މިހާރު ރާއްޖެއަށް ކުރަމުންދާ ވިއްސާރައިގައި ހއ. ހޯރަފުށީގެ ދެކުނު ސަރަހައްދުގައި ފެންބޮޑުވެ، ހަ ގެއަކަށް ފެންވަނުމުގެ ސަބަބުން ހަ އާާއިލާ ރައްކާތެރި ހިސާބަކަށް ބަދަލުކުރުމުގެ މަސައްކަތް އެ ރަށު ކައުންސިލުން ކުރަން ފަށައިފިއެވެ.
މިހާރު ރާއްޖެއަށް ކުރަމުންދާ ވިއްސާރައިގައި ރާއްޖޭގެ އެންމެ އުތުރުން ހއ. އަތޮޅުގެ ރަށްތަކުގައި ފެންބޮޑުވެ، އެކިވަރުގެ ގެއްލުންތައް ލިބެމުންދާ ކަމަށް ސިޓީތަކާއި އިދާރީ ދާއިރާތައް ހިންގުމާއި، އާންމު މަސައްކަތްތަކާބެހޭ ވުޒާރާއިން ވަނީ ބުނެފައެވެ.
އެ ވުޒާރާއިން ބުނީ، ރާއްޖެއަށް ކުރަމުންގެންދާ ވިއްސާރައިގައި މިހާތަނަށް ހއ. އަތޮޅުގެ ހަތް ރަށެއްގައި ފެންބޮޑުވެ، އެ ރަށްތަކަށް އެކިވަރުގެ ގެއްލުންތައް ވަމުންދާކަމަށް އެ ކައުންސިލްތަކުން މަޢުލޫމާތު ދޭ ކަމަށެވެ.
އެގޮތުން، އިއްޔެއިން ފެށިގެން ވެހެމުންދާ ވާރޭ އަދިވެސް ހުއްޓައިނުލާ ވެހުމުގެ ސަބަބުން ހޯރަފުށި، އިހަވަންދޫ، ދިއްދޫ، ބާރަށް، ކެލާ، މުރައިދޫ އަދި މާރަންދޫގައި ފެންބޮޑުވެ، މީހުންގެ ގެދޮރަށާއި މުދަލަށް ގެއްލުން ލިބެމުންދާ ކަމަށް އެ ރަށްރަށުގެ ކައުންސިލްތަކުން މަޢުލުމާތު ދީފައިވާ ކަމަށް މިނިސްޓްރީން ބުންޏެވެ.
ހޯރަފުއްޓާއި އިހަވަންދޫއާއި ދިއްދޫ އަދި ކެލާގަައި ބޮޑުވެފައިވާ ފެންގަނޑު އަދިވެސް އެއްކޮށް ނުހިންދޭ ކަމަށް ސިޓީތަކާބެހޭ ވުޒާރާއިން ބުނެއެވެ.
މިނިސްޓްރީން ބުނީ، އެމްއެންޑީއެފްގެ ރެސްކިއު ޓީމެއް މިހާރު ހއ. އަތޮޅަށް ދަތުރުކުރަމުން އަންނަ ކަމަށެވެ.
މީގެ އިތުރުން، ހއ. ހޯރަފުށީގެ ދެކުނު ސަރަހައްދުގައި ފެންބޮޑުވުމުގެ ސަަބަބުން ހަ ގެއަކަށް ފެންވަނުމުގެ ސަބަބުން އެ ހަ އާާއިލާ ރަށްކާތެރި ހިސާބަކަށް ބަދަލުކުރުމުގެ މަސައްކަތް އެ ރަށު ކައުންސިލުން އަަންނަނީ ކުރަމުންނެވެ.
ހއ. އަތޮޅުގެ ރަށްތަކަކަށް މިހާރު ކުރަމުންގެންދާ ވިއްސާރައިގައި އެހީތެރިކަން ފޯރުކޮށްދެވިދާނެ ގޮތްތަކާ ގުޅޭގޮތުން މިއަދު ހެދުނު އަތޮޅުތަކާއި ސިޓީތަކާ ބެހޭ މިނިސްޓަރު އާދަމް ޝަރީފް އުމަރާއި ބާރަށު ދާއިރާގެ މެންބަރު އިބްރާހިމް ޝުޖާއު ވެސް މަޝްވަރާ ކުރައްވާފައިވާ ކަމަށް އެ ވުޒާރާއިން ބުނެއެވެ.
މިހާރު ރާއްޖެއަށް ކުރަމުންދާ ވިއްސާރައިގައި ވައިގަދަވެގެންނާއި ފެންބޮޑުވެގެން ނުވަ ރަށަކުން ރިޕޯޓުކޮށްފައިވާ ކަމަށް ނޭޝަނަލް ޑިޒާސްޓާ މެނޭޖްމެންޓް އޮތޯރިޓީ (އެންޑީއެމްއޭ)އިން އިއްޔެ ވަނީ ބުނެފައެވެ. ނަމަވެސް، އޭރު އެ އިދާރާއިން ބުނީ އެއްވެސް އާއިލާއެއް ވަގުތީ ހިޔާވައްސަކަށް ބަދަލު ކުރަން ޖެހިފައިނުވާ ކަމަށެވެ.