ރައްޔިތުންގެ މަޖިލީހުގެ މަތިވެރި ދާއިރާގެ އެމްޑީޕީ މެންބަރު ހަސަން ޒަރީރު އަވަހާރަކޮށްލަން އުޅުނު ކަމުގެ ތުހުމަތުގައި ހައްޔަރުކުރި މއ. ނައިޓްވިލާ، އިބްރާހީމް އަބްދުﷲ (ގައްބަރޭ)އާ ދެކޮޅަށް ސީސީޓީވީ ފުޓޭޖާއި ފޮޓޯގެ އިތުރުން ވެސް ހެކިތަކެެއް އެބަހުރިކަމަށް ފުލުހުން ބުނެފިއެވެ.
ގައްބަރޭ ހައްޔަރުކުރީ، ހޯދަން އިއުލާނުކުރިތާ ހަފުތާއެއް ފަހުން، އޭނާ އަމިއްލައަށް ފުލުހުންގެ އިދާރާއަށް އިއްޔެ ހާޒިރުވުމުންނެވެ. އޭނާގެ ބަންދަށް އިއްޔެ ވަނީ 30 ދުވަސް ޖަހައިފައެެވެ.
ގައްބަރޭގެ ބަންދުގެ މުއްދަތު އިތުރުކުރަން އިއްޔެ ކްރިމިނަލް ކޯޓަށް ގެންދިއުމުން، ނެރުނު އަމުރުގައި ވަނީ ގައްބަރޭގެ މައްޗަށް ކުށަށް ތުހުމަތުކުރެވޭ ވަރަށް ހެކި ފުލުހުން ހުށަހަޅާފައިވާ ކަމަށެވެ. އެ ގޮތުން ހެކީންގެ ބަޔާނާއި، ސީސީޓީވީ ފުޓޭޖްގެ ސްނެޕްޝޮޓާއި އަނިޔާލިބުނު ފަރާތުގެ މެޑިކޯ އަދި ފޮޓޯތަކާއި އިންޓެލިޖެންސް ރިޕޯޓްތައް ހުށަހަޅައިފައިވާކަމަށް ބުނެފައިވެއެވެ.
ގައްބަރޭގެ ދިފާއިީ ވަކީލުން ކޯޓުގައި ބުނީ ގައްބަރޭގެ މައްޗަށް ތުހުމަތު ކުރެވޭ މިންވަރަށް ފުލުހުން ހެކި ހުށަހަޅާފައި ނެތް ކަމަށެވެ. ނަމަވެސް ގާޒީ ނިންމެވީ ގައްބަރޭ ބަންދުގައި ބެހެއްޓޭ މިންވަރަށް ހެކި ހުށަހަޅާފައިވާ ކަމަށެވެ.
ގައްބަރޭއަކީ ބަންދު ރެކޯޑެއް އޮތް މީހެއްކަން ވެސް ވަނީ ފާހަގަކޮށްފައެވެ.
އޭނާ އަކީ 2007ވަނަ އަހަރު ތޫނު ހަތިޔާރެއް ބޭނުންކޮށްގެން ހ. ކުބުރާ އަލީ އިޝާރު މަރާލުމުގައި ބައިވެރިވިކަމަށް ފުލުހުންގެ ތަހުގީގުގައި އިއުތިރާފް ވެފައިވާ މީހެކެވެ. އޭރު އޭނާގެ އުމުރަކީ 16 އަހަރެވެ. އެ މައްސަލައިގައި ދައުލަތުން ވަނީ އޭނާގެ މައްޗަށް ގަސްތުގައި މީހަކު މަރާލުމުގައި ބައިވެރިވި ކަމުގެ ކުށުގެ ދައުވާ އުފުލައިފައެވެ.
ނަމަވެސް ހެކި ނެތުމުގެ ސަބަބުން އޭނާގެ މައްޗަށް ކުށް ސާބިތު ނުވާކަމަށް 2010ވަނަ އަހަރު ޖުވެނައިލް ކޯޓުން ވަނީ ހުކުމްކޮށްފައެވެ. ޖުވެނައިލް ކޯޓުން ކުރި ހުކުމް ދައުލަތުން ވަނީ ހައިކޯޓުގައި 2012ވަނަ އަހަރުގެ އޭޕްރީލް މަހުގެ 17ވަނަ ދުވަހު އިސްތިއުނާފު ކޮށްފައެވެ.
އެނގިފައިވާ ގޮތުގައި ގައްބަރޭ ހައްޔަރު ކުރީ މެންބަރު ޒަރީރަށް ހަމަލާދީ އަވަހާރަ ކޮށްލަން އުޅުނު ކަމުގެ ތުހުމަތުގައެވެ.
ހަބީބީ ކެފޭ އެންޑް ބިސްޓްރޯ ތެރޭގައި އިންނަވަނިކޮށް ޒަރީރަށް, ފަސް މީހުންގެ ގްރޫޕަކުން ހަމަލާ ދީފައިވަނީ މި މަހުގެ އެއްވަނަ ދުވަހުއެވެ. މަރުތޭލައަކުން ޖަހައި ބޯ ފަޅާލުމުގެ އިތުރުން އެހެން ބައެއް އަނިޔާތައް ވެސް އޭނާއަށް ވަނީ ލިބިފައެވެ.