މި އަހަރުގެ ސެޕްޓެމްބަރު މަހުގެ ނުވަވަނަ ދުވަހު އޮންނަ ރިޔާސީ އިންތިޚާބުގައި އެމްޑީޕީގެ ރައީސް މުހައްމަދު ނަޝީދު އިސްވެ ހުންނަވައި އުފައްދަވާ އާ ޕާޓީން ކެންޑިޑޭޓަކު ވާދަކުރައްވާނެ ކަން އިއުލާނު ކުރައްވައިފިއެވެ.
ފިކުރެއްގެ ދިރުން ނަމުގައި އާ ސިޔާސީ ޕާޓީއެއް ހަދަން ނިންމައި، އެ ފެކްޝަންގައި ތިއްބެވި ހުރިހާ މަޖިލީސް މެންބަރުން އެމްޑީޕީން އިސްތިއުފާ ދެއްވުމަށް ފަހުގައި މިހާރު ކުރިއަށް ގެންދާ ނޫސްވެރިންގެ ބައްދަލުވުމެއްގައި އެ ހުޅުދޫ ދާއިރާގެ މެންބަރު އިލްޔާސް ލަބީބު ވިދާޅުވީ މި އަހަރުގެ ރިޔާސީ އިންތިޚާބުގައި ފިކުރެއްގެ ދިރުމުން ކެންޑިޑޭޓެއް ނެރޭނެ ކަމަށެވެ.
ފިކުރެއްގެ ދިރުމުން ބޭއްވި ނޫސްވެރިންގެ ބައްދަލުވުމުގެ ތެރެއިން -- ސަން ފޮޓޯ/ ނަހުދާ ފާއިޒު
އޭނާ ވިދާޅުވީ އެ ޕާޓީން ކެންޑިޑޭޓަކު ނެރޭނެ ކަމަށާއި އަދި، އިންތިޚާބުގައި އެކުގައި މަސައްކަތް ކުރަން މަޝްވަރާ ކުރަން ޖެހޭ ޕާޓީތަކާ އެކު މަޝްވަރާ ވެސް ކުރައްވާނެ ކަމަށެވެ.
ނޫސްވެރިންގެ ބައްދަލުވުމުގައި މަޖިލީހުގެ ނައިބު ރައީސް އީވާ އަބްދުﷲ ވެސް ވަނީ އެކަން ތަކުރާރު ކުރައްވައިފައެވެ. އޭނާ ވިދާޅުވީ އެ ޕާޓީން އެކުގައި މަސައްކަތް ކުރެވޭނެ ޕާޓީތަކާ އެކު މަޝްވަރާ ކުރާނެ ކަމަށާއި އަދި، ރިޔާސީ ކެންޑިޑޭޓަކު ހޮވަން ފިކުރެއްގެ ދިރުމުން ޕްރައިމަރީއެއް ބާއްވާނެ ކަމަށް ވެސް އޭނާ ވިދާޅުވިއެވެ.
މިދިޔަ އެމްޑީޕީގެ ރިޔާސީ ޕްރައިމަރީއަށް ފަހުގައި އެ މަނިކުފާނު ގެންދަވަނީ އެމްޑީޕީ ތެރޭގައި "ފިކުރެއްގެ ދިރުން" ނަމުގައި ވަކި ހަރަކާތެއް ހިންގަމުންނެވެ. ސަރުކާރާ މެދު އުފެދުނު ހިތްހަމަނުޖެހުންތަކަށް ފަހުގައި އެ ފެކްޝަންގެ ހުރިހާ ރައްޔިތުންގެ މަޖިލީހުގެ މެންބަރުން މިއަދު ވަނީ އިސްތިއުފާ ދެއްވައިފައެވެ.
ސަރުކާރާ ދެކޮޅަށް އިމުގެ މައްސަލައިގައި އިދިކޮޅު އިއްތިހާދުން ކުރިއަށް ގެންދާ ހަރަކާތްތަކުގައި ބައިވެރިވުމާ އެކު، އެ ފެކްޝަންގެ މެދުހެންވޭރު ދާއިރާގެ މެންބަރު އަލީ އާޒިމް ވަކިކުރަން އެމްޑީޕީން ވަނީ ނިންމައިފައެވެ. އެ ނިންމުމާ އެކު އުފެދުނު ހިތްހަމަނުޖެހުންތަކުގައި ނަޝީދުގެ އަރިސް 12 މެންބަރުން ވަނީ މިއަދު އެމްޑީޕީން އިސްތިއުފާ ދެއްވައިފައެވެ.
މިއަދު އެމްޑީޕީން އިސްތިއުފާ ދެއްވާފައިވަނީ:
- މަޖިލީހުގެ ނައިބު ރައީސް އީވާ އަބްދުﷲ
- މުޙައްމަދު ވަހީދު (ވައްޑޭ)
- އިމްތިޔާޒް ފަހުމީ (އިންތި)
- ހަސަން ލަތީފު
- އިލްޔާސް ލަބީބް
- ޔާސިރު އަބްދުއްލަތީފް
- ހަސަން އަފީފް
- އިބްރާހީމް ރަޝީދު (ބޮންޑޭ)
- ހުސެއިން ފިރުޝާން
- ހަސަން ޝިޔާން (ގިޓާ)
- މުޙައްމަދު ރަޝީދު (ބޯދިގު)
- ގައްދޫ އަހްމަދު ޒާހިރު
ފާހަގަކޮށްލެވޭ ގޮތުގައި ނަޝީދު އާ ޕާޓީއެއް އުފައްދަވައިފި ނަމަ، 12 މަޖިލީސް މެންބަރުނާ އެކު އިދިކޮޅު އެންމެ ބޮޑު ޕާޓީއަކަށް ވާނީ އެ ޕާޓީއެވެ. މިހާރު އިދިކޮޅުގައި އޮތް ޕީޕީއެމް/ޕީއެންސީގައި ތިއްބަވަނީ އަށް މެންބަރުންނެވެ.
އެހެންނަމަވެސް، ނަޝީދު މިހާތަނަށް އެ ޕާޓީން އިސްތިއުފާއެއް ނުދެއްވައެވެ.