ޕެރިސް ސެއިންޓް ޖާމައިން (ޕީއެސްޖީ) ގެ އާޖެންޓީނާ ތަރި ލިއޮނެލް މެސީ އާއި ރެއާލް މެޑްރިޑްގެ ފްރާންސް ފޯވަޑް ކަރިމް ބެންޒެމާއަށް ސައުދީ ޕްރޯ ލީގަށް މަރުހަބާ ކިޔާ ކަމަށް ސައުދީގެ އަލް ނަސްރަށް ކުޅެމުންދާ ޕޯޗުގަލް ތަރި ކްރިސްޓިއާނޯ ރޮނާލްޑޯ ބުނެފިއެވެ.
އުމުރުން 38 އަހަރުގެ ރޮނާލްޑޯ، އަލް ނަސްރާ ގުޅުނީ މެންޗެސްޓާ ޔުނައިޓެޑާއެކު ހަދާފައިވާ ކޮންޓްރެކްޓް ބާތިލުކުރުމަށްފަހު މިދިޔަ ޖެނުއަރީ މަހުގެ ތެރޭގައެވެ. މިސީޒަނުގެ ސައުދީ ޕްރޯ ލީގުގައި ކުޅުނު 16 މެޗުން ރޮނާލްޑޯ 14 ގޯލު ކާމިޔާބުކުރި ނަމަވެސް، އޭނާ ސީޒަން ނިންމާލަން ޖެހުނީ ތައްޓެއް ނުހޯދިއެވެ.
ރޮނާލްޑޯގެ އިތުރުން ސައުދީން އަންނަނީ ދުނިޔޭގެ އެންމެ މޮޅެތި ކުޅުންތެރިން ގެންދިއުމަށް ގިނަ މަސައްކަތްތަކެއް ކުރަމުންނެވެ. އެގޮތުން އަލް ހިލާލުން މެސީއަށް ޝައުގުވެރިވާ އިރު، އަލް އިއްތިހާދުން ބެންޒެމާއަށް ޝައުގުވެރިވެއެވެ. އެ ދެ ކުޅުންތެރިންނަށް ވެސް އެ ކްލަބުތަކުން ވަނީ ބޮޑެތި ހުށަހެޅުންތަކެއް ހުށަހަޅައިފައެވެ.
ސައުދީގެ ލީގުން މެސީ އާއި ބެންޒެމާ ފެނުމާ މެދު ނޫސްވެރިން ސުވާލުކުރުމުން ރޮނާލްޑޯ ބުނީ އެ ދެ ކުޅުންތެރިން ވެސް ސައުދީން ފެނުމަކީ ވަރަށް އުފާކުރާނެ ކަމެއް ކަމަށާއި އެ ކުޅުންތެރިންނަށް މަރުހަބާ ކިޔާ ކަމަށެވެ.
މެސީއަކީ ރޮނާލްޑޯގެ އެންމެ ވާދަވެރި ކުޅުންތެރިޔާއެވެ. އެ ދެ ކުޅުންތެރިންގެ ވާދަވެރިކަން އެންމެ ބޮޑަށް ފާހަގަވީ ރެއާލާއި ބާސެލޯނާ އިންނެވެ. އޭރު ރޮނާލްޑޯ ރެއާލަށް ކުޅެމުންދިޔަ އިރު، މެސީ ކުޅެމުންދިޔައީ ބާސާއަށެވެ. އަދި އޭރު ރެއާލަށް ރޮނާލްޑޯއާއެކު ބެންޒެމާ ވެސް ކުޅެމުންދިޔައެވެ.