ބްރެޒިލް ފުޓުބޯޅަ ފެޑެރޭޝަންގެ އަދިވެސް އުންމީދަކީ ބްރެޒިލް ގައުމީ ޓީމަށް އިރުޝާދުދިނުމަށް ކާލޯ އެންޗެލޮޓީ ގެނެވުން ކަމަށް ރިޕޯޓުކޮށްފިއެވެ.
"ދަ އެތުލެޓިކް" އިން ރިޕޯޓުކުރާ ގޮތުގައި ރެއާލް މެޑްރިޑާއެކު އަންނަ އަހަރުގެ ނިޔަލަށް އެންޗެލޮޓީ ހަދާފައިވާ އެއްބަސްވުން ނިމުމަކަށް އަންނަންދެން އޭނާ އެ ކްލަބުގައި މަޑުކުރާނެ ކަމަށް ބުނި ނަމަވެސް، ބްރެޒިލް ގައުމީ ޓީމުގެ ނިންމުމަކީ އެޓީމާ އޭނާ ހަވާލުވުމެވެ.
ވޯލްޑް ކަޕް 2022 އަށްފަހު ބްރެޒިލް ގައުމީ ޓީމުގެ ހެޑް ކޯޗުގެ މަގާމުން ޓިޓޭ އިސްތިއުފާދިނުމަށްފަހު އެ މަގާމަށް އަދިވެސް ކޯޗަކު އައްޔަންކޮށްފައެއް ނުވެއެވެ. މިހާރު ވަގުތީގޮތުން ޓީމާ ހަވާލުވެ ހުރީ ބްރެޒިލްގެ 20 އަހަރުން ދަށުގެ ގައުމީ ޓީމުގެ ކޯޗެއްގެ ގޮތުގައި ވެސް މަސައްކަތްކުރާ ރަމޯން މެނެޒޭސްއެވެ.
ދާދި ފަހުން ބްރެޒިލް ފުޓުބޯޅަ ފެޑެރޭޝަނުން ވަނީ ކޯޗެއް ހޯދުމަށް ކުރިން އިއުލާންކުރި މުއްދަތު މިމަހުގެ ނިޔަލަށް އިތުރުކޮށްފައެވެ. އަދި އެ މުއްދަތުގެ ތެރޭގައި އެންޗެލޮޓީ، ޓީމާ ހަވާލުވާނެ ކަމަށް ބްރެޒިލް ފެޑެރޭޝަނުން އުންމީދުކުރާ ކަމަށް ހަބަރުތައް ބުނެއެވެ.
އެންޗެލޮޓީގެ އިތުރުން އެހެން ކޯޗުންތަކަކަށް ވެސް ބްރެޒިލް ފެޑެރޭޝަނުން ޝައުގުވެރިވެއެވެ. އެއީ ރޯމާގެ ކޯޗު ހޯސޭ މޮރީނިއޯ، ފެނެބާޗޭގެ ކޯޗު ޖޯޖް ޖެސޫސް. ފްލުމިނޭސީގެ ފެނާންޑޯ ޑިނިޒް އަދި ޕަލްމެރާސްގެ ކޯޗު އަބެލް ފެނާންޑޭޒްއެވެ.
ބްރެޒިލުން އަންނަ މަހު އެކުވެރިކަމުގެ މެޗުތަކަކަށް ނުކުތުމަށް ހަމަޖެހިފައިވެއެވެ. އެއީ އަންނަ މަހުގެ 17 އަދި 20 ގައި ގިނޭ އާއި ސެނެގާލްއާ ދެކޮޅަށް ކުޅޭ މެޗުތަކެވެ.