި 14 އަހަރު ހޭދަކުރި ފްރާންސް ފޯވަޑް ކަރިމް ބެންޒެމާގެ ސޮއި ވެސް ހޯދައިފައެވެ. އަލް އިއްތިހާދަށް ބެންޒެމާއާ އެކު ކަންޓޭ ގުޅިއްޖެ ނަމަ، އަންނަ ސީޒަންގެ ސައުދީ ލީގު ހޯދުމަށް އަލް ނަސްރުގެ ޕޯޗުގަލް ތަރި ކްރިސްޓިއާނޯ ރޮނާލްޑޯއަށް އުނދަގޫތަކެއް ކުރިމަތިވާނެއެވެ.
އުމުރުން 32 އަހަރުގެ ކަންޓޭ، ޗެލްސީއާ ގުޅުނީ ލެސްޓާ ސިޓީއަށް އިނގިރޭސި ޕްރިމިއާ ލީގު ކާމިޔާބުކޮށްދިނުމުގައި އިސް ދައުރެއް އަދާކުރުމަށް ފަހު 2016 ވަނަ އަހަރުއެވެ. ޗެލްސީއާ ގުޅުމަށް ފަހު ކަންޓޭ ވަނީ އެ ކްލަބާއެކު އިނގިރޭސި ޕްރިމިއާ ލީގާއި ތިން ފަހަރު އެފްއޭ ކަޕާއި ޔޫއެފާ ޗެމްޕިއަންސް ލީގަކާއި ޔޫއެފާ ޔޫރޮޕާ ލީގެއް ވެސް ކާމިޔާބުކޮށްފައެވެ. ކަންޓޭ ވަނީ 2018 ވަނަ އަހަރު ފްރާންސަށް ވޯލްޑް ކަޕް ކާމިޔާބުކޮށްދިނުމުގައި ވެސް އިސް ދައުރެއް އަދާކޮށްފައެވެ.