ހއ. ދިއްދޫގައި ހިންގާ ހއ. އަތޮޅު ތައުލީމީ މަރުކަޒުން "ޙިފްޒް ރަންތާޖު"ގެ ނަމުގައި ޤުރުއާން ހިތުދަސް ކުރުމުގެ ޕްރޮގްރާމެއް އިފްތިތާހުކޮށްފިއެވެ.
މި ޕްރޮގްރާމް އިފްތިތާހުކޮށްފައިވަނީ މިދިޔަ ބުރާސްފަތި ދުވަހުއެވެ.
"ސަން"އާ ވާހަކަދައްކަވަމުން ހއ. އަތޮޅު ތައުލީމީ މަރުކަޒުގެ ޕްރިންސިޕަލް އަބްދުﷲ ނާހިދު ވިދާޅުވީ މިއީ ވަރަށް މާތް މަގުސަދެއްގައި ކުރިއަށް ގެންދާ ޕްރޮގްރާމެއް ކަމަށެވެ.
"މައިގަނޑު މަގުސަދަކީ ރަށުގައި ކުދިންގެ ހިތްތަކުގައި ޤުރުއާނަށް ލޯބި ޖެއްސުމާއި ޤުރުއާނަށް އަހުލުވެރިކުރުވުމާއި ކުރިއަށް އޮތް ތަނުގައި ރަށުގައި ތަރާވީހް ނަމާދު ފަދަ ނަމާދުތައް ކުރުމަށް ކުދިން ތަމްރީނުކުރުން،" އޭނާ ވިދާޅުވިއެވެ.
މިއީ ދެ އަހަރު ދުވަހުގެ މުއްދަތަށް ކުރިއަށް ގެންދާ ޕްރޮގްރާމެކެވެ. އެގޮތުން އެ ޕްރޮގްރާމްގައި ކޮންމެ އަހަރަކު 15 ފޮތް ހިތުދަސްކުރަން ޖެހޭނެއެވެ. ކޮންމެ ގްރޭޑެއްގެ ދަރިވަރުން ވެސް ދަސްކުރަން ޖެހޭނީ އެ ގްރޭޑަކަށް ކަނޑައަޅާފައިވާ މުގައްރަރެކެވެ.
"ފުރަތަމަ އަހަރު ވީމަ އަޅުގަނޑުމެން އިންނާނީ މި އަހަރު މި ހިސާބުން ފެށިގެން އެއް އަހަރުތެރޭ 15 ފޮތް ހިތުދަސްކުރާ ކުއްޖަކަށް ހއ. އަތޮޅު ތައުލީމީ މަރުކަޒުގެ ޙިފްޒް ރަންތާޖުގެ ނަމުގައި އިނާމެއް ދޭން،" ނާހިދު ވިދާޅުވިއެވެ.
ހއ. އަތޮޅު ތައުލީމީ މަރުކަޒުން މިވަގުތު 1007 ދަރިވަރުން ތައުލީމު ހާސިލްކުރެއެވެ. މި ޕްރޮގްރާމްގައި ބައިވެރިވާން ބޭނުންވާ ކުދިންނަށް މާދަމާއިން ފެށިގެން ނަން ނޯޓު ކުރެވޭނެއެވެ.