ދުނިޔޭގެ އެކި ހިސާބުތަކުގައި ހިނގަމުންދާ ހަނގުރާމަތަކާއި ގުދުރަތީ ކާރިސާތަކުގެ ސަބަބުން ހާލުގައި ޖެހި، ރެފިއުޖީންނަށް ވެފައިވާ މީހުންގެ އަދަދު 71 މިލިއަނަށް އަރައިފިއެވެ.
އިންޓާނަލް ޑިސްޕްލޭސްމަންޓް މޮނިޓަރިން ސެންޓަރު (އައިޑީއެމްސީ) އާއި ނޯވޭގެ ރެފިއުޖީ ކައުންސިލް (އެންއާރްސީ) އިން އާންމުކޮށްފައިވާ ރިޕޯޓަކުން ދައްކާގޮތުގައި ނިމިދިޔަ 2022 ވަނަ އަހަރު ނިމުނު އިރު ރެފިއުޖީންގެ ގޮތުގައި ރަޖިސްޓްރީ ވެފައިވާ މީހުންގެ އަދަދު 71.1 މިލިއަނަށް އަރައެވެ. މިއީ އޭގެ ކުރީ އަހަރާ އަޅާބަލާއިރު 20 އިންސައްތައިގެ ކުރިއެރުމެކެވެ.
އައިޑީއެމްސީގެ ރިޕޯޓަށް ބަލާއިރު ނިމުނު އަހަރު އަމިއްލަ ގެދޮރާއި ވަޒަން ދޫކޮށް އަމިއްލަ ގައުމުގައި ރައްކާތެރި ހިސާބުތަކަށް ބަދަލުވާން މަޖުބޫރިވި މީހުންގެ އަދަދު 60.9 މިލިއަނަށް އަރައެވެ. އަދި އޭގެ ތެރެއިން ބައެއް މީހުން އެކި ފަހަރު މަތީން ރައްކާތެރި ހިސާބުތަކަށް ދަތުރުކޮށްފައިވާއިރު، މިއީ 2021 ވަނަ އަހަރާ އަޅާ ބަލާއިރު 60 އިންސައްތައިގެ އިތުރުވުމެކެވެ.
މިދިޔަ އަހަރު ގިނަ ގައުމުތަކެއްކައި ހިނގަމުންދާ ހަމަނުޖެހުންތަކުގައި އެތައް މިލިއަން ބަޔަކު ހާލުގައި ޖެހިފައި ވާއިރު، މޫސުމީ ބަދަލުތަކާ ގުޅިގެން ހިނގި ގުދުރަތީ ހާދިސަތަކުގައި ހާލުގައި ޖެހުނު މީހުންވެސް ހިމެނެއެވެ.
އެފަދަ ދާޚިލީ ހަމަނުޖެހުން ތަކުގެ ސަބަބުން ރެފިއުޖީންނަށްވި މީހުންގެ 28.3 މިލިއަނަށް އަރައެވެ. އޭގެ ތެރެއިން 17 މިލިއަން މީހުންނަކީ ރަޝިއާ – ޔޫކްރެއިން ހަނގުރާމައިގެ ސަބަބުން ރައްކާތެރި ހިސާބުތަކަށް ދަތުރު ކުރަން ޖެހުނު މީހުންނެވެ. އަދި، މިދިޔަ އަހަރު ސޫދާންގެ އަސްކަރިއްޔާ އާއި ރެޕިޑް ސަޕޯޓް ފޯސަސްގެ ފައުޖު ތަކާ ދެމެދު ހަމަލާ ބަދަލު ކުރަން ފެށިއިރު އެ ގައުމުގައި ރައްކާތެރި ހިސާބުތަކަށް ބަދަލުވި މީހުންގެ އަދަދު ހަތް ލައްކަ އަށް އަރައެވެ. އިތުރު 150،000 މީހުން ވަނީ ގައުމު ދޫކޮށް ހިޖުރަ ކޮށްފައެވެ.
މީގެ އިތުރުން، ޕާކިސްތާނަށް ކުރިމަތިވި ފެންބޮޑުވުމުގައި އަށް މިލިއަނަށް ވުރެ ގިނަ މީހުން ރައްކާތެރި ހިސާބުތަކަށް ހިޖުރަ ކުރަން ޖެހުނެވެ.
އައިޑީއެމްސީ ގެ ރިޕޯޓުން ދައްކާ ގޮތުގައި ދުނިޔޭގެ އެކި ކަންކޮޅުތަކުގައި މި ވަގުތު ތިބި ރެފިއުޖީންގެ ތެރެއިން ހަތަރު ބައިކުޅަ ތިންބައި މީހުން ތިބީ 10 ގައުމުގައެވެ. އެއީ، ސޫރިޔާ، އަފްޣާނިސްތާން، ކޮންގޯ، ޔޫކްރެއިން، ކޮލަމްބިޔާ، އިތިއޯޕިޔާ، ޔަމަން، ނައިޖީރިޔާ، ސޮމާލިޔާ އަދި ސޫދާނެވެ.