ފ. އަތޮޅު ފިލިތެޔޮ ކައިރިން ކަނޑު އަޑިއަށް ފައްތާފައި ހުރި ގިނަ އަދަދެއްގެ މަސްތުވާތަކެތި ފުލުހުން މިއަދު އަތުލައިގެންފިއެވެ.
މިކަމާ ގުޅިގެން ފުލުހުން މީޑިއާތަކާ ހިއްސާކުރި މެސެޖުގައި ވަނީ، އެ ތަކެތި އަތުލައިގެންފައި ވަނީ، އެ ސަރަހައްދުގައި ކަނޑު އަޑިއަށް މަސްތުވާތަކެތި ފައްތާފައި ހުރިކަމަށް މައުލޫމާތު ލިބިގެން ފ. އަތޮޅު ފުލުހުންނާ އެކު ހިންގި އޮޕަރޭޝަނެއްގައި ކަމަށެވެ.
އަތުލައިގަނެވިފައި ވަނީ ކިހާ އަދަދެއްގެ މަސްތުވާތަކެތިކަމެއް ފުލުހުން ހާމަކޮށްފައެއް އަދި ނުވެއެވެ. އެ ތަކެތި މިހާރު ހުރީ ފުލުހުންގެ ބެލުމުގެ ދަށުގައެވެ. މި މައްސަލަ ފުލުހުން ދަނީ ތަހުގީގުކުރަމުންނެވެ.
މީގެ އެތައް އަހަރެއް ކުރިން ވެސް ވަނީ ރާއްޖޭގެ ފަޅެއްގައި ރައްކާކޮށްފައި ހުރި ޓަނަކަށް ވުރެ ގިނަ މަސްތުވާތަކެތި އަތުލައިގެންފައިވެއެވެ.
މަދުން ނަމަވެސް ކަނޑު އަޑީގައި ރައްކާ ކޮށްފައި ހުންނަ މަސްތުވާތަކެތި އަތުލައިގަނެއެވެ.