ބޭނުންވީ ރެއާލް މެޑްރިޑުން ރިޓަޔާކުރަން ކަމަށާއި ކްލަބު ދޫކޮށްލަން ޖެހޭތީ ވަރަށް ހިތާމަކުރާ ކަމަށް ފްރާންސް ފޯވަޑް ކަރިމް ބެންޒެމާ ބުނެފިއެވެ.
ކޮންޓްރެކްޓް ނިމުމަކަށް އައުމުން, މިސީޒަނަށްފަހު ރެއާލް ދޫކޮށް ދިއުމަށް ބެންޒެމާ ނިންމާފައިވާކަން މިދިޔަ ހަފުތާގައި އެ ކްލަބުން ވަނީ އިއުލާންކޮށްފައެވެ. އަދި ރެއާލާއެކު އޭނާ ކުޅޭނެ ފަހު މެޗަކަށް ވެގެންދިޔައީ މިދިޔަ އާދީއްތަ ދުވަހު އެތުލެޓިކް ކްލަބާ ދެކޮޅަށް ކުޅުނު ސްޕެނިޝް ލަލީގާ މެޗެވެ. އެ މެޗުގައި ބަލިވާން ދަނިކޮށް، ރެއާލަށް ނަތީޖާ ހަމަހަމަކުރެވުނީ ބެންޒެމާ ކާމިޔާބުކޮށްދިން ޕެނަލްޓީންނެވެ.
ރިޕޯޓުތައް ބުނާގޮތުގައި އުމުރުން 35 އަހަރުގެ ބެންޒެމާ، 14 އަހަރަށްފަހު ރެއާލް ދޫކޮށްލުމަށްފަހު ގުޅެން ނިންމާފައިވަނީ އޭނާއަށް ބޮޑު އަގެއް ހުށަހެޅި ސައުދީ އަރަބިއާގެ އަލް އިއްތިހާދާއެވެ. އޭނާ ރެއާލުން ވަކިވުމުގެ ކުރިން މިއަދު ވަނީ ނޫސްވެރިންނާ ވެސް ބައްދަލުކޮށްފައެވެ.
"ކްލަބު ދޫކޮށްލަން ޖެހުމަކީ ވަރަށް ހިތާމަކުރާ ކަމެއް. އަހަރެން ރެއާލަށް ސޮއިކޮށް، ބޭނުންވީ ވެސް މި ކްލަބުން ރިޓަޔާވާން. ނަމަވެސް އެކަން ފުރިހަމައެއް ނުވި. އަހަރެން އަބަދުވެސް ހުންނާނީ ރެއާލްގެ ސަޕޯޓަރެއްގެ ގޮތުގައި. އަހަރެންނަށް ހިތްވަރުދިން ހުރިހާ ސަޕޯޓަރުންނަށް ހާއްސަ ޝުކުރެއް އަދާކުރަން،" ބެންޒެމާ ބުންޏެވެ.
ނޫސްވެރިންގެ ބައްދަލުވުމުގައި ރެއާލްގެ ރައީސް ފްލޮރެންޓީނޯ ޕެރޭޒަަށް ވެސް ބެންޒެމާ ވަނީ ހާއްސަ ޝުކުރެއް އަދާކޮށްފައެވެ. ބެންޒެމާ ބުނީ އޭނާއާއެކު ކްރިސްޓިއާނޯ ރޮނާލްޑޯ އާއި ޒައިނުއްދީން ޒިދާން ގެނައި މީހަކީ ޕެރޭޒް ކަމަށާއި އެއީ ބޮޑު ކާމިޔާބީއެއް ކަމަށެވެ.
"އެންމެ މުހިންމު ކަމަކީ އަހަރެންނަށް ހުރިހާ ކާމިޔާބީއެއް ހާސިލުކުރެވުން. އަހަރެން މި ކްލަބާ މެދު ބެހެއްޓީ އަމިއްލަ ދަރިއަކާ މެދު ބަހައްޓާ ގާތްކަން،" އޭނާ ބުންޏެވެ.
ފަހުގެ ރިޕޯޓުތައް ބުނާގޮތުގައި ބެންޒެމާ ވަނީ އަލް އިއްތިހާދާއެކު ތިން އަހަރު ދުވަހުގެ ކޮންޓްރެކްޓެއްގައި ސޮއިކޮށްފައެވެ. އަލް އިއްތިހާދަކީ މި ސީޒަނުގެ ސައުދީ ޕްރޯ ލީގުގެ ޗެމްޕިއަނެވެ. ޕޯޗުގަލް ތަރި ކްރިސްޓިއާނޯ ރޮނާލްޑޯގެ އަލް ނަސްރަށް ލީގު ނިންމާލަން ޖެހުނީ ދެވަނައިގައެވެ.