ރަސްގެފާނު ޗާލްސް ތިނެއް، އިނގިރޭސިވިލާތުގެ ރަސްކަމުގެ ތަޚުތަށް ވެޑުވުމުގެ ރަސްމިއްޔާތާ ދެކޮޅަށް އިއްޔެ އެގައުމުގައި މުޒާހަރާ ކުރި މީހުންގެ ތެރެއިން 52 މީހަކު ހައްޔަރުކޮށްފިއެވެ.
އެ މީހުން ހައްޔަރު ކުރުމާ ގުޅިގެން އެ ގައުމުގެ ރައްޔިތުންގެ މަޖިލީހުގެ ބައެއް މެމްބަރުންނާއި އިންސާނީ ހައްގުތަކަށް މަސައްކަތް ކުރާ ޖަމާއަތްތަކުން ދަނީ ފުލުހުންނަށް ވަރަށް ބޮޑަށް ފާޑުކިޔަމުންނެވެ.
މުޒާހަރާގެ ތެރެއިން ލަންޑަނުން ހައްޔަރުކުރި މީހުންގެ ތެރޭގައި ރަސްކަމާ ދެކޮޅު ޖަމާއަތެއް ކަމަށްވާ "ރިޕަބްލިކް"ގެ ވެރިޔާ ވެސް ހިމެނެއެވެ. އެހެންނަމަވެސް އެ ސިޓީގެ ބޭރުން އެއްވެސް މީހަކު ހައްޔަރުކޮށްފައެއް ނުވެއެވެ.
ރަސްގެފާނު ޗާލްސް ތިނެއް އިނގިރޭސިވިލާތުގެ ތަޚުތަށް ވެޑުވުމުގެ ރަސްމިއްޔާތާ ގުޅިގެން މަތުތައް މައްޗަށް އެއްވެ ތިބެ މުޒާހަރާ ކުރި މީހުންގެ ބޯޑުތައް ފުލުހުންގެ ބެލުމުގެ ދަށަށް ގެންދަނީ -- ފޮޓޯ/ ޕީއޭ މީޑިއާ
މިކަމަށް ފާޑުކިޔާ މީހުން ބުނެފައިވަނީ އިނގިރޭސިވިލާތުގައި މިހާރު ސުލްހަވެރިކަމާއެކު މުޒާހަރާ ކުރުމުގެ ހައްގުވެސް ނޯންނަ ކަމަށެވެ. އަދި މުޒާހަރާ ކުރުމުގެ ހައްގަކީ މުހިންމު ހައްގެއް ކަމަށާއި މީހުންގެ އަޑު އަހަން ޖެހޭނެ ކަމަށް އެ ފަރާތްތަކުން ބުނެއެވެ.
މި ފާޑުކިޔުންތަކަށް ރައްދުދެއްވާ ލަންޑަންގެ ފުލުހުންގެ ކޮމާންޑަރެއް ކަމަށްވާ ކެރެން ފިންޑްލޭ ވިދާޅުވީ, ކޮރޮނޭޝަން ކުރިއަށްދިޔަ ވަގުތު އެކަމަށް ހުރަސް އެޅޭގޮތަށް އަމަލުތައް ބަހައްޓާނަމަ ފުލުހުން އެކަމަށް ފިޔަވަޅު އަޅާނެކަމަށެވެ.
"ކޮރޮނޭޝަން އަކީ ކޮންމެ ޖީލެއްގައި އެއްފަހަރު ކުރިއަށްގެންދާ ހަރަކާތެއް. އެއީ ވަރަށް ބޮޑަށް ބެލެހެއްޓިގެން ކުރިއަށް ގެންދާ އަދި ފުލުހުންނަށް ހަވާލުކުރެވޭ ބޮޑު އެސެސްމެންޓެއް،" ފިންޑްލޭ ވިދާޅުވިއެވެ.
އިއްޔެގެ މުޒާހަރާތަކުން މީހުން ހައްޔަރުކޮށްފައިވަނީ ރަސްމިއްޔާތާ ގުޅުވައިގެން، އާންމު މަސްލަހަތާއި މުޖުތަމައުގެ ސުލްހަމަސަލަސްކަން ނަގާލަން ރޭވުމާއި ތުހުމަތުގައެވެ.
އެހެންނަމަވެސް ހައްޔަރުކުރި މީހުން ވަނީ ޝާހީ ރަސްމިއްޔާތަށް ފަހު ރޭގެ ވަގުތެއްގައި ދޫކޮށްލާފައެވެ.
މުޒާހަރާ ކުރާ ފަރާތްތަކުން އެމީހުންގެ މުޒާހަރާތަކަކީ ސުލްހަވެރި މުޒާހަރާތަކެއް ކަމަށް ބުނަމުން ދިޔަ ނަމަވެސް ފުލުހުން ބުނީ އެމީހުން އެމުނާސަބަތަށް ހުރަސް އަޅަން ރޭވި ކަމުގެ މައުލޫމާތު އިންޓެލިޖެންސްއަށް ލިބިފައިވާ ކަމަށެވެ.
ރަސްގެފާނު ޗާލްސް ތިނެއް އިނގިރޭސިވިލާތުގެ ތަޚުތަށް ވެޑުވުމުގެ ރަސްމިއްޔާތާ ގުޅިގެން މަތުތައް މައްޗަށް އެއްވެ ތިބެ މުޒާހަރާ ކުރި މީހުން -- ފޮޓޯ/ ޕީއޭ މީޑިއާ
އިއްޔެ ކުރިއަށްދިޔަ ކޮރޮނޭޝަން ފެށުމުގެ ދުވަސްތަކެއް ކުރިން އާންމުން ވަނީ، ޝާހީ އާއިލާގެ މެމްބަރުން ގަނޑުވަރުން ފައްޅިއަށް ވަޑައިގަންނަވަން ބޭނުންކުރައްވާނެ މަގުތައް ކައިރިއަށް އެއްވާން ފަށާފައެވެ. އެގޮތުން ޝާހީ އާއިލާގެ މެމްބަރުން ދެކިލުމުގެ އުއްމީދުގައި އެތައް މިލިއަން ބަޔަކު އެ މަގުތަކަށް އެއްވެފައި ތިއްބެވެ.
ރަސްކަމާ ދެކޮޅަށް މުޒާހަރާކޮށްފައި ވަނީ، ޝާހީ އާއިލާއަށް ތާއިދުކޮށް އެއްވެފައި ތިބި މީހުންގެ ތެރޭގައެވެ.