ޗެލްސީގެ އާ ކޯޗަކަށް ހަމަޖައްސާ މައުރީސިއޯ ޕޮޗެޓީނޯ، އެ ކްލަބާ ހަވާލުވާނެ ތާރީހު ނިންމާފައިވާ ކަމަށް ރިޕޯޓުކޮށްފިއެވެ.
ރިޕޯޓުތައް ބުނާގޮތުގައި ގިނަ ކޯޗުންތަކަކަށް ޓާގެޓްކުރުމަށްފަހު ޗެލްސީން ވަނީ އެ ކްލަބުގެ ދާއިމީ ކޯޗަކަށް ޕޮޗެޓީނޯ ގެނައުމަށް އެއްބަސްވެފައެވެ. އަދި އެ ކްލަބުން ޕޮޗެޓީނޯއާ މަޝްވަރާކުރުމަށްފަހު ނިންމުންތަކެއް ނިންމާފައިވާ ކަމަށް ވެސް ހަބަރުތައް ބުނެއެވެ.
"ދަ ސަން" އިން ރިޕޯޓުކުރާ ގޮތުގައި އިނގިރޭސި ޕްރިމިއާ ލީގުގައި ކުރިން ޓޮޓެންހަމް ހޮޓްސްޕާއަށް އިރުޝާދުދިން ޕޮޗެޓީނޯ، އަންނަ ޖުލައި މަހުގެ އެއްވަނަ ދުވަހު ޗެލްސީއާ ހަވާލުވާނެއެވެ.
އޭގެ އިތުރުން "ދަ ޓައިމްސް" އިން ރިޕޯޓުކޮށްފައިވާ ގޮތުގައި މި ހަފުތާގެ ތެރޭގައި ޗެލްސީން ޕޮޗެޓީނޯއާއެކު ކޮންޓްރެކްޓުގައި ސޮއިކުރާނެއެވެ. އޭނާ ސޮއިކުރުމަށް ނިންމާފައިވަނީ ތިން އަހަރު ދުވަހުގެ ކޮންޓްރެކްޓެއްގައި ކަމަށް އެ ނޫހުން ރިޕޯޓުކުރެއެވެ.
ޕްރިމިއާ ލީގުގެ ފަހުގެ ތާރީހުގައި މިސީޒަނަކީ ޗެލްސީގެ އެންމެ ދަށް އެއް ސީޒަނެވެ. ޗެލްސީގެ ދަށް ނަތީޖާތަކާ ގުޅިގެން ކޯޗަކަށް ހުރި ގްރަހަމް ޕޮޓާ މަގާމުން ދުރުކޮށް، ވަގުތީގޮތުން ކޯޗަކަށް އެ ކްލަބުގެ ލެޖެންޑް ފްރޭންކް ލަމްޕާޑް ހަމަޖެއްސިއެވެ. ނަމަވެސް ލަމްޕާޑަށް ވެސް ވަނީ ޗެލްސީއަށް ރަނގަޅު ނަތީޖާތަކެއް ހޯދައިދިނުމަށް އުނދަގޫތަކަކާ ކުރިމަތިލާން ޖެހިފައެވެ.
ޕްރިމިއާ ލީގުގެ ޕޮއިންޓް ތާވަލުގައި ޗެލްސީ އޮތީ ކުޅުނު 35 މެޗުން ލިބުނު 43 ޕޮއިންޓާއެކު 11 ވަނައިގައެވެ. އެހެންކަމުން އާންމުކޮށް ޔޫއެފާ ޗެމްޕިއަންސް ލީގުން ފެންނަ ޗެލްސީ، އަންނަ ސީޒަންގެ މުބާރާތުން ނުފެންނާނެއެވެ.
ޗެލްސީގެ ކޯޗަކަށް ހަމަޖައްސާ ޕޮޗެޓީނޯގެ ކޯޗިން ކެރިއަރު ފެށީ 2009 ވަނަ އަހަރު ސްޕެއިންގެ އެސްޕާނިޔޯލް އިންނެވެ. ޓޮޓެންހަމްއާ 2014 ވަނަ އަހަރު ހަވާލުވުމުގެ ކުރިން އޭނާ ވަނީ އިނގިރޭސި ކްލަބު ސައުތުހެމްޓަނަށް ވެސް އިރުޝާދުދީފައެވެ. އަދި 2021 ވަނަ އަހަރު ޕެރިސް ސެއިންޓް ޖާމައިން (ޕީއެސްޖީ)އާ ހަވާލުވެ، އެ ކްލަބަށް ފްރާންސް ލީގު ކާމިޔާބުކޮށްދިން ނަމަވެސް، 2022 ވަނަ އަހަރުގެ ތެރޭގައި ކޯޗުކަމުން ޕޮޗެޓީނޯ ވަކިކުރިއެވެ. އޭގެ ފަހުން އޭނާ ކްލަބަކާ ހަވާލުވެފައެއް ނުވެއެވެ.