ފ. އަތޮޅު ފިލިތެޔޮ ކައިރިން ކަނޑު އަޑިއަށް ފައްތާފައި ހުއްޓައި އަތުލައިގަތީ 80 ކިލޯގެ މަސްތުވާތެކެތިކަމަށާއި އެ ތަކެތި ފެނުނީ އެއަތޮޅު ފީއަލި މަސްވެރިން ތަކަކަށް ކަމަށް އެ ރަށު ކައުންސިލުން މިއަދު ބުނެފިއެވެ.
ފުލުހުން ރޭ ބުނީ، ފ. އަތޮޅު ފިލިތެޔޮ ކައިރިން ކަނޑު އަޑިއަށް ފައްތާފައި ހުރި ގިނަ އަދަދެއްގެ މަސްތުވާތަކެތި އަތުލައިގަނެފައިވާ ކަމަށެވެ. ނަމަވެސް އެއީ ކޮން ބާވަތެއްގެ އަދި ކިހާ އަދަދެއްގެ މަސްތުވާތަކެއްޗެއް ކަމެއް ފުލުހުން އަދި ހާމައެއް ނުކުރެއެވެ.
އެ ތަކެތި އަތުލައިގެންފައި ވަނީ، އެ ސަރަހައްދުގައި ކަނޑު އަޑިއަށް މަސްތުވާތަކެތި ފައްތާފައި ހުރިކަމަށް މައުލޫމާތު ލިބިގެން ފ. އަތޮޅު ފުލުހުން ހިންގި އޮޕަރޭޝަނެއްގައެވެ.
އެކަމާ ގުޅޭގޮތުން ފީއަލި ކައުންސިލުގެ ރައީސް މޫސާ އަހުމަދު މިއަދު "ސަން"އަށް ވިދާޅުވީ، ކަނޑުއަޑީގައި ފައްތާފައި ހުރި މަސްތުވާތަކެތި ފުރަތަމަ ފެނިފައި ވަނީ، އެ ރަށުން މަހަށް ގޮސް އުޅުނު ބަޔަކަށް ކަމަށެވެ.
"މަހަށް ދިޔަ ބަޔަކަށް އެންމެ ފުރަތަމަ ފެނިގެން ރިޕޯޓުކުރީ،" އޭނާ ވިދާޅުވިއެވެ.
މޫސާ އަހުމަދު ވިދާޅުވީ، އަތުލައިގެންފައި ވަނީ 80 ކިލޯގެ މަސްތުވާތަކެތި ކަން ފުލުހުންގެ ފަރާތުން އެނގިފައިވާ ކަމަށެވެ. އިތުރު ތަފްސީލެއް އޭނާއަކަށް ވެސް ނޭނގެއެވެ.
މިހާރު މި މައްސަލަ ފުލުހުން ދަނީ ތަހުގީގު ކުރަމުންނެވެ.
މީގެ އެތައް އަހަރެއް ކުރިން ވެސް ވަނީ ރާއްޖޭގެ ފަޅެއްގައި ރައްކާކޮށްފައި ހުރި ޓަނަކަށް ވުރެ ގިނަ މަސްތުވާތަކެތި އަތުލައިގެންފައިވެއެވެ.
މަދުން ނަމަވެސް ކަނޑު އަޑީގައި ރައްކާ ކޮށްފައި ހުންނަ މަސްތުވާތަކެތި އަތުލައިގަނެއެވެ.